AKP កណ្ដាល ថ្ងៃទី១៣ ខែឧសភា ឆ្នាំ២០២៦-- ឯកឧត្តម កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម បានណែនាំដល់កសិករទៀតថា ការឡើងថ្លៃជីគីមីនេះ បងប្អូនជាកសិករគួរនាំគ្នាផលិតជីធម្មជាតិ និងជីកំប៉ុស ដោយខ្លួនឯងក្នុងសហគមន៍ ដើម្បីធានាគុណភាព និងសុវត្ថិភាព ផលិតផលក្នុងស្រុកដល់អ្នកបរិភោគ។ បន្ថែមពីនេះ ដើម្បីដោះស្រាយបញ្ហាកង្វល់នៅក្នុងវិស័យកសិកម្ម ដែលកសិករផលិតបានហើយគ្មានទីផ្សារនោះ សមាគមបណ្តាញកសិករតេជោមានតួនាទីសំខាន់ៗដូចជា ធ្វើជាស្ពានចម្លងដ៏រឹងមាំ តភ្ជាប់ដ៏សំខាន់សម្រាប់កសិករ ដើម្បីសម្រេចបាននូវការអភិវឌ្ឍន៍ប្រកបដោយចីរភាព និងភ្ជាប់ទៅប្រភពហិរញ្ញវត្ថុ (ឥណទាន) ការភ្ជាប់ទៅបច្ចេកទេស ទីផ្សារ និងអ្នកជំនាញជួយកសិករឱ្យទទួលបាននូវ បច្ចេកវិទ្យាកសិកម្មទំនើបៗ លើសពីនេះ ការភ្ជាប់ទៅទីផ្សារតម្លៃកសិផល ផ្តល់ព័ត៌មានទីផ្សារច្បាស់លាស់ និងជួយសម្របសម្រួលការលក់កសិផល ធានាឱ្យកសិករលក់បានក្នុងតម្លៃល្អប្រសើរ និងសមរម្យ ចៀសវាងការគាបសង្កត់តម្លៃ។

ឯកឧត្តមបណ្ឌិត កៅ ថាច មានប្រសាសន៍ដូចនេះ នៅថ្ងៃទី១៣ ខែឧសភា ឆ្នាំ២០២៦ នៅពេលឯកឧត្តម និងលោក ខុន សេរីរដ្ឋា អភិបាលរងខេត្តកណ្តាលបានអញ្ជើញជួបសំណេះសំណាល និងសួរសុខទុក្ខជាមួយប្រជាកសិករ ក្នុងស្រុកកៀនស្វាយ ខេត្តកណ្តាល ដោយមានការចូលរួមពី អាជ្ញាធរស្រុក មន្ទីរកសិកម្មខេត្ត លោកមេឃុំ មន្រ្តីកសិកម្មឃុំ និងប្រជាកសិករសរុបចំនួន ៥៦៥នាក់។

ឯកឧត្តមបណ្ឌិត ប្រតិភូរាជរដ្ឋាភិបាលទទួលបន្ទុក មានប្រសាសន៍ទៀតថា ការជួបសំណេះសំណាលនាឱកាសនេះមានគោលបំណងចង់បង្ហាញពីសមាគមបណ្តាញកសិករតេជោដែលជាសមាគមថ្មីមួយ ជូនដល់បងប្អូនប្រជាកសិករ ក្នុងនោះសមាគមនឹងជួយសម្របសម្រួលដល់កសិករ ដោយធ្វើជាស្ពានចម្លងកសិផលដែលផលិតបានហើយភ្ជាប់ទៅនិងទីផ្សាររួមមាន បច្ចេកទេស ទីផ្សារ ផ្នែកហិរញ្ញប្បទាន។ កម្ពុជាមិនអាចគេចចេញពីវិស័យកសិកម្មបានទេ ក្នុងគ្រាដែលពិភពលោកកំពុងតែបាត់បង់សណ្តាប់ធ្នាប់ ប៉ុន្តែអ្វីដែលយើងបារម្ភគឺសន្តិសុខស្បៀងក្នុងស្រុក រួមមានវិស័យកសិកម្មតែម្តង ពីព្រោះថា វិស័យកសិកម្មគឺជាស្បៀងដែលបានផ្សារភ្ជាប់គ្នាក្នុងការចញ្ចឹមជីវិតមនុស្សគ្រប់គ្នា ដូច្នេះយើងត្រូវខិតខំប្រឹងប្រែងគ្រប់វិស័យទាំងការវិនិយោគលើវិស័យកសិកម្ម រាល់ការលំបាកនិងបញ្ហាប្រឈមគឺជាឱកាសខ្ពស់សម្រាប់វិស័យកសិកម្មត្រូវការបង្កើនការផលិតដើម្បីផ្គត់ផ្គង់ក្នុងស្រុកជំនួសការនាំចូល ខណៈដែលពិភពលោកកំពុងខ្វះស្បៀង ដោយសារគ្រោះធម្មជាតិ តម្លៃប្រេងឥន្ធនៈ ជីឡើងថ្លៃ ធ្វើឱ្យថ្លៃផលិតក្នុងវិស័យកសិកម្មបានហក់ឡើងខ្ពស់ផងដែរ។

លោក ខុន សេរីរដ្ឋា អភិបាលរងខេត្តកណ្តាល បានឱ្យដឹងថា ខេត្តកណ្តាលមានប្រជាជនសរុប ១ ៣៨៤ ៤០០ នាក់ អ្នកប្រកបរកសិកម្មមានចំនួន ២៩ភាគរយ ផ្នែកសេវាកម្ម ២៦ភាគរយនិងផ្នែកឧស្សាហកម្ម-សិប្បកម្ម ៤៥ភាគរយអ្នកធ្វើកសិកម្មសរុប ២៥៨ ៩៦២នាក់ មុខរបរធ្វើស្រែមានចំនួន ២១,៨ភាគរយដាំដំណាំចំការរយៈពេលខ្លី និងវែង ១៤,៦ភាគរយអ្នកដាំដំណាំបន្លែ ៤ភាគរយអ្នកចិញ្ចឹមសត្វ ២,៤ភាគរយ និងអ្នកនេសាទ ២,៧ភាគរយ ដែលវិស័យកសិកម្មអាចរកចំណូលគិតជាមធ្យមចំនួន ៣៩៣ លានដុល្លារក្នុងមួយឆ្នាំ ដែលអាចចូលរួមចំណែកកាត់បន្ថយភាពក្រីក្រនៅក្នុងខេត្តកណ្តាលមកត្រឹមតែ ៤,១៦ភាគរយ។ វិស័យកសិកម្ម បានរួមចំណែកក្នុងការកសាងសេដ្ឋកិច្ច រក្សាបាននូវសន្តិសុខស្បៀង ដែលអាចផ្គង់ផ្គង់តម្រូវការក្នុងខេត្ត និងនៅសល់អាចនាំចេញទៅខេត្តផ្សេងៗ ពិសេសរាជធានីភ្នំពេញទៀតផង៕
ដោយ ណយ នឿន (ប្រភព៖ រដ្ឋបាលខេត្តកណ្តាល)