AKP កំពង់ធំ ថ្ងៃទី១៣ ខែឧសភា ឆ្នាំ២០២៦-- សម្តេចព្រះពុទ្ធជ័យមុនី បណ្ឌិត ឃឹម សន សម្ដេចព្រះសង្ឃនាយករងទី៣ ព្រះអគ្គាធិការរង និងជាព្រះរាជតំណាងដ៏ខ្ពង់ខ្ពស់សម្ដេចព្រះមហាសុមេធាធិបតី អំ លីមហេង សម្ដេចព្រះសង្ឃនាយក គណៈមហានិកាយនៃព្រះរាជាណាចក្រកម្ពុជា និងជាព្រះអគ្គាធិការនៃអគ្គាធិការដ្ឋានពុទ្ធិកសិក្សាជាតិបាននិមន្តជាព្រះអធិបតីដ៏ខ្ពង់ខ្ពស់ក្នុងពិធីបើកបវេសនកាលពុទ្ធិកសិក្សា ឆ្នាំ២០២៦-២០២៧ នៅទូទាំងខេត្តកំពង់ធំដោយមានការនិមន្ត និងអញ្ជើញចូលរួមជាអធិបតីពីសំណាក់ លោកជំទាវ នួន ប៊ុនណា រដ្ឋលេខាធិការ តំណាង ឯកឧត្តមបណ្ឌិត ចាយ បូរិន រដ្ឋមន្ត្រីក្រសួងធម្មការ និងសាសនា និងឯកឧត្តម នួន ផារ័ត្ន អភិបាល នៃគណៈអភិបាលខេត្តកំពង់ធំ ព្រះទេពសត្ថា សៀង សុខ ព្រះមេគណខេត្តកំពង់ធំ ព្រះមន្ត្រីសង្ឃ ព្រះសង្ឃ ឯកឧត្តម លោកជំទាវ គណៈគ្រប់គ្រង លោកគ្រូ អ្នកគ្រូ សមណសិស្ស និងសប្បុរសជន សរុបចំនួន ៧១៧អង្គ/នាក់នៅវត្តឥន្ទ្រីយ៍សំវរៈ (វត្តកំពង់ធំ) ក្រុងស្ទឹងសែន ខេត្តកំពង់ធំ។

ក្នុងឱកាសនោះ ឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ បានផ្តល់ទស្សនៈមួយចំនួន សម្រាប់ការអនុវត្តទៅមុខរបស់ផ្នែកពុទ្ធចក្ររួមមាន៖ ១. គ្រប់វត្តអារាមទូទាំងខេត្ត សូមឱ្យបន្តនូវសាមគ្គីភាព ដើម្បីធ្វើជាគំរូល្អដល់ពុទ្ធសាសនិកសំដៅលើកកម្ពស់ការប្រតិបត្តិព្រះពុទ្ធសាសនា។ ២. ស្នើឱ្យព្រះមេគណ ព្រះមន្រ្តីសង្ឃ ព្រះចៅអធិការ គណៈគ្រប់គ្រងសាលាទាំងអស់ផ្សព្វផ្សាយទៅដល់ប្រជាពលរដ្ឋឱ្យចូលរួមអនុវត្តគោលនយោបាយភូមិ-ឃុំ-សង្កាត់មានសុវត្ថិភាព គ្មានបទល្មើសលួច ឆក់ប្លន់ គ្រឿងញៀន ល្បែង ស៊ីសងខុសច្បាប់ និងបទល្មើសគ្រប់ប្រភេទ។មានសណ្តាប់ធ្នាប់សាធារណៈល្អ ជាពិសេស គ្មានគ្រោះថ្នាក់ចរាចរណ៍ គ្មានអំពើអនាចារ គ្មានការជួញដូរមនុស្ស។ ៣. ស្នើសុំដល់ព្រះគ្រូចៅអធិការ លោកអាចារ្យ គណៈកម្មការគ្រប់វត្ត មេត្តាបន្តជួយជ្រោមជ្រែង ឧបត្ថម្ភ គាំទ្រ វិស័យពុទ្ធិកសិក្សាឱ្យបានខ្លាំងក្លា ជួយជំរុញឱ្យកុលបុត្រខ្មែរ ដែលបានបួសហើយឱ្យបានចូលសិក្សាក្នុងប្រព័ន្ធពុទ្ធិកសិក្សា ដើម្បីឱ្យមានធនធានបញ្ញវន្តសង្ឃកាន់តែច្រើន ទ្រទ្រង់ព្រះពុទ្ធសាសនាឱ្យបានស្ថិតស្ថេរយូរអង្វែងតរៀងទៅ។

ព្រះទេពសត្ថា សៀង សុខ ព្រះមេគណខេត្តកំពង់ធំ មានថេរដីកាថា លទ្ធផលដែលទទួលបានក្នុងឆ្នាំសិក្សា២០២៥-២០២៦ កន្លងទៅពិតជាបង្ហាញយ៉ាងច្បាស់របស់សាលាគណខេត្តកំពង់ធំ មន្ទីរធម្មការ និងសាសនាខេត្ត បានខិតខំប្រឹងប្រែងរាល់កិច្ចការងារនៅចំពោះមុខ នេះជាមោទនភាពក្នុងការឆ្លុះបញ្ចាំងអំពីដំណើរការរីកចម្រើនលើវិស័យពុទ្ធិកសិក្សា ដែលជាថ្នាលបណ្តុះបណ្តាលធនធានព្រះសង្ឃ។ រាជរដ្ឋាភិបាលកំពុងធ្វើកំណែទម្រង់យ៉ាងស៊ីជម្រៅលើគ្រប់វិស័យពុទ្ធសាសនាបញ្ហាប្រឈមមួយចំនួនរួមមាន៖ កង្វះគ្រូក្របខណ្ឌនៅគ្រប់កម្រិតពុទ្ធិកសិក្សា។ ខ្វះសៀវភៅឯកសារសិក្សាស្រាវជ្រាវគ្រប់កម្រិត សមណសិស្ស សិស្ស ភាគច្រើនទៅប្រឡងសាលាបំពេញវិជ្ជាឬ(សឹក)។

សម្តេចព្រះពុទ្ធជ័យមុនី បណ្ឌិត ឃឹម សន មានថេរដីកាថាសមណសិស្សគួរខិតខំសិក្សារៀនសូត្របន្ថែមទៀត ដើម្បីបង្កើនចំណេះដឹង សីលធម៌ និងប្រាជ្ញា។ ការរៀនសូត្រជាអំពើដ៏ប្រសើរ ដែលជួយឱ្យមានអនាគតភ្លឺស្វាង និងអាចបម្រើសង្គមជាតិបានយ៉ាងល្អប្រសើរ។ ដូច្នេះ ត្រូវមានភាពអត់ធ្មត់ ព្យាយាម និងយកចិត្តទុកដាក់ក្នុងការសិក្សាជានិច្ច។

ការស្រាវជ្រាវនឹងជួយឱ្យទទួលបានចំណេះដឹងថ្មីៗ ទូលំទូលាយ និងអាចយកទៅអនុវត្តក្នុងជីវភាពប្រចាំថ្ងៃបានយ៉ាងមានប្រយោជន៍។ អ្នកដែលខិតខំរៀនសូត្រជានិច្ច នឹងទទួលបានភាពជោគជ័យ និងក្លាយជាបុគ្គលមានតម្លៃសម្រាប់សង្គម និងព្រះពុទ្ធសាសនា។ នៅតាមវត្តអារាមនីមួយៗ សូមឱ្យមានតុបតែងកែមអរបរិស្ថានឱ្យបានស្រស់ស្អាត ដើម្បីទាក់ទាញពុទ្ធបរិស័ទ និងសប្បុរសជនចូលមកគោរពបូជា និងជួយកសាងនៅហេដ្ឋារចនាសម្ព័ន្ធបន្ថែមទៀតឱ្យវិស័យព្រះពុទ្ធសាសនាមានការរីកចម្រើន៕

ដោយ ស៊ុម វណ្ណា