AKP កំពង់ស្ពឺ ថ្ងៃទី១៣ ខែឧសភា ឆ្នាំ២០២៦-- ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ និងឯកឧត្តម យឹម សុខុម ប្រធានក្រុមប្រឹក្សាខេត្ត បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីប្រកាសសមាសភាពគណៈកម្មាធិការសមាគមអតីតយុទ្ធជន និងនិវត្តជនកម្ពុជា ក្រុង/ស្រុក ឃុំ/សង្កាត់ ទូទាំងខេត្តកំពង់ស្ពឺ ដោយមានការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រី ជាប្រធានមន្ទីរអង្គភាពជុំវិញខេត្ត កងកម្លាំងទាំង៣ ព្រមទាំងលោកអភិបាលក្រុង/ស្រុក និងមន្ត្រីឃុំ/សង្កាត់ទាំង៩ នៃខេត្តកំពង់ស្ពឺយ៉ាងច្រើនកុះករ។

‎
‎ក្នុងឱកាសនោះ ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ បានលើកឡើងក្នុងការរៀបចំពិធីប្រកាសសមាសភាពនាពេលនេះ គឺជាការឆ្លុះបញ្ចាំងពីការយកចិត្តទុកដាក់ខ្ពស់បំផុតរបស់រាជរដ្ឋាភិបាល ក៏ដូចជារដ្ឋបាលខេត្ត ចំពោះបងប្អូនអតីតយុទ្ធជន និងនិវត្តជន ដែលជាអ្នកមានគុណបំណាច់យ៉ាងធំធេងក្នុងការលះបង់កម្លាំងកាយចិត្ត ដើម្បីបុព្វហេតុជាតិមាតុភូមិ និងការរក្សាសុខសន្តិភាពជូនប្រជាជន។ សមាសភាពគណៈកម្មាធិការដែលបានប្រកាសនាពេលនេះ នឹងដើរតួនាទីយ៉ាងសំខាន់ក្នុងការបន្តតាមដាន សាកសួរសុខទុក្ខ និងជួយដោះស្រាយរាល់ការលំបាកនានារបស់បងប្អូនអតីតយុទ្ធជននៅតាមមូលដ្ឋាន ឱ្យកាន់តែមានប្រសិទ្ធភាព និងទាន់ពេលវេលា។‎

‎ឯកឧត្តមបណ្ឌិតបានសង្កត់ធ្ងន់ថា សន្តិភាព និងការអភិវឌ្ឍដែលយើងកំពុងមាននៅថ្ងៃនេះ គឺបានមកពីការលះបង់សាច់ស្រស់ ឈាមស្រស់ របស់បងប្អូនអតីតយុទ្ធជនយើង។ ដូច្នេះ ការបង្កើតគណៈកម្មាធិការនេះឡើង គឺដើម្បីជាការតបស្នង និងផ្តល់កិត្តិយសដល់អ្នកមានគុណបំណាច់ចំពោះជាតិ ឯកឧត្តមបានណែនាំថា គណៈកម្មាធិការដែលទើបបង្កើតនេះ មិនមែនមានតែឈ្មោះនោះទេ គឺត្រូវចុះឱ្យដល់មូលដ្ឋាន ដើម្បីក្តាប់ឱ្យជាប់នូវរាល់សុខទុក្ខ និងបញ្ហាប្រឈមរបស់បងប្អូនអតីតយុទ្ធជន និងនិវត្តជន ក្នុងគោលដៅជួយដោះស្រាយឱ្យបានទាន់ពេលវេលា និងមានប្រសិទ្ធភាព។

‎
‎ដើម្បីសបញ្ជាក់ពីការយកចិត្តទុកដាក់ខ្ពស់លើជីវភាពរស់នៅរបស់បងប្អូនអតីតយុទ្ធជន ឯកឧត្តមបណ្ឌិត ជាម ច័ន្ទសោភ័ណ និងឯកឧត្តម យឹម សុខុម ក៏បានអញ្ជើញផ្ដល់កិត្តិយសប្រគល់អំណោយ និងថវិកាលើកទឹកចិត្តដល់បងប្អូនអតីតយុទ្ធជនម្នាក់ៗទទួលបានថវិកាចំនួន ៥០,០០០ រៀល ព្រមទាំងអំណោយមួយចំនួនទៀត ដើម្បីជួយសម្រាលដល់ជីវភាពប្រចាំថ្ងៃ។

‎
សកម្មភាពនេះបានធ្វើឱ្យបងប្អូនអតីតយុទ្ធជន និងនិវត្តជនទាំងអស់ មានក្តីរំភើបសប្បាយរីករាយ និងសម្ដែងនូវការដឹងគុណយ៉ាងជ្រាលជ្រៅចំពោះថ្នាក់ដឹកនាំខេត្ត ដែលតែងតែនៅក្បែរ និងមិនដែលបោះបង់ពួកគាត់ចោលក្នុងគ្រប់កាលៈទេសៈ៕

ដោយ៖ ម៉ែន ប៊ុនធីម