AKP បន្ទាយមានជ័យ ថ្ងៃទី១៣ ខែឧសភា ឆ្នាំ២០២៦-- ក្នុងស្មារតីសង្គ្រោះបន្ទាន់ និងយន្តការ «មិនទុកនរណាម្នាក់ចោល» នារសៀលថ្ងៃទី១៣ ខែឧសភា ឆ្នាំ២០២៦ ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត អមដំណើរដោយលោកជំទាវ នួម សុភ័ណ អនុប្រធានកិត្តិយសសាខា ព្រមទាំងក្រុមការងារ បានចុះជួបសំណេះសំណាល និងនាំយកអំណោយមនុស្សធម៌ រួមមានស័ង្កសី និងសម្ភារឧបភោគបរិភោគ ផ្តល់ជូនប្រជាពលរដ្ឋចំនួន៥៤គ្រួសារ ដែលបានរងគ្រោះដោយបាតុភូតខ្យល់កន្ត្រាក់ នៅក្នុងស្រុកអូរជ្រៅ។

ក្នុងឱកាសជួបផ្ទាល់ជាមួយគ្រួសាររងគ្រោះ ឯកឧត្តម អ៊ុ រាត្រី បានពាំនាំនូវប្រសាសន៍សាកសួរសុខទុក្ខ និងសេចក្ដីនឹករឭកយ៉ាងជ្រាលជ្រៅបំផុតពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និង ឯកឧត្តម ឌិត ទីណា ប្រធានកិត្តិយសសាខាខេត្ត ដែលជានិច្ចកាល សម្ដេច និងឯកឧត្តម តែងតែយកចិត្តទុកដាក់ខ្ពស់ចំពោះសុខទុក្ខ និងការលំបាករបស់ប្រជាពលរដ្ឋនៅគ្រប់ទីកន្លែង ដោយមិនប្រកាន់និន្នាការនយោបាយ ឬស្រទាប់វណ្ណៈឡើយ។

ឯកឧត្តមប្រធានគណៈកម្មាធិការសាខាខេត្តបានសង្កត់ធ្ងន់ពីបេសកកម្មស្នូលរបស់កាកបាទក្រហមថា«ទោះស្ថិតក្នុងកាលៈទេសៈណាក៏ដោយ កាកបាទក្រហមកម្ពុជាតែងតែនៅក្បែរបងប្អូនជានិច្ច ស្របតាមពាក្យស្លោក កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា មិនទុកនរណាម្នាក់ចោល»។

ក្រៅពីការផ្តល់សម្ភារៈសម្រាប់ជួសជុលផ្ទះសម្បែងឡើងវិញ ឯកឧត្តមអភិបាលខេត្តក៏បានផ្តល់នូវទស្សនទានសំខាន់ៗ ដើម្បីជួយឱ្យពលរដ្ឋអាចងើបចេញពីការលំបាក និងពង្រឹងសេដ្ឋកិច្ចគ្រួសារប្រកបដោយនិរន្តរភាព រួមមានការបង្កបង្កើនផលកសិកម្មជំរុញឱ្យពលរដ្ឋខិតខំដាំដុះបន្លែបង្ការ និងចិញ្ចឹមសត្វតាមលទ្ធភាពនៅជុំវិញផ្ទះ ដើម្បីកាត់បន្ថយការចំណាយប្រចាំថ្ងៃ និងអាចបង្កើតប្រភពចំណូលបន្ថែមសម្រាប់គ្រួសារ។ការពង្រឹងមុខរបរ លើកទឹកចិត្តឱ្យប្រកបមុខរបរតាមជំនាញរៀងៗខ្លួនឱ្យអស់លទ្ធភាព ដើម្បីលើកស្ទួយជីវភាពឱ្យកាន់តែប្រសើរឡើងបន្ទាប់ពីគ្រោះធម្មជាតិ។ការថែទាំសុខភាព និងអនាម័យ សង្កត់ធ្ងន់លើគោលការណ៍ «រស់នៅស្អាត ហូបស្អាត និងផឹកស្អាត» ដើម្បីការពារជំងឺដង្កាត់ផ្សេងៗ ព្រោះសុខភាពគឺជាមូលដ្ឋានគ្រឹះនៃកម្លាំងដើម្បីប្រកបការងារចិញ្ចឹមជីវិត។

ឆ្លៀតក្នុងឱកាសនោះ ឯកឧត្តម អ៊ុ រាត្រី ក៏បានអំពាវនាវយ៉ាងទទូចដល់ប្រជាពលរដ្ឋទាំងអស់ ឱ្យបង្កើនការប្រុងប្រយ័ត្នខ្ពស់ចំពោះបាតុភូតធម្មជាតិដែលកំពុងមានការប្រែប្រួលខ្លាំង និងបានណែនាំឱ្យពលរដ្ឋស្វែងរកជម្រកដែលមានសុវត្ថិភាពភ្លាមៗនៅពេលមានភ្លៀងខ្យល់ខ្លាំង បិទឧបករណ៍អគ្គិសនី និងប្រុងប្រយ័ត្នចំពោះគ្រោះថ្នាក់ដោយសារផ្គរ រន្ទះ ដើម្បីការពារអាយុជីវិត និងទ្រព្យសម្បត្តិឱ្យបានគង់វង្ស៕

ដោយ ឈុន សារ៉ាត