AKP ភ្នំពេញ ថ្ងៃទី២១ ខែវិច្ឆិកា ឆ្នាំ២០១៨ -- ដោយមានការយកចិត្តទុកដាក់ពីសុខទុក្ខបងប្អូនប្រជាពលរដ្ឋដែលបានអញ្ជើញមកលេងកម្សាន្ដនៅក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុកដែលបាន​ប្រព្រឹត្ត​ទៅក្នុងរយៈពេលបីថ្ងៃ ចាប់ពីថ្ងៃទី២១ ដល់ថ្ងៃទី២៣ ខែវិច្ឆិកា ឆ្នាំ២០១៨នេះ ឯកឧត្តម សាស្រ្តា ចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល នារសៀលថ្ងៃទី២១ ខែវិច្ឆិកានេះ បាន​អញ្ជើញចុះពិនិត្យមើល​តាម​បណ្ដាស្តង់ សម្រាប់ពិនិត្យ និងសង្រ្គោះបឋម ២៤ម៉ោង ដែលកំពុង​ដាក់ប្រចាំការបម្រើ​សេវា​សុខាភិបាល ជួនដល់ប្រជាពលរដ្ឋដែលមានបញ្ហាសុខភាពនៅក្នុង កំឡុងពេល​ព្រះរាជពិធីបុណ្យអុំទូក។

ឯកឧត្ដមសាស្រ្តាចារ្យ ម៉ម ប៊ុនហេង បានមានប្រសាសន៍ថា នៅក្នុងកំឡុងពេលព្រះ​រាជពិធីបុណ្យអុំទូក បណ្តែតប្រទីបអកអំបុក និងសំពះព្រះខែ អកអំបុកនេះ ក្រសួងសុខាភិ បាល បានត្រៀមរួចជាស្រេច ដើម្បីជួយសង្គ្រោះ និងថែទាំសុខភាពជូនប្រជាពលរដ្ឋ ដោយ ដាក់គ្រូពេទ្យឱ្យនៅប្រចាំការចំនួន១២ស្តង់ រួមនឹងរថយន្តសង្រ្គោះប្រចាំការចំនួន៦៨រថយន្ត និងក្រុមគ្រូពេទ្យចល័តចំនួន១.០៣៧នាក់។ ទន្ទឹមនេះ ក្រសួងក៏បានសហការជាមួយ​អាជ្ញាធរ មូលដ្ឋាន នគរបាល សម្រាប់រង់ចាំទទួលប្រជាពលរដ្ឋ មកកម្សាន្ត និងសង្រ្គោះជូនដល់ប្រជា ពលរដ្ឋណាដែលមានបញ្ហាសុខភាព ដោយមិនឱ្យមានកង្វល់ខ្វល់ខ្វាយពីបញ្ហាសុខភាព ក្នុង​ពេលដើរកម្សាន្តសប្បាយ នៅក្នុងព្រះរាជពិធីបុណ្យនោះឡើយ។ ឯកឧត្តមបានណែនាំឱ្យ ប្រជាពលរដ្ឋទាំងអស់ ត្រូវចេះរក្សាសុខភាពផ្ទាល់ខ្លួនឱ្យបានល្អ ដោយចូលរួមការពារទប់ ស្កាត់ការចម្លងរោគឆ្លងនានា និងការពារការរាគរូស ឬពុលចំណីអាហារ ដោយអនុវត្តន៍ វិធានការថែរក្សាអនាម័យស្អាត ធានានូវសុវតិ្ថភាពចំណីអាហារ បរិភោគចំណីអាហារឆ្អិនល្អ និងពិសារទឹកស្អាត ឬដាំពុះ។ លើសពីនេះទៀត សូមកុំច្រាន ឬប្រជ្រៀតគ្នា ដើម្បីទប់​ស្តាត់នូវការដួលសន្លប់ ដែលអាចកើតមានដោយយថាហេតុ បើបងប្អូនវិលមុខ ឬស្រវាំង​ភ្នែកសុំអង្គុយ និងហៅរកអ្នកជួយសង្រ្គោះ។ ជាមួយគ្នានេះ ក្រសួងសុខាភិបាល បានចាត់ចែង ឱ្យមានសេវាសង្រ្គោះ និងការពិនិត្យព្យាបាលនៅតាមទីតាំងដូចបានរៀបរាប់ខាងក្រោមនេះ បានដោយគ្មានការបង់ថ្លៃឡើយ ហើយមួយទៀតបើមានបញ្ហាអ្វីមួយកើតឡើងនោះ សូម​ទំនាក់ទំនងមកលេខ១១៩សម្រាប់សេវារថយន្តសង្រ្គោះបន្ទាន់។

ឯកឧត្តមរដ្ឋមន្រ្ដីបានលើកឡើងថា ក្រសួង ក៏បានត្រៀមឱ្យមានក្រុមគ្រូពេទ្យចល័ត ក្នុងហ្វូងប្រជាពលរដ្ឋដោយមានឯកសណ្ឋានពេទ្យ ដើម្បីជួយសង្គ្រោះដល់ប្រជាពលរដ្ឋ ដែល គាត់អាចមានបញ្ហាសុខភាព ឬមិនអាចមករកគ្រូពេទ្យនៅតាមស្ដង់សុខភាព ឬរថយន្តសង្រ្គោះ បានផងដែរ៕

ដោយ អ៊ុន រិទ្ធី