AKP ភ្នំពេញ ថ្ងៃទី១៣ ខែឧសភា ឆ្នាំ២០២៦-- ឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអញ្ជើញជាអធិបតីក្នុងពិធីបើកវគ្គបណ្ដុះបណ្តាល ស្ដីពីភាពជាអ្នកដឹកនាំសុខភាពផ្លូវចិត្តសាធារណៈ (Public Mental Health Leadership Training Workshop) នាថ្ងៃទី១៣ ខែឧសភា ឆ្នាំ២០២៦ ដោយមានការអញ្ជើញចូលរួមពីឯកឧត្តម លោកជំទាវ លោក លោកស្រី ថ្នាក់ដឹកនាំក្រសួង អង្គភាព តំណាងអង្គការសុខភាពពិភពលោកប្រចាំកម្ពុជា និងអ្នកជំនាញការសុខភាពផ្លូវចិត្តរបស់អង្គការសុខភាពពិភពលោក ប្រចាំតំបន់អាស៊ីប៉ាស៊ីហ្វិកខាងលិច ដែគូអភិវឌ្ឍន៍ សរុប១៨២នាក់។

វគ្គបណ្តុះបណ្តាលដ៏មានសារៈសំខាន់នេះរៀបចំឡើងក្នុងគោលបំណង៖ ១) យល់ដឹងស្ដីពីបន្ទុកនៃសុខភាពផ្លូវចិត្តជាសកល ក្នុងតំបន់ និងក្នុងប្រទេស ២) ឆ្លុះបញ្ចាំងស្ថានភាពបច្ចុប្បន្ន និងលទ្ធភាពនៃការអភិវឌ្ឍ និង៣) លើកកម្ពស់ការកសាងក្របខណ្ឌការងារសម្រាប់កិច្ចសម្របសម្រួលអន្តរវិស័យរវាងថ្នាក់ជាតិ និងថ្នាក់ក្រោមជាតិសម្រាប់ភាពជាអ្នកដឹកនាំសុខភាពផ្លូវចិត្ត អភិបាលកិច្ច និងការផ្ដល់សេវា។

ក្នុងឱកាសនោះ ឯកឧត្តមសាស្ត្រាចារ្យរដ្ឋមន្រ្តី បានមានប្រសាសន៍ថា «ភាពជាអ្នកដឹកនាំរឹងមាំមិនត្រឹមតែផ្តោតលើអំណាច និងការសម្រេចចិត្តនោះទេ។ ទន្ទឹមនឹងនោះក៏ផ្តោតលើតុល្យភាពស្មារតី ភាពធន់ ក្តីករុណា និងសមត្ថភាពក្នុងការគាំទ្រអ្នកដទៃក្នុងអំឡុងពេលដ៏លំបាកផងដែរ។ ការការពារសុខភាពផ្លូវចិត្តមានន័យថាលើកកម្ពស់សុខុមាលភាពផ្លូវចិត្តនៅគ្រប់កម្រិត ចាប់ពីបុគ្គល ស្ថាប័ន និងសង្គមទាំងមូល។ ទឹកចិត្តល្អ បង្កើតភាជាអ្នកដឹកនាំល្អមេដឹកនាំរឹងមាំ បង្កើតសហគមន៍កាន់តែរឹងមាំ។»

ទន្ទឹមនឹងនេះ ឯកឧត្តមសាស្រ្តាចារ្យរដ្ឋមន្រ្តី បានសង្កត់ធ្ងន់ថា យើងត្រូវជំរុញការលើកទឹកចិត្តដល់ការចូលរួមទាំងអស់ ដោយយកចិត្តទុកដាក់ និងរួមចំណែកយ៉ាងសកម្មក្នុងការលើកកម្ពស់សុខភាពផ្លូវចិត្តនៅកម្ពុជា។ ក្នុងការចូលរួមសុទ្ធតែជាគ្រូបង្គោលដ៏សំខាន់ ដើម្បីចែករំលែកចំណេះដឹង និងបទពិសោធន៍បន្តដល់គ្នាទៅវិញទៅមក។ ឯកឧត្តមសាស្រ្តាចារ្យរដ្ឋមន្រ្តី បានផ្តល់ពាក្យស្លោក «ភាពជាអ្នកដឹកនាំល្អ ចាប់ផ្តើមពីភាពច្បាស់លាស់ផ្លូវចិត្ត(Good Leadership Starts with Mental Clarity)»។

ឯកឧត្តមសាស្រ្តាចារ្យរដ្ឋមន្រ្តីបានគូសបញ្ជាក់ថា ការវិនិយោគក្នុងការអភិវឌ្ឍភាពជាអ្នកដឹកនាំ គឺជាការវិនិយោគដែលធ្វើឱ្យប្រព័ន្ធសុខាភិបាលមានភាពរឹងមាំទៅអនាគត ជាមួយ និងវិចារណកម្ម សំខាន់ៗគឺ ១) អ្នកដឹកនាំដែលរឹងមាំបង្កើតអង្គភាពរឹងមាំ ២) អង្គភាពរឹងមាំបង្កើតសេវាកាន់តែល្អឡើង ៣) សេវាកាន់តែល្អឡើងធ្វើឱ្យសុខភាពកាន់តែប្រសើរឡើង។ ឯកឧត្តមសាស្រ្តាចារ្យរដ្ឋមន្រ្តី បានគូសរំលឹកនូវចំណុចដែលថ្នាក់ដឹកនាំគួរចៀសវាង គឺ កុំមានវិបត្តិ កុំBurn out កុំជ្រួលច្របល់ កុំប្រកាន់ កុំមានការប៉ះទង្គិច កុំខ្សោយ កុំបែងចែក កុំស្ងាត់ដែរមិនមានភាពជឿនលឿន និងមិនសូវមានទំនាក់ទំនង។

ជាមួយគ្នានេះដែរ ឯកឧត្តមសាស្រ្តាចារ្យរដ្ឋមន្រ្តីបានផ្តល់អនុសាសន៍មួយចំនួនដល់ថ្នាក់ដឹកនាំ មន្ទីរសុខាភិបាលរាជធានី ខេត្ត និងមន្ទីរពេទ្យគ្រប់កម្រិតទាំងអស់៖ ១) ត្រូវខិតខំធ្វើសមាហរណកម្មសេវាសុខភាពផ្លូវចិត្ត ក្នុងប្រព័ន្ធផ្ដល់សេវាសុខភាពឱ្យកាន់តែមានប្រសិទ្ធភាព រួមទាំងការធ្វើសមាហរណកម្មសេវាសុខភាពផ្លូវចិត្តទៅក្នុងការថែទាំសុខភាពបឋម ដោយចាត់ទុកការថែទាំសុខភាពផ្លូវចិត្តជាផ្នែកមួយនៃការថែទាំសុខភាពជាប្រចាំ (Routine health care)។ ២) ត្រូវខិតខំធ្វើសមាហរណកម្មចំណេះដឹង ស្តីពីភាពជាអ្នកដឹកនាំសុខភាពផ្លូវចិត្តសាធារណៈ ទៅក្នុងកម្មវិធីសុខភាពសាធាណៈផ្សេងទៀត។ ៣) ត្រូវខិតខំពង្រីកកម្មវិធីបណ្ដុះបណ្ដាល ស្តីពីសុខភាពផ្លូវចិត្តនៅគ្រប់កម្រិត ដើម្បីឱ្យធនធានសុខភាពផ្លូវចិត្តឱ្យមានលក្ខណៈកាន់តែសម្បូរបែប។

ឯកឧត្តមសាស្រ្តាចារ្យរដ្ឋមន្រ្តីសូមថ្លែងអំណរគុណដល់អង្គការសុខភាពពិភពលោកនៅទីស្នាក់ការកណ្ដាល នៅតំបន់អាស៊ីប៉ាស៊ីហ្វិកខាងលិច និងប្រចាំនៅប្រទេសកម្ពុជា ជាពិសេសឯកឧត្តមបណ្ឌិត Tedros អគ្គនាយកអង្គការសុខភាពពិភពលោក ដែលបានគាំទ្រដល់ការអភិវឌ្ឍសុខភាពផ្លូវចិត្តនៅកម្ពុជា ព្រមទាំងបានចាត់បញ្ចូលប្រទេសកម្ពុជា ជាប្រទេសទី១០ នៃគម្រោងផ្ដួចផ្ដើមជាពិសេសសម្រាប់សុខភាពផ្លូវចិត្ត និងសូមអរគុណដល់ដៃគូសហការទាំងអស់ ដែលបានគាំទ្រកម្មវិធីសុខភាពផ្លូវចិត្ត នៅកម្ពុជា៕

ដោយ ទេស ច័ន្ទសុធារី (ប្រភព៖ ក្រសួងសុខាភិបាល)