AKP ភ្នំពេញ ថ្ងៃទី២០ ខែសីហា ឆ្នាំ២០២៦ -- កាលពីថ្ងៃពុធ នាយករដ្ឋមន្ត្រីចិន លោក លី ឈាង (Li Qiang) បានជួបជាមួយប្រធានាធិបតីនៃសាធារណរដ្ឋអេក្វាឌ័រ លោក ដានីយ៉ែល រ៉យ-ជីលគ្រីស្ទ ណូបូអា អាហ្សីន (Daniel Roy-Gilchrist Noboa Azín) នៅទីក្រុងប៉េកាំង។

លោក លី បាននិយាយថា ប្រទេសចិនមានឆន្ទៈក្នុងការធ្វើការជាមួយប្រទេសអេក្វាឌ័រ ដើម្បីអនុវត្តន៍តាមការណែនាំជាយុទ្ធសាស្ត្ររបស់ប្រមុខរដ្ឋទាំងពីរ បង្កើនការទំនាក់ទំនង និងការសម្របសម្រួល ពង្រឹងទំនុកចិត្តគ្នាទៅវិញទៅមកខាងនយោបាយ ពង្រីកកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមកគ្រប់ជ្រុងជ្រោយ និងបម្រើដល់ការជំរុញទំនើបកម្មនៃប្រទេសទាំងពីរឱ្យកាន់តែប្រសើរឡើង។

លោក លី បានអំពាវនាវដល់ភាគីទាំងពីរឱ្យលើកកម្ពស់ការកសាងរួមគ្នានៃខ្សែក្រវាត់ និងផ្លូវ ដែលមានគុណភាពខ្ពស់ បន្តអនុវត្តន៍កិច្ចព្រមព្រៀងពាណិជ្ជកម្មសេរីចិន-អេក្វាឌ័រ ពង្រីកទំហំនៃពាណិជ្ជកម្មទ្វេភាគីពង្រឹង និងពង្រីកកិច្ចសហប្រតិបត្តិការក្នុងវិស័យប្រពៃណីដូចជា ថាមពល រ៉ែនិងការសាងសង់ហេដ្ឋារចនាសម្ព័ន្ធ និងពង្រឹងកិច្ចសហប្រតិបត្តិការក្នុងវិស័យថ្មីៗ រួមទាំងអ៊ីនធឺណិត 5G និងបញ្ញាសិប្បនិម្មិត។

លោក លី បាននិយាយថា ប្រទេសចិនបានត្រៀមខ្លួនរួចជាស្រេចក្នុងការនាំចូលផលិតផលកសិកម្ម និងអាហារដែលមានគុណភាពខ្ពស់បន្ថែមទៀតពីប្រទេសអេក្វាឌ័រ និងលើកទឹកចិត្តសហគ្រាសចិនដែលមានសមត្ថភាពឱ្យវិនិយោគនៅក្នុងប្រទេសអេក្វាឌ័រ។

លោក ណូបូអា ដែលកំពុងបំពេញទស្សនកិច្ចផ្លូវរដ្ឋនៅប្រទេសចិនបាននិយាយថា ប្រទេសចិនគឺជាដៃគូសហប្រតិបត្តិការដ៏សំខាន់ និងជាមិត្តល្អរបស់ប្រទេសអេក្វាឌ័រ។

លោក ណូបូអា បាននិយាយថា ប្រទេសអេក្វាឌ័រត្រៀមខ្លួនរួចជាស្រេចដើម្បីធ្វើការជាមួយប្រទេសចិន ដើម្បីដោះស្រាយបន្ថែមទៀតនូវផលចំណេញនៃកិច្ចព្រមព្រៀងពាណិជ្ជកម្មសេរីទ្វេភាគី ពង្រឹងកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមកក្នុងវិស័យដូចជាសេដ្ឋកិច្ច និងពាណិជ្ជកម្ម ហិរញ្ញវត្ថុ រ៉ែ ថាមពលកកើតឡើងវិញការសាងសង់ហេដ្ឋារចនាសម្ព័ន្ធ កសិកម្ម និងនេសាទ និងលើកកម្ពស់ការអភិវឌ្ឍជាបន្តបន្ទាប់នៃភាពជាដៃគូយុទ្ធសាស្ត្រដ៏ទូលំទូលាយរវាងប្រទេសចិន និងអេក្វាឌ័រ៕

ដោយ៖ មូល មិនា (ប្រភព៖ ភីបផលដេលី)