AKP ភ្នំពេញ ថ្ងៃទី២៤ ខែមេសា ឆ្នាំ ២០២៦--ឯកអគ្គរាជទូតកម្ពុជាប្រចាំនៅសាធារណរដ្ឋកូរ៉េ និងមជ្ឈមណ្ឌលគាំពារពលករបរទេស​
នៅតំបន់ផ្យង់ថេគ ខេត្ត Gyeonggi-do សាធារណរដ្ឋកូរ៉េបានឯកភាពជួយសម្របសម្រួលដោះស្រាយបញ្ហាប្រឈមនានារបស់ពលករខ្មែរឱ្យកាន់តែមានប្រសិទ្ធភាព និងទាន់ពេលវេលា។

កាលពីថ្ងៃ ទី២៣ ខែមេសា ឆ្នាំ២០២៦ ឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ ព្រមទាំងសហការី បានអញ្ជើញជួបសំណេះសំណាល និងពិភាក្សាការងារជាមួយលោក Kim Woo Young  ប្រធានមជ្ឈមណ្ឌលគាំពារពលករបរទេស​ ( Pyeongtaek Migrant Welfare Center) នៅតំបន់ផ្យង់ថេគ ខេត្ត Gyeonggi-do សាធារណរដ្ឋកូរ៉េ។ 

ជាកិច្ចចាប់ផ្តើម ឯកឧត្តមឯកអគ្គរាជទូត បានថ្លែងអំណរគុណចំពោះ លោកប្រធានមជ្ឈមណ្ឌល ដែលតែងតែជួយយកចិត្តទុកដាក់ ក្នុងការដោះស្រាយបញ្ហាប្រឈមនានារបស់បងប្អូនពលករខ្មែរ និងសហគមន៍ខ្មែរនៅតំបន់ផ្យង់ថេគកន្លងមក។ 

ជាមួយគ្នានេះ ឯកឧត្តមឯកអគ្គរាជទូត បានគូសបញ្ជាក់ពីសារៈសំខាន់នៃការពង្រឹងកិច្ចសហប្រតិបត្តិការរវាងស្ថាន ទូត​ និងមណ្ឌលគាំពារ​ ក៏ដូចជាអាជ្ញាធរពាក់ព័ន្ធកូរ៉េ ក្នុងការការពារ និងលើក កម្ពស់សិទ្ធិ សុខមាលភាព និងសុវត្ថិភាពរបស់បងប្អូនពលករ និងសហគមន៍ខ្មែរទាំងមូល ដែលកំពុងរស់នៅ និងបម្រើការងារក្នុងប្រទេសកូរ៉េ ផងដែរ។

ជាការឆ្លើយតប លោក Kim បានសម្តែងអារម្មណ៍រីករាយដែលបានជួបពិភាក្សាការងារលេីកទី​ ១​ ជាមួយ​ ឯកឧត្តមឯកអគ្គរាជទូតកម្ពុជាដោយផ្ទាល់ ហើយលោកសន្យាថា នឹងបន្តជួយសម្របសម្រួល និងផ្តល់ការការពារដល់ពលករខ្មែរជាបន្តទៀត។

ក្នុងជំនួបនេះ ភាគីទាំងពីរ ក៏បានឯកភាពគ្នាអំពីការពង្រឹងកិច្ចសហ ប្រតិបត្តិការរវាងស្ថានទូតកម្ពុជា និងមជ្ឈមណ្ឌល នាពេលខាងមុខ ដោយផ្តោតលើការផ្លាស់ប្តូរព័ត៌មានគ្នាទៅវិញ ទៅមក ការរៀបចំកម្មវិធីវប្បធម៌ ការផ្តល់ការពិនិត្យសុខភាពជូនពលករខ្មែរដោយឥតគិតថ្លៃ ការផ្តល់សេវាសាធារណៈ និងប្រឹក្សាការងារចល័តរបស់ស្ថានទូត និងការផ្សព្វផ្សាយពីច្បាប់ការងារថ្មីៗរបស់កូរ៉េ ក៏ដូចជាការបន្តសម្របសម្រួលដោះស្រាយបញ្ហាប្រឈមនានារបស់ពលករខ្មែរឱ្យកាន់តែមានប្រសិទ្ធភាព និងទាន់ពេលវេលា។

ក្រោយបញ្ចប់ការពិភាក្សាការងារ ឯកឧត្ត មឯកអគ្គរាជទូត ក៏បានឆ្លៀតពេលសួរសុ ខទុក្ខ និងសំណេះសំណាលជាមួយបងប្អូនពលករខ្មែរដែលកំពុងស្នាក់នៅ និងសិក្សាភាសាកូរ៉េបន្ថែម នៅមជ្ឈម ណ្ឌល ប្រកបដោយភាពស្និទ្ធស្នាល ផងដែរ៕

ដោយ៖ ប៊ុនរិទ្ធ