AKPតាកែវ ថ្ងៃទី១៩ខែមីនា ឆ្នាំ២០២៦--លេខាធិការត្រួតពិនិត្យគ្រឿងញៀនខេត្តតាកែវ បើកកិច្ចប្រជុំពិភាក្សាលើការចាត់តាំងអនុវត្តយុទ្ធនាការ ប្រយុទ្ធប្រឆាំងគ្រឿងញៀនខុសច្បាប់លើកទី១១។

ពិធីនេះរៀបចំឡើងនៅសាលប្រជុំរដ្ឋបាលខេត្តតាកែវ កាលពីថ្ងៃទី១៨ខែមីនាឆ្នាំ២០២៦ដោយអញ្ជើញជាអធិបតីក្នុងពិធីនោះដោយ លោក យង់ សុវឌ្ឍនា អភិបាលរងនៃគណៈអភិបាលខេត្តតាកែវ និងជាប្រធានលេខាធិការដ្ឋានត្រួតពិនិត្យគ្រឿងញៀនខេត្តតាកែវ ព្រមទាំងមានការអញ្ជើញចូលរួមពី លោក លោកស្រីប្រធាន អនុប្រធានមន្ទីរអង្គភាពជុំវិញខេត្ត អភិបាល អភិបាលរងក្រុង-ស្រុក តំណាងអយ្យការអមសាលាដំបូងខេត្តតាកែវ មន្ត្រីរាជការ និងកងកម្លាំងប្រដាប់អាវុធ ចូលរួមជាច្រើនរូបផងដែរ។

ថ្លែងសំណេះណាលក្នុងពិធីនោះ លោក យង់ សុវឌ្ឍនា អភិបាលរងនៃគណៈអភិបាលខេត្តតាកែវ និងជាប្រធានលេខាធិការដ្ឋានត្រួតពិនិត្យគ្រឿងញៀនខេត្តតាកែវ បានបង្ហាញនូវជំនឿយ៉ាងមុតមាំ តាមរយៈការដាក់ចេញនូវផែនការ សម្រាប់យុទ្ធនាការលើកទី១១នេះ ខេត្តតាកែវនឹងបន្តទទួលបាននូវជោគជ័យ កាន់តែត្រចះត្រចង់បន្ថែមទៀត ដើម្បីសុខសុវត្ថិភាពជូនប្រជាពលរដ្ឋ។

លោក យង់ សុវឌ្ឍនា បានមានប្រសាសន៍បន្តថា បញ្ហាគ្រឿងញៀនគឺជាបញ្ហាសង្គមដ៏រ៉ាំរ៉ៃនិងស្មុគស្មាញ ដែលបង្កផលវិបាកជាច្រើន ដល់សង្គមជាតិនិងមនុស្សទូទៅ។ដូច្នេះការផ្សព្វផ្សាយឲ្យប្រជាពលរដ្ឋ យល់កាន់តែច្បាស់ពីផលប៉ះពាល់នៃគ្រឿងញៀន គឺជារឿងសំខាន់បំផុតដើម្បីការពារពួកគាត់ ជាពិសេសយុវជន មិនឲ្យធ្លាក់ខ្លួនក្នុងអន្លង់នៃគ្រឿងញៀន។

លោក យង់ សុវឌ្ឍនា ក៏បានជំរុញឲ្យអាជ្ញាធរមូលដ្ឋាន បង្កើនការផ្សព្វផ្សាយអត្ថប្រយោជន៍នៃAPP Neo Track។ហើយត្រូវបន្តចុះត្រួតពិនិត្យជាប្រចាំ នៅតាមទីតាំងផ្ទះសំណាក់ ក្លឹបកម្សាន្ត ហាងខារ៉ាអូខេ តាមច្រកព្រំដែន និងកន្លែងកម្សាន្តផ្សេងៗទៀត។ព្រមទាំងធ្វើកិច្ចសន្យាជាមួយម្ចាស់អាជីវកម្ម ដើម្បីឲ្យពួកគាត់ចូលរួមសហការជាមួយសមត្ថកិច្ច ក្នុងការបង្ការ ទប់ស្កាត់ បង្ក្រាបបទល្មើសគ្រឿងញៀន និងបទល្មើសផ្សេងៗទៀត។សកម្មភាពនេះមានគោលដៅកាត់បន្ថយ និងលុបបំបាត់រាល់សកម្មភាពលួចលាក់ កែច្នៃសារធាតុគីមីផ្សំ ការចរាចរណ៍ ការប្រើប្រាស់ និងការជួញដូរគ្រឿងញៀនខុសច្បាប់ នៅតាមមូលដ្ឋាននានា។

លោក យង់ សុវឌ្ឍនា បានគូសបញ្ជាក់បន្ថែមថា ការដោះស្រាយបញ្ហាគ្រឿងញៀនបាន ទាមទារឲ្យមានការចូលរួមសហការគ្នា ចាប់ពីបុគ្គលម្នាក់ៗ គ្រួសារនីមួយៗ រហូតដល់អាជ្ញាធរមូលដ្ឋាន សំដៅធ្វើយ៉ាងណាឈានទៅលុបបំបាត់ គ្រឿងញៀនឲ្យអស់ពីក្នុងសហគមន៍របស់យើង៕

 ដោយ៖ អ៊ុច សៀង