AKP ភ្នំពេញថ្ងៃទី ១៨ ខែមីនា ឆ្នាំ ២០២៦-- ធនាគារជាតិនៃកម្ពុជា ចេញសេចក្តីថ្លែងការណ៍ស្តីពីនីតិវិធីនៃការធ្វើអភិបាលបណ្ដោះអាសន្ន និងជម្រះបញ្ជីធនាគារ   PRINCE PLc. និងធនាគារពាណិជ្ជ Panda ។
យោងតាមឃ្លីបវីដេអូ របស់លោកជំទាវ ជា សិរី ទេសាភិបាល ធនាគារជាតិនៃ កម្ពុជា ដែលបានចេញផ្សាយនៅថ្ងៃទី ១៨ ខែមីនានេះ បានអោយដឹងថា ជាទូទៅ យើងសង្កេតឃើញថា នៅពេលដែលគ្រឹះស្ថានមួយ  មិនមានលទ្ធភាព បើកប្រាក់បញ្ញើជូនដល់អតិថិជន ក្នុងរយៈពេលយូ ហើយ យើងសង្កេតឃើញថា គាត់អាចនឹងមាននិរន្តរិ៍ភាពប្រតិបត្តិការ នោះដំណើរកាលទី១ គឺយើងនឹងចាត់អភិបាលបណ្ដោះអាសន្ន ដែលចាត់អភិបាលបណ្ដោះអាសន្ននេះ ជាទូទៅ ជាក្រុមហ៊ុនសវនកម្ម ដែលមានអជ្ញាប័ណ្ណ ដែលធនាគារជាតិនៃកម្ពុជា នឹងអោយចុះទៅវាយតម្លៃពីស្ថានភាពរបស់គ្រឹះសា្ថននោះ ថាតើគ្រឹះស្ថាននោះ អាចបន្តអាជីវកម្ម ប្រក្រតីតទៅមុខទៀតឬក៏អត់ ជាទូទៅ ការវាយតម្លៃនេះ ទាមទារពេលវេលា បន្ទាប់ពីមានការវាយតម្លៃ ថាគ្រឹះស្ថាននោះ អាចបន្តប្រតិបត្តិការជាប្រក្រតីបាន នោះធនាគារជាតិនៃកម្ពុជា ក្នុងនាមជាអជ្ញាធរត្រួតពិនិត្យ និងធ្វើការជិតដិតជាមួយនឹងភាគទុនិក របស់គ្រឹះស្ថាន ដើម្បីរកវិធីស្ថារស្ថានភាពរបស់ធនាគារនោះឡើងវិញ តាមរយៈការបង្កើនដើមទុន ឬក៏វិធានការណ៍ផ្សេងៗដែលយើងមាន។
ក្នុងករណីដែលអភិបាលបណ្ដោះអាសន្ន គាត់វាយតម្លៃថា គ្រឹះស្ថាន មិនមានលទ្ធភាព បន្តអាជីវកម្មជាប្រក្រតីនោះទេ នោះយើងនឹងឈានទៅដល់ដំណាក់កាលទី២។ នៅក្នុងដំណាក់កាលទី២នេះ គឺជាដំណាក់កាលជម្រះបញ្ជី កាលជម្រះបញ្ជីនេះ ដំបូងឡើងគឺ អ្នកជម្រះបញ្ជី ជាទូទៅជាក្រុមហ៊ុន សវនកម្ម ។ គាត់ នឹងចុះទៅឃុំគ្រង់ប្រតិបត្តិការរបស់គ្រឹះស្ថាននោះ ការឃុំគ្រង់នេះ បានន័យថា គាត់នឹងផ្អាកអាជីវកម្មរបស់គ្រឹះស្ថាន ដើម្បីគាត់វាយតម្លៃថា មានទ្រព្យសម្បត្តិអ្វីខ្លះ ដែលគាត់អាចយកមកបំភ្លែងបានជាសាច់លុយ ដើម្បីបើកជូនទៅដល់អ្នកដែលធនាគារនោះជំពាក់ ដូចនេះ ក្រៅពីអ្នកដែលដាក់ប្រាក់បញ្ជី អាចមានអ្នកដាក់ប្រាក់ផ្សេងទៀត ដែលធនាគារជាប់ជំពាក់។
ការវាយតម្លៃ អំពីទ្រព្យសម្បត្តិទាំងអស់នោះ នឹងការបំភ្លែង ទ្រព្យសម្បត្តិទាំងអស់នោះ គឺទាមទារពេលវេលា កាលណាគាត់បំភ្លែង ទ្រព្យសម្បត្តិទាំងអស់នោះលឿនពេក គឺធ្វើអោយតម្លៃទ្រព្យសម្បត្តិទាំងអស់នោះ ធ្លាក់ចុះថោក ហើយកាលណា ដែលទ្រព្យសម្បត្តិទាំងអស់នោះ ធ្លាក់ថោក គាត់នឹងអាចខ្វះលទ្ធភាពក្នុងការសងប្រាក់ដែលអ្នកធនាគារជំពាក់នោះអោយបានពេញលេញ។ ដូច្នេះហើយ បានកន្លងមកយើងសង្កេតឃើញថា ពេលវេលានោះ វាមានដំណើរការយូ បន្ទាប់ពីអ្នកជម្រះបញ្ជី គាត់វាយតម្លៃ គាត់លក់ហើយ នោះគាត់ នឹងបើកការបែងចែកទ្រព្យសម្បត្តិទាំងអស់នោះទៅដល់អ្នកដែលធនាគារជំពាក់ទៅតាមអ្វីដែលបានចែងនៅក្នុងមាត្រា ៦៤ នៃច្បាប់ស្តីពីគ្រឹះស្ថានធនាគារ និងហិរញ្ញវត្ថុ។ ជាមួយគ្នានេះផងដែរ ចំពោះអ្នកដាក់ប្រាក់បញ្ញើ ការបើកប្រាក់សងនោះ គឺធ្វើអោយមានអាទិភាពស្មើៗគ្នា ។ 
ដូច្នេះ ចំពោះអតិថិជន របស់ធនាគារព្រីន និងធនាគារ ផេដា ដែលកន្លងមក មានការព្រួយបារម្ត, ធនាគារជាតិនៃកម្ពុជា ស្នើសុំអោយអតិថិជនទាំងអស់យោគយល់ និងទុកពេលវេលា អោយអ្នកជម្រះបញ្ជីគាត់ធ្វើការងារគាត់អោយមានប្រសិទ្ធភាព ទោះយ៉ាងណា ធនាគារជាតិនៃកម្ពុជា កំពុងធ្វើការយ៉ាងជិតស្និទ្ធ ដើម្បីពន្លឿននីតិវិធី និងធ្វើយ៉ាងណាអោយអតិថិជនរបស់ធនាគារអាចទទួលបានប្រាក់បញ្ញើវិញយ៉ាងឆាប់រហ័ស៕

ដោយ៖ ចរិយា ប្រភព៖ NBC