AKP បន្ទាយមានជ័យ ថ្ងៃទី២៦  ខែមេសា ឆ្នាំ២០២៦--

សុខុមាលភាព និងជីវភាពរស់នៅរបស់បងប្អូនប្រជាពលរដ្ឋភៀសសឹក ដែលកំពុងស្នាក់នៅបណ្ដោះអាសន្ន ក្នុងតំបន់ផ្ទះអតីតយុទ្ធជនក្នុងស្រុកស្វាយចេក ទទួលបានការយកចិត្តទុកដាក់កាន់តែខ្លាំងពីថ្នាក់ដឹកនាំ និងសប្បុរសជន។ ជាក់ស្ដែង កាលពីថ្ងៃទី២៥ ខែមេសា ឆ្នាំ២០២៦ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានអញ្ជើញជាអធិបតីភាពក្នុងពិធីទទួល និងដាក់ឱ្យប្រើប្រាស់ជាផ្លូវការនូវប្រព័ន្ធចម្រោះទឹកស្អាត ដែលជាអំណោយដ៏ថ្លៃថ្លារបស់ក្រុមហ៊ុនប្រេងកូឡា និងប្រេងខ្យល់ ២៤ កក្កដា។

ក្នុងឱកាសនោះ ឯកឧត្តមអភិបាលខេត្ត បានថ្លែងអំណរគុណយ៉ាងជ្រាលជ្រៅចំពោះ លោក សុខ គឹមនិតតា ប្រធានក្រុមហ៊ុនប្រេងកូឡា និងប្រេងខ្យល់ ២៤ កក្កដា ព្រមទាំងក្រុមគ្រួសារ និងក្រុមការងារ ដែលបានបរិច្ចាគធនធានផ្ទាល់ខ្លួន ជួយសម្រាលទុក្ខលំបាករបស់ប្រជាពលរដ្ឋ។

ឯកឧត្តមបានគូសបញ្ជាក់ថា ការផ្ដល់ជូនប្រព័ន្ធចម្រោះទឹកស្អាតនាពេលនេះ មិនត្រឹមតែជួយឱ្យបងប្អូនភៀសសឹក និងសិស្សានុសិស្សមានទឹកស្អាតសម្រាប់បរិភោគប៉ុណ្ណោះទេ ប៉ុន្តែគឺជាយុទ្ធសាស្ត្រមួយក្នុងការបង្ការជំងឺតម្កាត់ផ្សេងៗ ដែលបង្កឡើងពីការប្រើប្រាស់ទឹកមិនស្អាត និងជួយកាត់បន្ថយចំណាយប្រចាំថ្ងៃលើការទិញទឹកបរិភោគផងដែរ។

  
ម៉ាស៊ីនចម្រោះទឹកស្អាតដែលបានដំឡើងជូននេះ ជាបច្ចេកវិទ្យាដែលមានសមត្ថភាពខ្ពស់អាចផលិតទឹកស្អាតបានរហូតដល់ ៧០០ លីត្រ ក្នុងមួយម៉ោង។សម្រាប់បម្រើដល់តម្រូវការរបស់បងប្អូនភៀសសឹកប្រមាណ ៣,០០០ គ្រួសារ ដែលស្ថិតនៅភូមិស្លក្រាម ឃុំស្លក្រាម ស្រុកស្វាយចេក។

ឯកឧត្តម អ៊ុំ រាត្រី ក៏បានអំពាវនាវយ៉ាងទទូចដល់បងប្អូនប្រជាពលរដ្ឋទាំងអស់ ត្រូវរួមគ្នាថែរក្សាសមិទ្ធផលនេះឱ្យបានល្អ ដើម្បីធានាបាននូវការប្រើប្រាស់យូរអង្វែង និងត្រូវបន្តប្រកាន់ខ្ជាប់នូវវិធានការអនាម័យ «រស់នៅស្អាត ហូបស្អាត ផឹកស្អាត» ជាប្រចាំ។

ឆ្លៀតក្នុងឱកាសនោះដែរ ឯកឧត្តមអភិបាលខេត្ត បានលើកឡើងពីផែនការយុទ្ធសាស្ត្ររបស់រាជរដ្ឋាភិបាល ក្នុងតំបន់ស្នាក់នៅបណ្ដោះអាសន្នរបស់ពលរដ្ឋភៀសសឹកឯកឧត្តមបានបញ្ជាក់ថា រដ្ឋបាលខេត្តបាន និងកំពុងយកចិត្តទុកដាក់ខ្ពស់លើហេដ្ឋារចនាសម្ព័ន្ធ ការពង្រីកបណ្ដាញផ្លូវ ទឹកស្អាត អគ្គិសនី និងសាលារៀន។សន្តិសុខស្បៀង ការរៀបចំដីកសិកម្មសម្រាប់គ្រួសារនីមួយៗ ដើម្បីជំរុញការដាំដុះ និងចិញ្ចឹមសត្វ ទាំងលក្ខណៈគ្រួសារ និងសហគមន៍។ បង្កើតឱកាសការងារ និងប្រាក់ចំណូល ដើម្បីឱ្យបងប្អូនអាចរស់នៅដោយឯករាជ្យ និងមានស្ថិរភាពជីវភាព។

ទន្ទឹមនោះបងប្អូនប្រជាពលរដ្ឋភៀសសឹកដែលស្នាក់នៅទីនោះ បានបង្ហាញនូវស្នាមញញឹម និងក្ដីរំភើបរីករាយឥតឧបមា។ ពួកគាត់បានថ្លែងអំណរគុណយ៉ាងជ្រាលជ្រៅដល់ថ្នាក់ដឹកនាំគ្រប់លំដាប់ថ្នាក់ និងសប្បុរសជន មិនដែលបោះបង់ពួកគាត់ចោល និងតែងតែផ្ដល់ភាពកក់ក្ដៅ ក៏ដូចជាដោះស្រាយរាល់ការលំបាកបានទាន់ពេលវេលាបំផុត៕

ដោយ ឈុន សារ៉ាត