AKP បន្ទាយមានជ័យ ថ្ងៃទី០៧ ខែមិថុនា ឆ្នាំ២០២៦ -- នៅព្រឹកថ្ងៃអាទិត្យ ទី៧ ខែមិថុនា ឆ្នាំ២០២៦ នេះ វិទ្យាល័យសិរីសោភ័ណ ស្ថិតក្នុងសង្កាត់ព្រះពន្លា ក្រុងសិរីសោភ័ណ បានក្លាយជាទីតាំងប្រឡងដ៏សំខាន់សម្រាប់សាមណសិស្ស និងសិស្ស១៥៣៥អង្គនាក់ដែលបានមកជួបជុំគ្នាយ៉ាងកុះករ ដើម្បីចូលរួមប្រឡងវិញ្ញាបនបត្រធម៌វិន័យ ថ្នាក់ត្រី ទោ និងឯក សម្រាប់ឆ្នាំសិក្សា ២០២៥-២០២៦។

ក្នុងឱកាសដ៏មានសារៈសំខាន់នេះ លោក យឹម សំណាង អភិបាលរងខេត្តបន្ទាយមានជ័យ តំណាងដ៏ខ្ពង់ខ្ពស់របស់ឯកឧត្តម អ៊ុំ រាត្រី អភិបាលនៃគណៈអភិបាលខេត្ត បានអញ្ជើញជាអធិបតីភាពក្នុងពិធីបើកវិញ្ញាសាប្រឡង ដោយបានដាក់ចេញនូវការក្រើនរម្លឹកយ៉ាងមុតស្រួចដល់សាមណសិស្សនិងសិស្សទាំងអស់។'

លោក យឹម សំណាង បានមានប្រសាសន៍ផ្ដាំផ្ញើទៅកាន់សាមណសិស្សនិងសិស្សថា ការប្រឡងមិនមែនជាការសាកល្បងសមត្ថភាពតែមួយមុខនោះទេ ប៉ុន្តែវាគឺជាកាំជណ្ដើរដ៏សំខាន់មួយសម្រាប់វាស់វែងនូវការតស៊ូ និងចំណេះដឹងដែលបានសន្សំពេញមួយឆ្នាំសិក្សា។ លោកបានគូសបញ្ជាក់យ៉ាងដូច្នេះថាចំណេះដឹងគឺជាអាវុធដ៏មុតស្រួចបំផុតដែលគ្មាននរណាអាចដកហូតបាន។ ក្នុងនាមជាសាមណសិស្ស និងសិស្សដែលជាទំពាំងស្នងឫស្សីក្នុងវិស័យព្រះពុទ្ធសាសនា សូមក្មួយៗទាំងអស់ខិតខំប្រឹងប្រែងបញ្ចេញសមត្ថភាពឱ្យអស់ពីលទ្ធភាព ប្រកបដោយភាពស្មោះត្រង់ និងការទទួលខុសត្រូវខ្ពស់ ដើម្បីទទួលផលផ្លែផ្កាដ៏ល្អប្រសើរជូនខ្លួនឯង គ្រួសារ និងសង្គមជាតិ។

     
បន្ថែមពីលើនេះ លោកអភិបាលរងខេត្ត ក៏បានកោតសរសើរចំពោះការខិតខំប្រឹងប្រែងរបស់ថ្នាក់ដឹកនាំមន្ទីរធម្មការ និងសាសនាខេត្ត ព្រមទាំងគណៈកម្មការមេប្រយោគគ្រប់រូប ដែលបានរៀបចំដំណើរការប្រឡងឱ្យប្រព្រឹត្តទៅដោយរលូន ស្របតាមគោលការណ៍កែទម្រង់ និងភាពយុត្តិធម៌។ លោកបានរំលឹកដល់គណៈកម្មការរៀបចំការប្រឡងឱ្យបន្តរក្សាភាពតឹងរ៉ឹង និងតម្លាភាព ដើម្បីធានាបាននូវគុណភាពនៃការសិក្សាធម៌វិន័យ ដែលជាគ្រឹះដ៏សំខាន់នៃសីលធម៌សង្គម។

គួរបញ្ជាក់ផងដែរថា ការប្រឡងវិញ្ញាបនបត្រធម៌វិន័យថ្នាក់ត្រី ទោ និងឯក នាពេលនេះ គឺជាការវាស់វែងសមត្ថភាពដ៏ចាំបាច់មួយសម្រាប់សាមណសិស្សនិងសិស្សមុននឹងឈានទៅដល់ការបញ្ចប់ឆ្នាំសិក្សា ២០២៥-២០២៦ ដោយជោគជ័យ។ វត្តមានរបស់ថ្នាក់ដឹកនាំខេត្តក្នុងពិធីបើកវិញ្ញាសានេះ បានបង្កើននូវស្មារតី និងទឹកចិត្តដល់សាមណសិស្សឱ្យកាន់តែមានភាពជឿជាក់ក្នុងការប្រឡង ប្រកបដោយភាពម៉ឺងម៉ាត់ និងស្មារតីទទួលខុសត្រូវខ្ពស់៕

ដោយ ឈុន សារ៉ាត