AKP ភ្នំពេញ ថ្ងៃទី២៦ ខែមេសា ឆ្នាំ២០២៦--

ដំណើរការនៃការរៀបចំខ្លួនធ្វើជាម្ចាស់ផ្ទះ នៃកិច្ចប្រជុំកំពូលហ្វ្រង់កូហ្វូនី លើកទី២០ ដែលគ្រោងនឹងប្រពឹត្តទៅរយៈពេល២ថ្ងៃ ចាប់ពីថ្ងៃទី១៥ ដល់១៦ ខែវិច្ឆិកា ឆ្នាំ២០២៦ខាងមុខ បាននិងកំពុងតែប្រពឹត្តទៅប្រកប​ដោយវឌ្ឍនភាព។ នេះបើតាមការអះអាងរបស់មន្រ្តីជាន់ខ្ពស់មួយរូប ដែលទទួលបន្ទុកកិច្ចការនេះ។

​ឯកឧត្តម លុយ ដាវីត ឯកអគ្គរាជទូតកម្ពុជា ប្រចាំប្រទេសបារាំង និងជាអនុប្រធានគណៈកម្មការនយោបាយ របស់អង្គការអន្តរជាតិហ្វ្រង់កូហ្វូនី បានចែករំលែកនៅលើបណ្តាញសង្គមថា នៅពេលនេះក្រុមការងារបាននិងកំពុងតែស្ថិតនៅក្នុងការរៀបចំសេចក្តីព្រាងសេចក្តីប្រកាសនៃកិច្ចប្រជុំកំពូលនេះ។

ឯកឧត្តមបានបញ្ជាក់៖​ “ក្រុមការងារកម្ពុជា អង្គការអន្តរជាតិហ្រ្វង់កូហ្វូនី ​និងបារាំង កំពុងជំរុញសេចក្តីព្រាងសេចក្តីប្រកាស នៃកិច្ចប្រជុំកំពូលហ្វ្រង់កូហ្វូនី លើកទី២០ ដែលគ្រោងធ្វើឡើងនៅខែវិច្ឆិកា នៅរាជធានីភ្នំពេញ”។

​ឯកឧត្តមបានបន្តថា ក្រុមការងាររបស់គណៈកម្មាធិការសេចក្តីព្រាងឯកសារ នៃកិច្ចប្រជុំកំពូល ដែលមានបារាំងជាប្រធាន ហើយកម្ពុជាជាអនុប្រធាន បានកំពុងតែធ្វើការជាមួយនឹងវិទ្យាស្ថាននៃអង្គការអន្តរជាតិហ្វ្រង់កូហ្វូនី​។ នៅពេលនេះក្រុមការងារ បាននិងកំពុងតែបំពេញការងារជាបន្តបន្ទាប់ដើម្បីឱ្យដំណើរការនៃការរៀបចំកិច្ចប្រជុំកំពូលនេះ ដំណើរការទៅដោយជោគជ័យ។

​ឯកឧត្តមបានបន្តទៀតថា “ដូចដែលដែលព្រះករុណាព្រះមហាក្សត្រនៃយើង បានបញ្ជាក់នាពេលថ្មីៗនេះ នៅឆ្នាំ២០២៦ យើងចង់ឱ្យស្នាមញញឹមរបស់ខ្មែរ ក្លាយជាស្នាមញញឹមរបស់ហ្វ្រង់កូហ្វូនី"។ ឯកឧត្តមបានបន្ថែមថា ប្រទេសកម្ពុជា និងអង្គការអន្តរជាតិហ្វ្រង់កូហ្វូនី បានប្តេជ្ញាចិត្តយ៉ាងពេញទំហឹងក្នុងការធ្វើឱ្យកិច្ចប្រជុំកំពូល លើកទី២០ ដែលនឹងប្រព្រឹត្តទៅនៅរាជធានីភ្នំពេញ ក្លាយជាព្រឹត្តិការណ៍ប្រវត្តិសាស្ត្រ និងប្រកបដោយជោគជ័យ។

ពាក់ព័ន្ធនឹងកិច្ចប្រជុំកំពូលជាប្រវតិ្តសាស្រ្តនេះ ឯកឧត្តម អូលីវីយេ រីឆាត (Olivier Richard) ឯកអគ្គរដ្ឋ​ទូតបារាំង ប្រចាំនៅកម្ពុជា បានប្រាប់ទីភ្នាក់ងារសារព័ត៌មានកម្ពុជា (AKP) កាលពីពេលថ្មីៗនេះថា មកដល់ពេលនេះ កម្ពុជាកំពុងតែខិតខំប្រឹងប្រែងអស់ពីកម្លាំងកាយចិត្ត ដើម្បីធ្វើឱ្យព្រឹត្តិការណ៍នេះទទួលបានជោគជ័យ​។ ឯកឧត្តមបានបញ្ជាក់ថា “កិច្ចប្រជុំកំពូលហ្វ្រង់កូហ្វូនីនឹងក្លាយជាឱកាសមួយដើម្បីបង្កើតកិច្ចសហប្រតិបត្តិការថ្មីៗរវាងកម្ពុជា និងពិភពអ្នកប្រើប្រាស់ភាសាបារំាង“។

ឯកឧត្តមបានបន្តទៀតថា អ្វីដែលកម្ពុជាបានកំពុងតែរៀបចំនៅពេលនេះ ជាដំណើរការនៃការវិលប្រឡប់មកវិញនៃកិច្ចប្រជុំកំពូលនេះ មកតំបន់អាស៊ីប៉ាស៊ីហ្វិក បន្ទាប់ពីកិច្ចប្រជុំកំពូលលើកទី៦ ដែលបានប្រពឹត្តិទៅនៅវៀតណាម កាលពីឆ្នាំ១៩៩៧។

ឯកឧត្តមបានមានប្រសាសន៍បន្តទៀតថា សហគមន៍ហ្វ្រង់កូហ្វូនីសំបូរទៅដោយចំណងមេត្រីភាព សាមគ្គីភាព និងផ្តល់ឱកាសដ៏ធំធេងសម្រាប់វិស័យសេដ្ឋកិច្ច និងពាណិជ្ជកម្ម ពីព្រោះប្លុកនេះតំណាងឱ្យ ១៦ភាគរយ នៃផលិតផលក្នុងស្រុកសរុបលើសកលលោក និង២០ភាគរយ ​នៃពាណិជ្ជកម្មសកល។

ពាក់ព័ន្ធនឹងកិច្ចប្រជុំកំពូលនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានជម្រាបឯកឧត្តមប្រធានាធិបតីបារាំង អេម៉ានូអែល ម៉ាក្រុង (Emmanuel Macron) នៅក្នុងជំនួបនៅប្រទេសបារាំងថ្មីៗនេះ អំពីការត្រៀមធ្វើជាម្ចាស់ផ្ទះរបស់កម្ពុជា ​ក្នុងការរៀបចំកិច្ចប្រជុំកំពូលហ្វ្រង់កូហ្វូនី លើកទី២០ នាខែវិច្ឆិកា ឆ្នាំ២០២៦ នៅរាជធានីភ្នំពេញ ក្រោមមូលបទ “ការវិនិយោគឡើងវិញលើសន្តិភាព ដើម្បីវិបុលភាពរួម និងស្ថិរភាពជានិរន្តរ៍”។

សម្តេចធិបតី បានគូសបញ្ជាក់ពីមហិច្ឆតារបស់កម្ពុជា ក្នុងការពង្រឹងតួនាទីរបស់ហ្វ្រង់កូហ្វូនីនៅក្នុងតំបន់អាស៊ី-ប៉ាស៊ីហ្វិក និងការលើកកម្ពស់កិច្ចសហប្រតិបត្តិការផ្នែកយុវជន នវានុវត្តន៍ និងសេដ្ឋកិច្ច។ សម្តេចធិបតី រង់ចាំទទួលស្វាគមន៍ឯកឧត្តមប្រធានាធិបតីបារាំងមកបំពេញទស្សនកិច្ចផ្លូវរដ្ឋ និងចូលរួមកិច្ចប្រជុំ កំពូលហ្វ្រង់កូហ្វូនីលើកទី២០ នៅកម្ពុជា ដែលទស្សនកិច្ចជាប្រវត្តិសាស្ត្រនេះនឹងផ្តល់សន្ទុះបន្ថែមដល់ការពង្រឹងទំនាក់ទំនងឱ្យកាន់តែស៊ីជម្រៅលើផ្នែកយុទ្ធសាស្ត្ររវាងប្រទេសទាំងពីរ។

កម្ពុជា​គឺជា​ប្រទេស​មួយ​ក្នុង​ចំណោម​រដ្ឋ​សមាជិកចំនួន ៩០ នៃអង្គការអន្តរជាតិហ្វ្រង់កូហ្វូនី ដែល​រួម​មាន​សមាជិក​ពេញសិទ្ធិ​ចំនួន ៥៣ប្រទេស សមាជិកពាក់ព័ន្ធ (Associate Members) ​ចំនួន៥ប្រទេស និង​អ្នកសង្កេតការណ៍​ចំនួន ៣២ ប្រទេស។ នៅ​ទូទាំង​ពិភពលោកនាពេលបច្ចុប្បន្ននេះ គេដឹងថា មាន​ប្រជាពលរដ្ឋដែល​និយាយ និងប្រើប្រាស់​ភាសា​បារាំង​ប្រមាណ​ ៣៩៦ លាន​នាក់៕

ដោយ ហេង បញ្ញា