AKP បន្ទាយមានជ័យ ថ្ងៃទី៥ខែតុលា ឆ្នាំ២០២៦--លោក កែ សួន សុភាព សមាជិកអចិន្ត្រៃយ៍គណៈកម្មាធិការកណ្តាល និងជាប្រធានសហភាពសហព័ន្ធយុវជនកម្ពុជា (ស.ស.យ.ក.) ខេត្តបន្ទាយមានជ័យ បានដឹកនាំសមាជិក សមាជិកា ចុះសួរសុខទុក្ខ និងនាំយកស្បៀងអាហារចែកជូនប្រជាពលរដ្ឋចំនួន ១០០គ្រួសារ ដែលកំពុងរងផលប៉ះពាល់ដោយសារទឹកជំនន់ ស្ថិតនៅភូមិក្បាលស្ពាន (សួនស្ព័រ) សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ នារសៀលថ្ងៃទី០៤ ខែតុលា ឆ្នាំ២០២៦។

ថ្លែងក្នុងឱកាសជួបសំណេះសំណាល និងសួរសុខទុក្ខប្រជាពលរដ្ឋ លោក កែ សួន សុភាព បានមានប្រសាសន៍ថា ការចុះជួបប្រជាពលរដ្ឋដោយផ្ទាល់ និងនាំយកស្បៀងអាហារទៅដល់កន្លែងដែលពួកគាត់កំពុងជួបការលំបាក មិនមែនមានអត្ថន័យត្រឹមតែការផ្តល់ជំនួយជាសម្ភារៈ និងស្បៀងអាហារប៉ុណ្ណោះទេ ប៉ុន្តែជាការផ្តល់កម្លាំងចិត្ត ក្តីសង្ឃឹម និងការបង្ហាញពីការយកចិត្តទុកដាក់ចំពោះប្រជាពលរដ្ឋក្នុងគ្រាលំបាក។

លោកបានបញ្ជាក់ថា «ប្រជាពលរដ្ឋមិនត្រូវបានទុកឱ្យនៅឯកោឡើយ នៅពេលជួបការលំបាក» ដោយសារតែការជួយគ្នា ការចែករំលែក និងសាមគ្គីភាពពីគ្រប់ភាគី គឺជាកម្លាំងដ៏សំខាន់សម្រាប់ជួយឱ្យគ្រួសារដែលរងផលប៉ះពាល់អាចឆ្លងកាត់ស្ថានភាពលំបាកនេះបាន។

លោក កែ សួន សុភាព បានលើកឡើងថា សាមគ្គីភាព និងការយកចិត្តទុកដាក់ពីថ្នាក់ដឹកនាំគ្រប់ជាន់ថ្នាក់ រួមទាំងការចូលរួមរបស់អាជ្ញាធរមូលដ្ឋាន កម្លាំងស្ម័គ្រចិត្ត និងយុវជន គឺជាកត្តាសំខាន់ក្នុងការជួយសម្រាលបន្ទុក និងដោះស្រាយការលំបាកជូនប្រជាពលរដ្ឋដែលទទួលរងផលប៉ះពាល់ដោយគ្រោះទឹកជំនន់។

ជាមួយគ្នានេះ លោកបានអំពាវនាវដល់យុវជន និងសង្គមទាំងមូលឱ្យបន្តចូលរួមក្នុងសកម្មភាពមនុស្សធម៌ ចែករំលែកក្តីស្រឡាញ់ និងគាំទ្រគ្នាទៅវិញទៅមក ជាពិសេសក្នុងពេលដែលប្រជាពលរដ្ឋកំពុងប្រឈមនឹងការលំបាក ដើម្បីរួមគ្នាជួយសម្រាលបន្ទុក និងឱ្យប្រជាពលរដ្ឋអាចឆ្លងផុតវិបត្តិដោយសុវត្ថិភាព។

សកម្មភាពមនុស្សធម៌នេះ ក៏ជាការបង្ហាញពីស្មារតីសាមគ្គីភាព និងការចូលរួមរបស់យុវជនក្នុងការងារសង្គម ជាពិសេសការចុះទៅដល់មូលដ្ឋាន ដើម្បីស្វែងយល់ពីស្ថានភាពជាក់ស្តែង និងឆ្លើយតបតាមតម្រូវការរបស់ប្រជាពលរដ្ឋដែលកំពុងជួបការលំបាក។

ក្នុងឱកាសនោះ សមាជិក សមាជិកា ស.ស.យ.ក. ខេត្តបន្ទាយមានជ័យ និងក្រុងសិរីសោភ័ណ ព្រមទាំងអាជ្ញាធរមូលដ្ឋាន និងកម្លាំងប្រជាការពារភូមិ បានចូលរួមសហការរៀបចំ និងចែកស្បៀងអាហារជូនប្រជាពលរដ្ឋ ដោយមានការចូលរួមពីលោក លោកស្រី អនុប្រធាន ស.ស.យ.ក. ខេត្ត សមាជិកអចិន្ត្រៃយ៍ ប្រធាន ស.ស.យ.ក. តាមវិស័យមន្ទីរ-អង្គភាព ប្រធាន និងអនុប្រធានផ្នែកទាំង៨ ព្រមទាំងអនុប្រធាន សមាជិក សមាជិកា ស.ស.យ.ក. ក្រុងសិរីសោភ័ណ។ស្បៀងអាហារដែលប្រជាពលរដ្ឋមួយគ្រួសារទទួលបាន រួមមាន អង្ករ ៥គីឡូក្រាម ទឹកសុទ្ធ ១យួរ មី ១កេស ឃីត ១ថង់ និងសារុង ១។ ចំណែកអាជ្ញាធរមូលដ្ឋានចំនួន ១១នាក់ ក្នុងម្នាក់ៗទទួលបានអង្ករ ១០គីឡូក្រាម និងទឹកដោះគោជូរ Yeo’s ចំនួន ២យួរ។

សកម្មភាពនេះបានរួមចំណែកជួយសម្រាលតម្រូវការប្រចាំថ្ងៃរបស់ប្រជាពលរដ្ឋក្នុងអំឡុងពេលជួបគ្រោះទឹកជំនន់ ព្រមទាំងបង្កើនភាពកក់ក្តៅ និងទំនុកចិត្តថា នៅក្នុងគ្រាលំបាក ប្រជាពលរដ្ឋមានការយកចិត្តទុកដាក់ និងការចូលរួមជួយពីស្ថាប័ន អង្គការ អាជ្ញាធរ និងយុវជននៅក្នុងសហគមន៍៕

ដោយ ឈុន សារ៉ាត