AKP កំពង់ធំ ថ្ងៃទី១៣ ខែឧសភា ឆ្នាំ២០២៦-- លោក សាយ គឹមឡម អភិបាលស្រុកស្ទោង បានលើកទឹកចិត្តដល់សិស្សានុសិស្សត្រូវខិតខំសិក្សារៀនសូត្រឱ្យអស់ពីលទ្ធភាពកុំយកកត្តាជីវភាព ធ្វើជាបញ្ហានាំឱ្យប៉ះពាល់ដល់ការសិក្សា និងជោគវាសនាអនាគតខ្លួន ក្នុងឱកាសដែលលោក និងសហការី អញ្ជើញចូលរួមក្នុងពិធីបុណ្យផ្កាប្រាក់សាមគ្គី និងអប់រំសីលធម៌ចរិយាធម៌ដល់សិស្សានុសិស្សវិទ្យាល័យ ហ៊ុន សែន រុងរឿងស្ថិតនៅក្នុងឃុំរុងរឿង ស្រុកស្ទោង ខេត្តកំពង់ធំ នាព្រឹកថ្ងៃទី១៣ ខែឧសភា ឆ្នាំ២០២៦។

លោកអភិបាលស្រុកបានបញ្ជាក់ថា សិស្សានុសិស្សគ្រប់រូបត្រូវមានចក្ខុវិស័យវែងឆ្ងាយ និងច្បាស់លាស់ជាពិសេសត្រូវត្រៀមខ្លួនឱ្យបានមាំទាំបំផុតមុនឈានជើងចូលរៀនមហាវិទ្យាល័យនិងសាលាវិជ្ជាជីវៈឯកទេស ប្រកបដោយភាពជឿជាក់ខ្ពស់ ហើយត្រូវតែមានភាពវៃឆ្លាត និងបត់បែនគ្រប់កាលៈទេសៈសមស្របតាមគោលនយោបាយរបស់រាជរដ្ឋាភិបាល។

លោកអភិបាលស្រុកបានអំពាវនាវបន្ថែមទៀតដល់ប្រជាពលរដ្ឋក្នុងមូលដ្ឋាន ជាពិសេសសិស្សានុសិស្ស និងយុវជនត្រូវបន្តពហិការដាច់ខាតរាល់ទំនិញសៀម កុំឱ្យមានវត្តមាន និងចរាចរណ៍នៅក្នុងទីផ្សារប្រទេសកម្ពុជា និងលើកកម្ពស់ផលិតផលក្នុងស្រុកដើម្បីជីវភាពប្រជាពលរដ្ឋក្នុងមូលដ្ឋាន និងសេដ្ឋកិច្ចប្រទេសជាតិយើង។

លោក សាយ គឹមឡម អភិបាលស្រុកស្ទោង មានជំនឿជឿជាក់យ៉ាងសុទិដ្ឋិនិយមថា ក្រោយពីអប់រំសីលធម៌ ចរិយាធម៌នេះទៅសិស្សានុសិស្សគ្រប់រូបនៃវិទ្យាល័យ ហ៊ុន សែន រុងរឿង យុវជននៅក្នុងមូលដ្ឋាន រៀបចំអភិវឌ្ឍខ្លួនជាសិស្សានុសិស្ស និងយុវជនគំរូ ចាកផុតពីអបាយមុខទាំងពួង ហើយខិតខំសិក្សារៀនសូត្របន្ថែមទៀត ជាពិសេសត្រូវគោរពច្បាប់ចរាចរណ៍ឱ្យបានខ្ជាប់ខ្ជួន ដើម្បីសុខសុវត្ថិភាពផ្ទាល់ខ្លួន និងអ្នកធ្វើដំណើនៅលើផ្លូវសាធារណៈ នៅឱ្យឆ្ងាយពីគ្រឿងញៀន ក្មេងទំនើងដែលអាចនាំឱ្យប៉ះពាល់ និងខូចវាសនាអនាគតខ្លួន។

សូមបញ្ជាក់ថា នៅក្នុងឱកាសនោះ លោកអភិបាលស្រុកស្ទោង និងសហការីបានចូលរួមបុណ្រផ្កាប្រាក់សាមគ្គីនេះនូវបច្ច័យចំនួន៤លាន៧សែនរៀល និង១០០ដុល្លាសហរដ្ឋអាមេរិក៕
ដោយ ស៊ុម វណ្ណា