AKP ព្រះសីហនុ  ថ្ងៃទី២១ ខែឧសភា ឆ្នាំ២០២១ -- នាព្រឹកថ្ងៃសុក្រ ១០កើត ខែជេស្ឋ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២១ ខែឧសភា ឆ្នាំ២០២១ ឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ អញ្ជើញប្រគល់ Rapid Test  ចំនួន ៥.០០០ និងទូរសម្លាប់មេរោគកូវីដ១៩មួយគ្រឿង ជូនដល់ មន្ទីរសុខាភិបាលខេត្តព្រះសីហនុ ដែលជាអំណោយរបស់ឯកឧត្តម នាយឧត្តម សេនីយ៍ ហ៊ុន ម៉ាណែត អគ្គមេបញ្ជាការរង និងជាមេបញ្ជាការកងទ័ពជើងគោក។ ពិធីប្រគល់ និងទទួលនេះ ធ្វើឡើងនៅមន្ទីរសុខាភិបាលខេត្តព្រះសីហនុ  មានទីតាំងសង្កាត់លេខ៤ ក្រុងព្រះសីហនុ ដោយមានការចូលរួមពីលោកអភិបាលរងខេត្ត លោកស្រីប្រធានមន្ទីរសុខាភិបាល និង ប្រធានមន្ទីរពេទ្យបង្អែកខេត្តព្រះសីហនុ។

ឯកឧត្តម គួច ចំរើន អភិបាលខេត្តព្រះ សីហនុ មានប្រសាសន៍ថា Rapid Test ចំនួន ៥.០០០នេះ និងទូរសម្លាប់មេរោគកូវីដ១៩មួយគ្រឿង គឺជាជំនួយឧបត្ថម្ភពីឯកឧត្តម នាយឧត្តមសេនីយ៍ ហ៊ុន ម៉ាណែត អគ្គមេបញ្ជាការរង និងជាមេបញ្ជាការកងទ័ពជើងគោក ជូនដល់មន្ទីរសុខាភិបាលខេត្តព្រះសីហនុ ដើម្បីប្រើប្រាស់តេស្តរកមេរោគកូវីដ-១៩ នៅខេត្ត ព្រះសីហនុ ម្យ៉ាងទៀត Rapid Test នេះ ជាឧបករណ៍តេស្តរកមេរោគកូវីដ១៩ បានលឿននិង ទាន់ពេលវេលា ដើម្បីយើងធ្វើការគ្រប់គ្រង និងការកាត់ផ្តាច់ការឆ្លងរាល ដាលនៃជំងឺកូវីដ-១៩ ក្នុងក្រុមគ្រួសារ និងសហគមន៍របស់យើង។

ឯកឧត្តម អភិបាលខេត្តព្រះសីហនុ បានបន្តថា គុណតម្លៃនៃ Rapid Test ធ្វើឱ្យយើង គ្រប់គ្រងជំងឺកូវីដ-១៩ កុំឱ្យឆ្លងរាលដាលចូលក្នុងសហគមន៍បានល្អ ដោយសារការធ្វើតេស្ត យើងប្រើរយៈពេលពី១៥ ទៅ ២០នាទីតែប៉ុណ្ណោះ ប្រសិនបើតេស្តឃើញវិជ្ជមានកូវីដ-១៩ ភ្លាម ក្រុមគ្រូពេទ្យយើង នឹងយកពួកគាត់ទៅកាន់មណ្ឌលព្យាបាល ដោយកាត់ផ្តាច់មិនឱ្យមានការ ចម្លងបន្តទៅអ្នកដទៃទៀត ប្រសិនយើងតេស្តដោយប្រើ PCR ម៉ាស៊ីនវិភាគរកមេរោគកូវីដ-១៩ វាមាន រយៈពេលវែង អាចពីមួយថ្ងៃ ឈានដល់ ពីរថ្ងៃ ដូច្នេះវាមានហានិភ័យក្នុងការឆ្លង រាលដាលចូលក្នុងក្រុមគ្រួសារ និងសហគមន៍របស់យើង។

ទន្ទឹមនោះ ក្នុងនាមរដ្ឋបាលខេត្ត ក្រុមប្រឹក្សាខេត្ត និងប្រជាពលរដ្ឋខេត្តព្រះសីហនុ សូមថ្លែងអំណរគុណជំពោះឯកឧត្តម នាយឧត្តមសេនីយ៍ ហ៊ុន ម៉ាណែត អគ្គមេបញ្ជាការរង និងជាមេបញ្ជាការកងទ័ពជើងគោក ដែលបានឧបត្ថម្ភនូវ Rapid Test និងទូរសម្លាប់មេរោគ កូវីដ១៩ មកខេត្តព្រះសីហនុ នាពេលនេះ ដើម្បីចូលរួមការទប់ស្កាត់នៃការឆ្លងរីករាលដាល នៃជំងឺកូវីដ-១៩ ក្នុងសហគមន៍ ៕

ដោយ ងូ សុមុនី