AKP ភ្នំពេញ ថ្ងៃទី១៨ ខែមីនា ឆ្នាំ២០២៦---

ឯកឧត្តម សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាននៃរដ្ឋសភា នៅព្រឹកថ្ងៃទី១៨ ខែមីនា ឆ្នាំ២០២៦ បានអញ្ជើញជាអធិបតីក្នុងកម្មវិធីសម្ពោធសៀវភៅ ដែលមានចំណងជើង “ការងើបឡើងនៃប្រទេសលោកខាងត្បូង និងផលបច្ច័យសម្រាប់ភាពជាដៃគូជប៉ុន-អាស៊ាន” The Rise of the Global South and Its Implications for Japan–ASEAN Partnership » នៅសណ្ឋាគារ ហៃយ៉ាត់រីជិនស៊ីភ្នំពេញ។

កម្មវិធីសហការរៀបចំដោយវិទ្យាស្ថានចក្ខុវិស័យអាស៊ី (AVI)និងស្ថានទូតជប៉ុនប្រចាំព្រះរាជាណាចក្រកម្ពុជា ដោយមានការចូលរួមពី ឯកឧត្តម លោកជំទាវ ជាតំណាងនៃស្ថានទូតនានាប្រចាំព្រះរាជាណាចក្រកម្ពុជា ឯកឧត្តម លោកជំទាវ សមាជិក សមាជិកា នៃព្រឹទ្ធសភា និងរដ្ឋសភា និងសមាជិកក្រុមរដ្ឋសភាកម្ពុជានៃសភាវ័យក្មេង ស្ថាប័ន និងក្រសួងស្ថាប័នពាក់ព័ន្ធនានា។

ថ្លែងនៅក្នុងពិធីនេះ ឯកឧត្តម បានលើកឡើងថា៖«សៀវភៅនេះជាសមិទ្ធផលនៃការស្រាវជ្រាវ និងការសន្ទនាយ៉ាងម៉ត់ចត់ក្នុងចំណោមអ្នកជំនាញមកពីប្រទេសកម្ពុជា ជប៉ុន និងអាស៊ាន ផ្តល់នូវការវិភាគដោយស្មោះត្រង់អំពីទំនាក់ទំនងជប៉ុន-អាស៊ាន។

ដោយបង្ហាញពីចំណុចខ្លាំង និងការបំពេញបន្ថែម កំណត់អត្តសញ្ញាណបញ្ហាប្រឈមរបស់ស្ថាប័នគូសបញ្ជាក់ពីឱកាសក្នុងការផ្លាស់ប្តូរបៃតង ឌីជីថលូបនីយកម្ម និងនិងការតភ្ជាប់ ព្រមទាំងការព្រមានអំពីហានិភ័យនៃការប្រកួតប្រជែងភូមិសាស្ត្រនយោបាយ និងការបែកបាក់សេដ្ឋកិច្ច»។

ឯកឧត្តម សួស យ៉ារ៉ា បានគូសបញ្ជាក់ពីសារសំខាន់ៗចំនួនបីពីសៀវភៅនេះ៖

ទី ១- ការងើបឡើងនៃប្រទេសលោកខាងត្បូង ទាមទារឱ្យមានការបង្កើតរួមគ្នាជាប្រព័ន្ធជាមួយដៃគូថ្មីៗ។ 

២- កិច្ចសហប្រតិបត្តិការកំពុងអភិវឌ្ឍន៍ ជាពិសេសក្នុងការគាំទ្រគំនិតផ្តួចផ្តើមរបស់អាស៊ានក្នុងការតភ្ជាប់នូវ ឌីជីថលូបនីយកម្ម និងការអភិវឌ្ឍប្រកបដោយចីរភាព។ 

៣- បទដ្ឋាន និងស្ថាប័ននានារួមគ្នាពង្រឹងស្ថិរភាពនៅក្នុងតំបន់ឥណ្ឌូ-ប៉ាស៊ីហ្វិក។

ឯកឧត្តម បានមានប្រសាសន៍បន្ថែមទៀតថា ការសម្ពោធសៀវភៅនេះនឹងបម្រើជាឯកសារយោងសម្រាប់អ្នកសិក្សាស្រាវជ្រាវ ជាមគ្គុទ្ទេសក៍សម្រាប់អ្នកធ្វើគោលនយោបាយ និងជាការបំផុសគំនិតដល់យុវជនជំនាន់ក្រោយក្នុងតំបន់៕

ដោយ៖ ប៊ុមរិទ្ធ, ប្រភព៖ រដ្ឋសភា