AKP ភ្នំពេញ ថ្ងៃទី១៨ ខែមីនា ឆ្នាំ២០២៦ -- ក្រសួងទេសចរណ៍បានបង្កើតកម្មវិធីការប្រកួតប្រជែងថតវីដេអូអំពីព្រឹត្តិការណ៍សមរាត្រីអង្គរ(Equinox Angkor) ក្រោមប្រធានបទ “អច្ឆរិយភាពអង្គរ”ដោយប្រើប្រាស់ទូរសព្ទដៃ។

យោងតាមសេចក្តីជូនដំណឹងរបស់ក្រសួងទេសចរណ៍បានលើកឡើងថាសូមជម្រាបភ្ញៀវជាតិ អន្តរជាតិ និងសាធារណជនទាំងអស់ឱ្យបា ជ្រាបថា “ព្រឹត្តិការណ៍សមរាត្រីអង្គរ Equinox Angkor” ឆ្នាំ២០២៦ ដែលត្រូវបានស្គាល់ថា ជាបាតុភូត ព្រឹត្តិការណ៍ដែលព្រះអាទិត្យរះចំកំពូលកណ្តាលប្រាសាទអង្គរវត្ត បង្កើតបានផ្ទាំងទស្សនីយភាពដ៏ស្រស់ស្អាត និងអស្ចារ្យរបស់ដូនតាខ្មែរបន្សល់ទុកដល់មនុស្សជាតិបានឃើញ និងយល់អំពីជំនឿ និងវិទ្យាសាស្ត្រពិតបង្កើត បាននូវភាពទាក់ទាញដល់អ្នកទេសចរជាតិ និងអន្តរជាតិយ៉ាងច្រើនកុះករមកទស្សនា និងផ្តិតយកអនុស្សាវរីយ៍ ព្រះអាទិត្យរះចំកំពូលប្រាសាទអង្គរវត្ត។ 

ព្រឹត្តិការណ៍សមរាត្រីនឹងកើតមានឡើងពីរដងក្នុងមួយឆ្នាំ ដោយនៅ រដូវប្រាំង (Vernal Equinox) ចាប់ពីថ្ងៃទី២១-២៣ ខែមីនា និងរដូវវស្សា (Autumnal Equinox) ចាប់ពី ថ្ងៃទី២១-២៣ ខែកញ្ញា ជារៀងរាល់ឆ្នាំ។

ក្រសួងបានលើកឡើងទៀតថា ដើម្បីជំរុញផ្សព្វផ្សាយព្រឹត្តិការណ៍ដ៏អស្ចារ្យនេះ ក្រសួងទេសចរណ៍នឹងរៀបចំកម្មវិធីការប្រកួតប្រជែង ថតវីដេអូអំពីព្រឹត្តិការណ៍សមរាត្រីអង្គរ (Equinox Angkor) ក្រោមប្រធានបទ “អច្ឆរិយភាពអង្គរ” ដោយប្រើ ប្រាស់ទូរសព្ទដៃ។

ក្រសួងបានឲ្យដឹងថាលក្ខខណ្ឌនៃការចូលរួមប្រកួត៖

១. ត្រូវចុះឈ្មោះតាមរយៈស្កេនQR Codeខាងក្រោម ដើម្បីស្នើសុំចូលរួមប្រកួត។

២. ការចូលរួមប្រកួតត្រូវប្រើប្រាស់ទូរសព្ទដៃ និងថតដោយខ្លួនផ្ទាល់។ 

៣. ការប្រកួតនឹងចាប់ផ្តើមពីថ្ងៃទី២១-២២ ខែមីនា ឆ្នាំ២០២៦ (វីដេអូដាក់ប្រកួតត្រូវមានរយៈពេល ចន្លោះពី១:៣០នាទី ទៅ២:០០នាទី)។

៤. បេក្ខជនត្រូវផ្ញើរវីដេអូតាមរយៈលីង ៖ https://bit.ly/VideoEquinoxAngkorContest

៥. រយៈពេលនៃការទទួលវីដេអូ មានចំនួន២ថ្ងៃ ចាប់ពីថ្ងៃទី២៣ ដល់ថ្ងៃទី២៤ ខែមីនា ឆ្នាំ២០២៦។

៦. ជ័យលាភីមានចំនួន ៥រូប នឹងទទួលបានប្រាក់រង្វាន់៖ ជ័យលាភីលេខ១ ទទួលចំនួន២លានរៀល,

ជ័យលាភីលេខ២ ទទួលបានចំនួន ១.៥លានរៀល, ជ័យលាភីលេខ៣ ទទួលបានចំនួន ១លានរៀល,

ជ័យលាភីលេខ៤ ទទួលបានចំនួន ៨០ម៉ឺនរៀល និងជ័យលាភីលេខ៥ ៦០ម៉ឺនរៀល។

ក្រសួងទេសចរណ៍ក៏អំពាវនាវដល់ ភ្ញៀវជាតិ អន្តរជាតិ និងសាធារណជនទាំងអស់ជ្រាបជា ព័ត៌មាន និងចូលរួមប្រកួតប្រជែងឱ្យបានច្រើនកុះករ៕

ដោយ៖ ប៊ុនរិទ្ធ