‎AKP ភ្នំពេញ ថ្ងៃទី១ ខែតុលា ឆ្នាំ២០២៦-- ថ្ងៃដំបូងនៃការចែក និងទទួលពាក្យសុំចូលបំពេញកាតព្វកិច្ចយោធា បានចាប់ផ្តើមផ្លូវការនៅថ្ងៃទី១ ខែតុលា ឆ្នាំ២០២៦ ដោយមានយុវជន និងយុវនារីខ្មែរជាច្រើន បានទៅទទួលពាក្យ ដោយបង្ហាញការចាប់អារម្មណ៍ ព្រមទាំងភាពអង់អាចយ៉ាងផុសផុល។ 
គួរបញ្ជាក់ថាកាលបរិច្ឆេទនៃការចែកពាក្យនេះដែរគឺចាប់ពីថ្ងៃទី១ ដល់ថ្ងៃទី០៩ ខែតុលា ឆ្នាំ២០២៦ និងទទួលពាក្យចាប់ពីថ្ងៃទី១០ ដល់ថ្ងៃទី១៥ ខែតុលា ឆ្នាំ២០២៦។ កន្លែងទទួលពាក្យ និងដាក់ពាក្យ នៅគណៈកម្មាធិការកាតព្វកិច្ចយោធា ក្រុង ស្រុក ខណ្ឌ ដែលជាទីលំនៅរបស់បងប្អូនផ្ទាល់ នោះគឺមូលដ្ឋានកងរាជអាវុធហត្ថ ក្រុង ស្រុក ខណ្ឌ។ នៅរាជធានីភ្នំពេញ និងបណ្តាលខេត្តនានាយុវជនបានបង្ហាញខ្លួន និងបានទៅទទួលយកពាក្យដើម្បីបំពេញក្នុងនាមយុវជនកម្ពុជាក្នុងការបំពេញកាតព្វកិច្ចការពារប្រទេសជាតិ។ 
នៅក្នុងមូលដ្ឋានកងរាជអាវុធហត្ថខណ្ឌឫស្សីកែវ ក្នុងរាជធានីភ្នំពេញ នាព្រឹកថ្ងៃទី១ ខែតុលា ឆ្នាំ ២០២៦នេះ មន្រ្តីកងរាជអាវុធហត្ថប្រចាំការនៅទីនោះបានប្រាប់ថាក្នុងថ្ងៃដំបូងនេះ មានទាំងយុវជន យុវនារីច្រើន ជាបន្តបន្ទាប់បានទៅទទួលពាក្យ។ មន្រ្តីកងរាជអាវុធហត្ថខណ្ឌឫស្សីកែវ រំពឹងដែរថានឹងមានយុវជនកម្ពុជាដ៏អង់អាចក្លាហានបន្តបន្ទាប់ទៀតនឹងមកទទួលយកពាក្យបំពេញកាតព្វកិច្ចយោធា ហើយបានប្រាប់ឱ្យរួសរាន់ ព្រោះថាពេលវេលាមានត្រឹមតែថ្ងៃទី១ ដល់ថ្ងៃទី៩ ខែតុលា ហើយថ្ងៃទទួលពាក្យចាប់ពីថ្ងៃទី១០ ដល់ថ្ងៃទី១៥ ខែតុលា ឆ្នាំ២០២៦ប៉ុណ្ណោះ។ 
គួរបញ្ជាក់ថាយុវជនដែលចូលបំពេញកាតព្វកិច្ចយោធានឹងទទួលបានប្រាក់ឧបត្ថម្ភ៤០ម៉ឺនរៀលក្នុងមួយខែ ព្រមទាំងគោលការរបបនានាជាច្រើនទៀត ដូចយោធិនអាជីពដែរ ក្នុងនោះមានប្រាក់ម្ហូបប្រចាំថ្ងៃ ប្រាក់អាហារបំប៉នបន្ថែមពេលហ្វឹកហាត់ ប្រាក់បំណាច់ឧបត្ថម្ភគ្រួសារ និងកូន របបអង្ករប្រចាំថ្ងៃ របបឯកសណ្ឋានប្រយុទ្ធ និងបរិក្ខារចាំបាច់មួយចំនួនទៀត។ យុវជនចាប់ពីអាយុ ១៧ឆ្នាំដល់២៥ឆ្នាំ ហើយនឹងត្រូវបំពេញ «កាតព្វកិច្ចយោធារយៈពេល២៤ខែ ពោលគឺ២ឆ្នាំ៕ 

ដោយ៖ មករា