AKP ព្រះសីហនុ ថ្ងៃទី១៧ ខែធ្នូ ឆ្នាំ២០១៨ -- គណៈប្រតិភូខេត្តជាំងស៊ូ ប្រទេសចិន ដឹកនាំដោយលោក YAN LI អនុប្រធាន គណៈកម្មាធិការខេត្តជាំងស៊ូ ចូលជួបពិភាក្សាការងារជាមួយឯកឧត្តម យន្ត មីន អភិបាល នៃគណៈអភិបាលខេត្តព្រះសីហនុ ដើម្បីសិក្សាឈ្វេងយល់ពីសក្តានុពលលើវិស័យសេដ្ឋកិច្ច ពាណិជ្ជកម្ម ទេសចរណ៍ សុខាភិបាល និងអប់រំ កាលពីរសៀលថ្ងៃអាទិត្យ ៩កើត ខែមិគសិរ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៦ ខែធ្នូ ឆ្នាំ២០១៨ នៅសាលាខេត្តព្រះសីហនុ។

ឯកឧត្តម យន្ត មីន ក៏បានជម្រាបជូនពីសក្តានុពលរបស់ខេត្ត មានផ្លូវទឹក ផ្លូវ គោក ផ្លូវអាកាស និងផ្លូវរថភ្លើង ងាយស្រួលក្នុងការដឹកជញ្ជូនទៅកាន់តំបន់អាស៊ី និងអឺរ៉ុប  ព្រមទាំង បានសំណូមពរ ជួយជំរុញអ្នកវិនិយោគ និងទេសចរ ចិនឱ្យចូលមកវិនិយោគ និងកម្សាន្តនៅ ខេត្តព្រះសីហនុ កាន់តែច្រើនថែមទៀត រដ្ឋបាលខេត្តព្រះសីហនុ ធានាចំពោះសន្តិសុខ សុវត្ថិភាពដល់អ្នកវិនិយោគ ក៏ដូចជាភ្ញៀវទេសចរ។ ឯកឧត្តមអភិបាលខេត្តបានលើក ឡើងទៀតថា រយៈពេលពីរឆ្នាំចុងក្រោយនេះ តាម រយៈអ្នកវិនិយោគ និងភ្ញៀវទេសចរចិន បានធ្វើឱ្យខេត្តព្រះសីហនុ មានការអភិវឌ្ឍរីក ចម្រើនយ៉ាង ឆាប់រហ័ស។

លោក YAN LI អនុប្រធានគណៈកម្មាធិការខេត្តជាំងស៊ូ បានថ្លែងអំណរគុណ រដ្ឋបាលខេត្តព្រះសីហនុ ដែលតែងតែគាំទ្រអ្នកវិនិយោគ និងទេសចរចិន ជាពិសេសការ វិនិយោគរបស់ក្រុមហ៊ុនចិននៅតំបន់សេដ្ឋកិច្ចពិសេសក្រុងព្រះសីហនុ ដែលមានអ្នកវិនិយោគ មកពីខេត្តជាំងស៊ូ ជាច្រើនក្រុមហ៊ុន មកបណ្តាក់ទុនរកស៊ីនៅតំបន់សេដ្ឋកិច្ច ពិសេសក្រុង ព្រះសីហនុ ដែលអភិវឌ្ឍន៍ដោយក្រុមហ៊ុន ហុងតូគ្រុប ធ្វើឱ្យទំនាក់ទំនងរវាងខេត្តជាំងស៊ូ និងខេត្តព្រះសីហនុ កាន់តែប្រសើរឡើង។  

លោក YAN LI  ថ្លែងថា ខេត្តព្រះសីហនុ គឺជាខេត្តដែលមានសក្តា នុពលវិនិយោគ និងទេសចរណ៍គួរចាប់អារម្មណ៍បំផុតដែលមានអ្នកវិនិយោគ ក៏ដូចជាទេសចរចិន មកពីខេត្តជាំងស៊ូ ចូលមករកស៊ីនៅខេត្តព្រះសីហនុកាន់តែច្រើនបន្ថែមទៀតនៅថ្ងៃខាងមុខ៕

 ដោយ ងូ សុមុនី