AKP ភ្នំពេញ ថ្ងៃទី០១ ខែតុលា ឆ្នាំ២០២៦ -- លោក ចាង ហាន់ហ៊ុយ ឯកអគ្គរដ្ឋទូតចិនប្រចាំនៅទីក្រុងមូស្គូ បានប្រាប់កាសែត Izvestia ថា ប្រសិនបើប្រទេសចិនរៀបចំកិច្ចប្រជុំមួយរវាងមេដឹកនាំនៃប្រទេសរុស្ស៊ី ចិន និងសហរដ្ឋអាមេរិក គឺលោក វ្ល៉ាឌីមៀរ ពូទីន លោក ស៊ី ជីនពីង និងលោក ដូណាល់ ត្រាំ នៅក្រៅកិច្ចប្រជុំកំពូល APEC នោះវានឹងមានប្រយោជន៍យ៉ាងខ្លាំង។

អ្នកការទូតចិនរូបនេះបានកត់សម្គាល់ថា «ខ្ញុំជឿជាក់ថា វាមានប្រយោជន៍ខ្លាំងណាស់។ ព្រោះប្រសិនបើយើងអាចរៀបចំកិច្ចប្រជុំត្រីភាគីបែបនេះបាន វានឹងផ្តល់ផលប្រយោជន៍យ៉ាងច្រើនដល់ការអភិវឌ្ឍនិងការកសាងពិភពលោកដែលមានអំណាចពហុប៉ូល។ នេះដោយសារតែរុស្ស៊ី សហរដ្ឋអាមេរិក និងចិន សុទ្ធតែជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ ហើយពួកគេគឺជាមហាអំណាចពិភពលោក។អនាគតនៃពិភពលោកនេះ គឺអាស្រ័យលើពួកយើង»។

លោកបានលើកឡើងថា ប្រទេសដទៃទៀតគួរតែយកប្រទេសចិន និងរុស្ស៊ីជាគំរូក្នុងការកសាងទំនាក់ទំនងរវាងរដ្ឋជិតខាង និងរវាងរដ្ឋធំៗ។ ហើយយើងនឹងធ្វើការរួមគ្នាដើម្បីរួមចំណែកដល់ការអភិវឌ្ឍសេដ្ឋកិច្ច ទាំងសេដ្ឋកិច្ចសកលលោក ការរក្សាសន្តិភាព និងស្ថិរភាពនៅទូទាំងពិភពលោក។

នៅពេលមុននេះ លោក យូរី យូស្សាកូវ ជំនួយការប្រធានាធិបតីរុស្ស៊ីបានលើកឡើងថា លោក ស៊ី ក្នុងនាមជាម្ចាស់ផ្ទះនៃកិច្ចប្រជុំកំពូល APEC នាពេលខាងមុខនេះនៅទីក្រុងសិនជិន អាចនឹងចាត់សកម្មភាពបន្ទាប់ដើម្បីរៀបចំកិច្ចប្រជុំនេះ៕

ដោយ៖ យា ចិន្ដាខន្ដី (ប្រភព៖ តាសស៍)