AKP ភ្នំពេញ ថ្ងៃ២០ ខែសីហា ឆ្នាំ២០២៦ -- ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញជាអធិបតីដឹកនាំកិច្ចប្រជុំត្រួតពិនិត្យវឌ្ឍនភាពនៃការអនុវត្តគម្រោងប្រចាំឆមាសទី១ និងលើកទិសដៅការងារឆមាសទី២ ឆ្នាំ២០២៦ ក្រោមក្របខ័ណ្ឌហិរញ្ញប្បទានពីដៃគូអភិវឌ្ឍន៍របស់ក្រសួងអភិវឌ្ឍន៍ជនបទ នារសៀលថ្ងៃព្រហស្បតិ៍ ទី២០ ខែសីហា ឆ្នាំ២០២៦ នេះ នៅទីស្ដីការក្រសួង។
សមាសភាពចូលរួមមាន ឯកឧត្ដមរដ្ឋលេខាធិការប្រចាំការ ឯកឧត្តម លោកជំទាវ លោក លោកស្រី ជាថ្នាក់ដឹកនាំគម្រោង ព្រមទាំងក្រុមការងារលេខាធិការដ្ឋាន នៃគណៈកម្មការគ្រប់គ្រង និងសម្របសម្រួលគម្រោងវិនិយោគសាធារណៈនៃក្រសួងអភិវឌ្ឍន៍ជនបទ។
ឯកឧត្តម ប៉ែន ពេជ្រសាលី រដ្ឋលេខាធិការ និងជាប្រធានលេខាធិការដ្ឋាន បានអានរបាយការណ៍សង្ខេប ស្ដីពីវឌ្ឍនភាពនៃការអនុវត្តគម្រោងក្រោមហិរញ្ញប្បទានដៃគូអភិវឌ្ឍន៍ គិតត្រឹមឆមាសទី១ ឆ្នាំ២០២៦ ដោយបានឆ្លុះបញ្ជាំងឱ្យឃើញថា គម្រោងទាំងអស់ បានអនុវត្តការងារប្រកបដោយស្មារតីបុរេសកម្មខ្ពស់ ក្នុងការសម្រេចឱ្យបាននូវសមិទ្ធផលនានា ដែលជាតម្រូវការរបស់ប្រជាពលរដ្ឋនៅជនបទ។

លោក ឈិត វង្សីវិសុទ្ធ សមាជិកលេខាធិការដ្ឋាន ក៏បានធ្វើបទបង្ហាញដោយបានរំលេចឡើងថា បច្ចុប្បន្ន ក្រសួងអភិវឌ្ឍន៍ជនបទមានគម្រោងកំពុងដំណើរការចំនួន ២២គម្រោង ដោយទទួលបានហិរញ្ញប្បទានពីដៃគូអភិវឌ្ឍន៍ចំនួន ១២ស្ថាប័ន។ ក្នុងនោះ គម្រោងប្រើប្រាស់ឥណទានសម្បទាន ៨៨,៩៨% ជំនួយឥសំណង ៦,១៧% និងបដិភាគរបស់រាជរដ្ឋាភិបាល ៤,៨៨%។ គម្រោងទាំង២២ នោះ ផ្ដោតទៅលើការស្ថាបនាហេដ្ឋារចនាសម្ព័ន្ធជនបទចំនួន ១៥គម្រោង ការផ្គត់ផ្គង់ទឹកស្អាត និងអនាម័យជនបទចំនួន ២គម្រោង និងគម្រោងអភិវឌ្ឍន៍សហគមន៍ជនបទចំនួន ៥គម្រោង។ ដោយឡែកក្រសួងគ្រោងនឹងអនុវត្តគម្រោងថ្មីបន្ថែមទៀតចំនួន ៤គម្រោងផងដែរ។
ឯកឧត្តម ឆាយ ឫទ្ធិសែន បានថ្លែងកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងក្រុមការងារអនុវត្តគម្រោងទាំងអស់ ដែលបានខិតខំប្រឹងប្រែងក្នុងការអនុវត្តនូវតួនាទី និងភារកិច្ចយ៉ាងខ្ជាប់ខ្ជួនប្រកបដោយការទទួលខុសត្រូវខ្ពស់ រហូតសម្រេចបាននូវសមិទ្ធផលយ៉ាងច្រើនគួរជាទីមោទនៈ។

ឯកឧត្តមរដ្ឋមន្ដ្រី បានមានប្រសាសន៍ថា សមិទ្ធផលទាំងនេះពិតជាឆ្លើយតបទៅនឹងសេចក្ដីត្រូវការអភិវឌ្ឍន៍របស់ប្រទេសជាតិ ជាពិសេសបានបំពេញនូវតម្រូវការរបស់ប្រជាជននៅតំបន់ជនបទ ស្របតាមយុទ្ធសាស្ដ្រ និងចក្ខុវិស័យនៃគោលនយោបាយជាតិ ស្ដីពីការអភិវឌ្ឍជនបទឆ្នាំ២០២៥-២០៣៥ ដែលជាការចូលរួមចំណែកសម្រេចនូវយុទ្ធសាស្ត្របញ្ចកោណ ដំណាក់កាលទី១ ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា សំដៅសម្រេចឱ្យបានចក្ខុវិស័យកម្ពុជាឆ្នាំ២០៥០ ជាប្រទេសដែលមានប្រាក់ចំណូលកម្រិតខ្ពស់។

ឯកឧត្តមរដ្ឋមន្ដ្រី បានផ្ដល់នូវអនុសាសន៍សំខាន់ៗមួយចំនួនជូនដល់ថ្នាក់ដឹកនាំគម្រោង និងក្រុមការងារទាំងអស់ ឱ្យបន្ដអនុវត្តការងារឱ្យស្របតាមនីតិវិធីប្រតិបត្តិការស្តង់ដារ និងឱ្យសម្រេចតាមផែនការដែលបានកំណត់ ដោយបន្ដពង្រឹងកិច្ចសហប្រតិបត្តិការឱ្យបានជិតស្និទ្ធជាមួយក្រសួង ស្ថាប័នពាក់ព័ន្ធ និងដៃគូអភិវឌ្ឍន៍នានា ដើម្បីបង្កើនគុណភាព ប្រសិទ្ធភាព និងស័ក្ដិសិទ្ធភាពការងារកាន់តែខ្ពស់៕

ដោយ៖ ពេជ្រ សំអឿន (ប្រភព៖ ក្រសួងអភិវឌ្ឍន៍ជនបទ)