AKP ភ្នំពេញ ថ្ងៃទី២១ ខែវិច្ឆិកា ឆ្នាំ២០១៨ -- មន្ត្រីជាន់ខ្ពស់ក្រសួងអប់រំ​យុវជន និងកីឡា និងជាប្រធានគណៈកម្មការមេប្រយោគទទួល បន្ទុករៀបចំព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក បានបញ្ជាក់ថា ឆ្នាំ២០១៨នេះមានទូកចូលរួមប្រកួតប្រជែងចំនួន២៩៤ទូក ពោលគឺមានការកើនឡើងចំនួន ២៣ទូកច្រើនជាងកាលពីឆ្នាំ២០១៧ កន្លងទៅ។

ឯកឧត្តម ប៊ូ ជុំសេរី អនុរដ្ឋលេខាធិការ ក្រសួងអប់រំ យុវជន និងកីឡា និងជាប្រធាន គណៈកម្មការមេប្រយោគទទួល បន្ទុករៀបចំព្រះរាជពិធីបុណ្យអុំទូក បានមានប្រសាសន៍​ក្រោយកិច្ចប្រជុំជាមួយប្រធានក្រុមទូករាជធានី-ខេត្ត កាលពីរសៀលថ្ងៃ ទី២០ ខែវិច្ឆិកា ឆ្នាំ២០១៨នេះថា ក្នុងចំណោមទូកសរុបចំនួន២៩៤ ដែលបានមកចូលរួមប្រកួតប្រជែង ដើម្បី​អបអរសារទរព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុកក្នុងឆ្នាំ២០១៨ នេះ គឺមានទូកអុំបុរសចំនួន១៦៣ ក្នុងនោះទូកអុំនារី១ ខណៈផ្នែកទូកចែវ មានទូកចែវបុរស​ចំនួន៣២ទូក និងទូកចែវនារី១ ព្រមទាំងទូកខ្នាតអន្តរជាតិចំនួន៩៦ទូក ក្នុងនោះ មានទូកខ្នាត អន្តរជាតិនារីចំនួន២ផងដែរ។ ឯកឧត្តមបានបន្ដថា នៅក្នុងចំណោម២៩៤ទូកនោះ គឺមានទូក ចំនួន៨៦ ត្រូវបានដាក់ ជាទូកគូពិសេស។

ឯកឧត្តមបានអះអាងថា ដោយសារចំនួនទូកមានការកើនឡើងច្រើនជាងឆ្នាំមុន ធ្វើឱ្យ ចំនួនកីឡាករ កីឡាការិនីក៏បានកើនឡើងផងដែរ ដែលមានកីឡាករ កីឡាការិនី ចូលរួមសរុប ចំនួន១៩.០១៧នាក់ មកពី១៨ រាជធានី-ខេត្ត និង៦ស្ថាប័ន គឺស្ថាប័នទីស្តីការគណៈរដ្ឋមន្រ្តី ក្រសួងមហាផ្ទៃ ក្រសួងការពារជាតិ កងរាជអាវុធហត្ថ និងទូកប្រចាំវត្តក្នុងរាជធានីភ្នំពេញ។

ឯកឧត្តមក៏បានគូសបញ្ជាក់ទៀតថា សម្រាប់លក្ខន្តិកៈ ច្បាប់នៃការប្រកួតមិនមាន​ការ​ប្រែប្រួលអ្វីខុសប្លែកពីឆ្នាំមុនៗឡើយ គ្រាន់តែកែសម្រួលបន្តិចបន្តួចនូវកន្លែងចេញដំណើរ ដើម្បីកុំឱ្យមានការយកប្រៀបលើគ្នា ក្នុងពេលចេញដំណើរប្រណាំងប៉ុណ្ណោះ។

សូមបញ្ជាក់ថា ព្រះព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ក្នុងឆ្នាំ២០១៨នេះ នឹងមានការបង្ហាញទូកង ដែលវែងជាងគេជាប់ឯកត្តកម្មពិពភលោក ឈ្មោះ កម្ពោជិកបុត្តាខេមរាតរី សម្រាប់រយៈពេលបីថ្ងៃផងដែរ ដើម្បីបង្ហាញជូនសាធារណជន ក៏ដូច​ជាភ្ញៀវទេសចរ ដែលបានចូលរួមបានមកទស្សនាកម្សាន្ដ៕

ដោយ ហេង ណាលីន