AKP ភ្នំពេញ ថ្ងៃទី២០ ខែសីហា ឆ្នាំ២០២៦ -- នាយករដ្ឋមន្ត្រីចិន លោក លីឈៀង បានចុះហត្ថលេខាលើក្រឹត្យមួយរបស់ក្រុមប្រឹក្សារដ្ឋ ដែលផ្សព្វផ្សាយពីសេចក្តីសម្រេចសម្រាប់កែសម្រួលបទប្បញ្ញត្តិ ស្តីពីការគ្រប់គ្រងមូលនិធិបម្រុងទុកលំនៅដ្ឋាន ដែលនឹងចូលជាធរមាននៅថ្ងៃទី២០ ខែកញ្ញា ឆ្នាំ២០២៦។

យោងតាមសេចក្តីសម្រេចនេះ បានឱ្យដឹងថា វិសាលភាពនៃការដកនិងការប្រើប្រាស់មូលនិធិនេះនឹងត្រូវបានពង្រីក។ ចំពោះអ្នកដែលដកប្រាក់ពីមូលនិធិបម្រុងទុកលំនៅដ្ឋាននេះដើម្បីបង់ថ្លៃជួល កម្រិតសិទ្ធិទទួលបានដែលតម្រូវឱ្យថ្លៃជួលលើសពីសមាមាត្រដែលបានកំណត់នៃប្រាក់ចំណូលប្រាក់ឈ្នួលរបស់គ្រួសារនឹងត្រូវបានដកចេញ។

ប្រាក់សន្សំមូលនិធិបម្រុងទុកលំនៅដ្ឋាន អាចត្រូវបានដកចេញសម្រាប់គោលបំណងថ្មី ក្រោមបទប្បញ្ញត្តិដែលបានកែសម្រួល រួមទាំងការជួសជុលផ្ទះដែលអ្នករួមចំណែករស់នៅ និងការបង់ថ្លៃគ្រប់គ្រងអចលនទ្រព្យសម្រាប់ផ្ទះបែបនេះ។

សេចក្តីសម្រេចនេះក៏បានចែងផងដែរថា បណ្តាញសម្រាប់ការវិនិយោគ និងការប្រើប្រាស់មូលនិធិបម្រុងទុកលំនៅដ្ឋាននឹងត្រូវបានពង្រីកឱ្យសមស្រប ដោយបញ្ជាក់ថា មជ្ឈមណ្ឌលគ្រប់គ្រងមូលនិធិបម្រុងទុកលំនៅដ្ឋាន ត្រូវបានអនុញ្ញាតឱ្យប្រើប្រាស់មូលនិធិដើម្បីទិញមូលបត្រហិរញ្ញវត្ថុដែលផ្តោតលើគោលនយោបាយ។

ដើម្បីបង្កើនប្រសិទ្ធភាពនៃសេវាកម្មគ្រប់គ្រង សេចក្តីសម្រេចនេះក៏គូសបញ្ជាក់ពីកិច្ចខិតខំប្រឹងប្រែងដើម្បីធ្វើឱ្យនីតិវិធីសម្រាប់បុគ្គលិកដាក់ពាក្យសុំដកប្រាក់ពីមូលនិធិនេះ និងដើម្បីកាត់បន្ថយរយៈពេលពិនិត្យសម្រាប់ការដាក់ពាក្យសុំប្រាក់កម្ចីពីមូលនិធិ។

សេចក្តីសម្រេចដែលពង្រឹងការបង្ការ និងគ្រប់គ្រងហានិភ័យនេះ បានចែងថា មជ្ឈមណ្ឌលគ្រប់គ្រងមូលនិធិបម្រុងទុកលំនៅដ្ឋានគួរតែបង្កើតកំណត់ត្រាឥណទានគ្រប់ជ្រុងជ្រោយ ពេញលេញ និងត្រឹមត្រូវ ហើយបញ្ចូលវាទៅក្នុងវេទិកាចែករំលែកព័ត៌មានឥណទានជាតិ។

ក្នុងចំណោមកិច្ចខិតខំប្រឹងប្រែងដើម្បីពង្រីកការគ្របដណ្តប់នៃប្រព័ន្ធសេចក្តីសម្រេចនេះបានបញ្ជាក់ឱ្យច្បាស់ថា ម្ចាស់អាជីវកម្មបុគ្គល បុគ្គលិកក្រៅម៉ោង និងមនុស្សផ្សេងទៀតដែលមានការងារបត់បែន អាចបង់ប្រាក់វិភាគទានដោយស្ម័គ្រចិត្តទៅក្នុងមូលនិធិបម្រុងទុកលំនៅដ្ឋាន និងទទួលបានការគាំទ្រគោលនយោបាយស្របតាមបទប្បញ្ញត្តិ៕

ដោយ៖ យា ចិន្ដាខន្ដី (ប្រភព៖ ឆាយណាដេលី)