AKP ភ្នំពេញ ថ្ងៃទី២០ ខែសីហា ឆ្នាំ២០២៦ — ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម បានអញ្ជើញចូលរួមកិច្ចប្រជុំស្តីពីការធ្វើទំនើបកម្មនៃការគ្រប់គ្រងទិន្នន័យជាតិលើវិស័យធនធានទឹក និងឧតុនិយមបែបឌីជីថល ក្រោមអធិបតីភាពឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ នៅសាលប្រជុំនៃទីស្តីការក្រសួងប្រៃសណីយ៍ និងទូរគមនាគមន៍នាព្រឹកថ្ងៃព្រហស្បតិ៍ទី២០ ខែសីហា ឆ្នាំ២០២៦ នេះ។

ក្នុងកិច្ចប្រជុំ ឯកឧត្តមរដ្ឋលេខាធិការ បានគូសបញ្ជាក់ពីសារៈសំខាន់ជាយុទ្ធសាស្ត្រនៃការគ្រប់គ្រងទិន្នន័យវិស័យធនធានទឹក និងឧតុនិយម ជាពិសេស សមិទ្ធផលរូបវន្តនៃវិស្វកម្មទំនើបកម្មនៃមជ្ឈមណ្ឌលជាតិនៃការគ្រប់គ្រងទិន្នន័យវិទ្យាសាស្ត្រ ដែលជាខួរក្បាលឌីជីថលដ៏មានសក្ដានុពលក្នុងការប្រមូលផ្ដុំ វិភាគ និងព្យាករណ៍ទិន្នន័យអាកាសធាតុប្រកបដោយភាពជាក់លាក់ខ្ពស់បំផុត។

ឯកឧត្តមរដ្ឋលេខាធិការ បានបញ្ជាក់បន្ថែមថា ការបំពាក់បច្ចេកវិទ្យាឌីជីថលចុងក្រោយនឹងក្លាយជាឆ្អឹងខ្នងយុទ្ធសាស្ត្រ ក្នុងការគាំទ្រដល់ស្ថាប័នពាក់ព័ន្ធនានាជាអាទិ៍ក្នុងវិស័យកសិកម្ម អាកាសចរណ៍ស៊ីវិល ទេសចរណ៍ និងការគ្រប់គ្រងគ្រោះមហន្តរាយ។ លើសពីនេះ អត្ថប្រយោជន៍ជាសារវន្តបំផុត គឺសមត្ថភាពក្នុងការផ្ដល់សញ្ញាព្រមានជាមុន ដើម្បីបង្កើនប្រសិទ្ធភាពនៃការកាត់បន្ថយហានិភ័យពីគ្រោះទឹកជំនន់ និងគ្រោះរាំងស្ងួត ដែលជាបញ្ហាប្រឈមចម្បងក្នុងតំបន់ និងសកលលោក៕

ដោយ៖ ពេជ្រ សំអឿន(ប្រភព៖ក្រសួងធនធានទឹក និងឧតុនិយម)