AKPតាកែវ ថ្ងៃទី២៤ ខែមេសាឆ្នាំ២០២៦--លោក កេត ម៉ៅ អភិបាលនៃគណៈអភិបាលស្រុកត្រាំកក់ បានអញ្ជើញជាអធិបតីក្នុងពិធី បិទផ្សាយជាសាធារណៈនូវឯកសារនៃការវិនិច្ឆ័យ លទ្ធផលនៃការវាស់វែងដីធ្លីមានលក្ខណៈជាប្រព័ន្ធ ជូនដល់បងប្អូនប្រជាពលរដ្ឋ នៅក្នុងភូមិដំណាក់ខ្លុងឃុំអូរសារាយស្រុកត្រាំកក់ខេត្តតាកែវ។

ពិធីនេះដែរក៏មានការអញ្ជើញចូលរួមពីសំណាក់ លោកប្រធានការិយាល័យ និងតំណាងអង្គភាពពាក់ព័ន្ធជុំវិញស្រុក លោកស្រីមេឃុំស្ដីទីឃុំអូរសារាយ  ជំទប់ ក្រុមប្រឹក្សាឃុំ មេភូមិ ចាស់ព្រឹទ្ធាចារ្យ ព្រមទាំងបងប្អូនប្រជាពលរដ្ឋជាម្ចាស់ក្បាលដីចូលរួមជាច្រើនរូបផងដែរ។ពិធីនេះរៀបចំឡើងនៅក្នុងបរិវេណសាលាឃុំអូរសារាយស្រុកត្រាំកក់ខេត្តតាកែវ កាលពីថ្ងៃទី២៣ខែមេសាឆ្នាំ២០២៦។

ថ្លែងសំណេះសំណាលក្នុងពិធីនោះ លោក កេត ម៉ៅ អភិបាលនៃគណៈអភិបាលស្រុកត្រាំកក់ បានបញ្ជាក់ថា ការបិទផ្សាយឯកសារវិនិច្ឆ័យនាពេល នេះ គឺជាដំណាក់កាលយ៉ាងសំខាន់ ក្នុងកិច្ចដំណើរការចុះបញ្ជីដីធ្លីមានលក្ខណៈជាប្រព័ន្ធ ដើម្បីធានានូវតម្លាភាព និងភាពត្រឹមត្រូវជូនប្រជាពលរដ្ឋ។

លោកអភិបាលស្រុកត្រាំកក់ បានណែនាំដល់បងប្អូនប្រជាពលរដ្ឋ ដែលមានក្បាលដីក្នុងភូមិដំណាក់ខ្លុងទាំងអស់ ត្រូវអញ្ជើញមកពិនិត្យទិន្នន័យឱ្យបានច្បាស់លាស់ នូវព័ត៌មានដែលបានបិទផ្សាយរួមមាន ឈ្មោះម្ចាស់ដី ស្ថានភាពគ្រួសារ ទំហំដី ព្រំប្រទល់ក្បាលដី ប្រភេទដី និងការប្រើប្រាស់ ។

លោក កេត ម៉ៅ បានបន្តថាការបិទផ្សា យនេះមានរយៈពេល១៥ថ្ងៃ  គិតចាប់ពីថ្ងៃទី23ខែមេសាឆ្នាំ2026នេះតទៅ។ដើម្បីទុកឱកាសឱ្យម្ចាស់ក្បាលដីពិនិត្យផ្ទៀងផ្ទាត់ ឬតវ៉ាកែតម្រូវក្នុងករណីមានកំហុសឆ្គងបច្ចេកទេសណាមួយ។មុននឹងមន្ទីររៀបចំដែនដីនគរូបនីយកម្មសំណង់និងសុរិយោដីខេត្តតាកែវ រៀបចំបែបបទចេញប័ណ្ណកម្មសិទ្ធិ(ប្លង់រឹង)ជា ស្ថាពរ។     

លោក កេត ម៉ៅ អភិបាលស្រុកត្រាំកក់ ក៏បានផ្ដាំផ្ញើដល់អាជ្ញាធរមូលដ្ឋានឃុំ- ភូមិ និងក្រុមការងារបច្ចេកទេស ត្រូវបង្កលក្ខណៈងាយស្រួល និងជួយពន្យល់ណែនាំដល់ប្រជាពលរដ្ឋឱ្យបានយល់ច្បាស់។ដើម្បីឱ្យដំណើរការនេះប្រព្រឹត្តទៅដោយរលូន និងទទួលបានជោគជ័យតាមផែនការដែលបានកំណត់៕

ដោយ៖អ៊ុច សៀង