AKP កំពង់ធំថ្ងៃទី១៦ខែមីនា ឆ្នាំ២០២៦--ឯកឧត្តម នួន ផារ័ត្ន ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ធំនិងលោកជំទាវអមដំណេីរដោយលោក ឃន ចាន់ថៃ ប្រធានគណៈកម្មាធិការអនុសាខាកាកបាទក្រហមកម្ពុជាស្រុកបារាយណ៍មន្ត្រីក្រុមប្រតិបត្តិសាខាកាលពីថ្ងៃទី១៥ខែមីនាឆ្នាំ២០២៦បាននាំយកអំណោយមនុស្សធម៌ទៅសាកសួរសុខទុក្ខដល់គ្រួសាររងគ្រោះដោយសារធាតុជាតិផ្ទុះ(គ្រាប់បែកនៅសល់កាលពីសម័យសង្រ្គាម)ចំនួន២គ្រួសារ÷១.ឈ្មោះសុទ្ធ សិលាភេទស្រីអាយុ១៤ឆ្នាំស្ថិតនៅភូមិជ័យមង្គលឃុំបល្ល័ង្កស្រុកបារាយណ៍និង២.ឈ្មោះ យ៉ាន រតនា ភេទប្រុសអាយុ៨ឆ្នាំស្ថិតនៅភូមិសំពៅលូន ចើងដើង ស្រុកបារាយណ៍ ខេត្តកំពង់ធំ។ 

នាឱកាសនោះឯកឧត្ដម នួន ផារ័ត្នបានពាំនាំនៅប្រសាសន៍ផ្ដាំផ្ញើសាកសួរសុខទុក្ខពីចម្ងាយអំពីសំណាក់សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន  ប្រធានកាកបាទក្រហមកម្ពុជានូវការចូលរួមសោកស្ដាយជាទីបំផុត ជាមួយគ្រួសាររងគ្រោះដែលបានបាត់បង់សមាជិកគ្រួសារដោយឧបទ្ទវហេតុគ្រាប់ដែលមិនទាន់ផ្ទុះកាលពីសម័យមុននិងសូមផ្សព្វផ្សាយទៅដល់ប្រជាពលរដ្ឋដែលមានវត្តមាននៅទីនេះត្រូវមានការប្រុងប្រយ័ត្នខ្ពស់ចំពោះគ្រោះមហន្តរាយនេះព្រមទាំងរស់នៅប្រកបដោយអនាម័យជាប់ជាប្រចាំ"ផឹកស្អាត ហូបស្អាត រស់នៅស្អាត"។

អំណោយបានប្រគល់ជូនគ្រួសាររងគ្រោះនូវអង្ករចំនួន១០០គីឡូក្រាមមី២កេស ត្រីខ៤០កំប៉ុង ទឹកត្រី០៤យួរ  ទឹកស៊ីអ៊ីវ០៤យួរនិងថវិកា៥០ម៉ឺនរៀលក្នុងមួយគ្រួសារ។

សូមបញ្ជាក់ថាកាលពីវេលាម៉ោង១៤និង១៥នាទីថ្ងៃទី១៤ខែមីនាឆ្នាំ២០២៦នៅចំណុច ក្រោមស្ពានថ្មីឆ្លងស្ទឹងជីនិតស្ថិតក្នុងភូមិកំពង់ថ្មឃុំកំពង់ថ្មស្រុកសន្ទុកខេត្តកំពង់ធំមានករណីក្មេង២នាក់បានស្លាប់បាត់បង់ជីវិតក្រោយពីបានយកគ្រាប់មិនទាន់ផ្ទុះមកលេងបណ្តាលឱ្យផ្ទុះរងរបួសធ្ងន់ធ្ងរហើយបានស្លាប់នៅពេលបញ្ជូនទៅដល់មន្ទីរពេទ្យបង្អែកបារាយណ៍-សន្ទុក៕

ដោយ៖ ស៊ុម វណ្ណា