AKP កំពង់ស្ពឺ ថ្ងៃទី១៨ ខែមីនា ឆ្នាំ២០២៦--ឯកឧត្តម ង៉ូវ បូរីណា រដ្ឋលេខាធិការក្រសួងបរិស្ថាន និងជាប្រធានក្រុមការងាររាជរដ្ឋាភិបាល ចុះមូលដ្ឋានសង្កាត់ព្រះស្រែ នាថ្ងៃទី១៨ ខែមីនា ឆ្នាំ២០២៦នេះ បានអញ្ជើញជាអធិបតីភាពក្នុងវេទិកាសាធារណៈ ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា ជាមួយប្រជាពលរដ្ឋមូលដ្ឋានសង្កាត់ព្រះស្រែ ក្រុងឧដុង្គម៉ែជ័យ ខេត្តកំពង់ស្ពឺ នៅវត្តអូរមុនីសត្ថារាម (វត្តក្បាលអូរ)ហៅវត្តអន្លង់ក្របី។

ឯកឧត្តម ង៉ូវ បូរីណា រដ្ឋលេខាធិការក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានសង្កាត់ព្រះស្រែបានមានប្រសាសន៍ថា៖ អង្គវេទិកានេះមានសារៈសំខាន់ និងបានបង្ហាញពីការយកចិត្តទុកដាក់យ៉ាងជិតស្និទ្ធរបស់រាជរដ្ឋាភិបាលចំពោះប្រជាពលរដ្ឋ និងជាគន្លងសំខាន់មួយក្នុងការពង្រឹងទំនាក់ទំនងល្អ សាមគ្គីភាព និងការអភិវឌ្ឍន៍ប្រកបដោយចីរភាពនៅមូលដ្ឋាន។

អង្គវេទិកានាឱកាសនោះ មានប្រជាពលរដ្ឋបានលើកឡើងនូវបញ្ហាប្រឈមជាច្រើន ពាក់ព័ន្ធនឹងបញ្ហាប័ណ្ណកម្មសិទ្ធិ-ការស្នើសុំដោះស្រាយករណីសមាគមមនុស្សចាស់ មិនទាន់បើកប្រាក់តាមការសន្យា-និងបញ្ហាការចេញប្លង់ដីដែលនៅសល់មួយចំនួន ព្រមទាំងបញ្ហាផ្សេងៗទៀតដែលត្រូវការជំនួយដោះស្រាយពីអាជ្ញាធរ។

បន្ទាប់ពីបានស្តាប់យ៉ាងយកចិត្តទុកដាក់ ឯកឧត្តម ង៉ូវ បូរីណា បានណែនាំឱ្យមន្ត្រីជំនាញពាក់ព័ន្ធ ធ្វើការសហការយ៉ាងជិតស្និទ្ធ ដើម្បីដោះស្រាយបញ្ហាទាំងនេះឱ្យបានឆាប់រហ័ស និងមានប្រសិទ្ធភាព។ ឯកឧត្តមបានបញ្ជាក់ថា ការផ្តល់សេវាសាធារណៈត្រូវតែមានភាពទាន់ពេលវេលា ត្រឹមត្រូវ និងមានការទទួលខុសត្រូវខ្ពស់ ដើម្បីបំពេញតម្រូវការរបស់ប្រជាពលរដ្ឋ។

ជាមួយគ្នានេះ ឯកឧត្តមក៏បានជម្រាបជូនអំពីស្ថានភាពបញ្ហាព្រំដែនកម្ពុជា-ថៃ ព្រមទាំងអំពាវនាវឱ្យប្រជាពលរដ្ឋចូលរួមគាំទ្រគោលនយោបាយរបស់រាជរដ្ឋាភិបាល និងត្រូវមានការប្រុងប្រយ័ត្នក្នុងការទទួលយកព័ត៌មានពីបណ្តាញសង្គម ដោយត្រូវពិនិត្យឱ្យបានច្បាស់លាស់ មុននឹងជឿ ឬចែកចាយបន្ត ដើម្បីចៀសវាងព័ត៌មានមិនពិតដែលអាចបង្កឱ្យមានការយល់ច្រឡំ និងប៉ះពាល់ដល់សង្គម។

ទន្ទឹមនឹងនេះ ឯកឧត្តមក៏បានជម្រុញឱ្យអាជ្ញាធរ និងប្រជាពលរដ្ឋបន្តអនុវត្តន៍គោលនយោបាយ «ភូមិ ឃុំ សង្កាត់ មានសុវត្ថិភាព»ការបង្ការ និងបង្ក្រាបគ្រឿងញៀន ការដោះស្រាយវិវាទក្រៅប្រព័ន្ធតុលាការ ការចូលរួមសម្អាតបរិស្ថាន និងការអភិវឌ្ឍន៍ហេដ្ឋារចនាសម្ព័ន្ធ ដូចជាការសាងសង់ផ្លូវបេតុងក្នុងភូមិ ដើម្បីលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើង។

ដោយ ម៉ែន ប៊ុនធីម