AKP បន្ទាយមានជ័យ ថ្ងៃទី២៥ ខែសីហា ឆ្នាំ២០២៥-- ហឹបវិញ្ញាសារប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប សម្រាប់សម័យប្រឡងថ្មីនេះ បានមកដល់រដ្ឋបាលខេត្តបន្ទាយមានជ័យដោយសុវត្ថិភាពហើយនៅវេលាម៉ោងជាង១១ ថ្ងៃទី២៥ ខែសីហា ឆ្នាំ២០២៥នេះ។ វិញ្ញាសារទាំងអស់ត្រូវបានរៀបចំទុកដាក់យ៉ាងមានសុវត្ថិភាព ក្រោមការយាមកាមយ៉ាងតឹងរ៉ឹងបំផុត ដើម្បីធានាបាននូវដំណើរការប្រឡងប្រកបដោយតម្លាភាព និងយុត្តិធម៌។

ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានផ្ញើសារជូនពរដល់បេក្ខជនទាំងអស់ដែលត្រៀមប្រឡងនៅថ្ងៃទី២៨-២៩ ខែសីហា ខាងមុខនេះឱ្យទទួលបានលទ្ធផលគាប់ប្រសើរទាំងអស់គ្នា និងបានលើកឡើងពីគោលការណ៍ទាំង៤នៃការប្រឡង ដូចជា គោលការណ៍ច្បាប់ យុត្តិធម៌ តម្លាភាព និងលទ្ធផលដែលអាចទទួលយកបាន ដោយសង្កត់ធ្ងន់ថា "អ្នកចេះគឺជាប់"។

ដើម្បីធានាបាននូវសុវត្ថិភាព និងសណ្តាប់ធ្នាប់នៅតាមមណ្ឌលប្រឡងទាំងអស់ ឯកឧត្តម អ៊ុ រាត្រី បានណែនាំដល់កម្លាំងសមត្ថកិច្ចពាក់ព័ន្ធឱ្យត្រៀមពង្រាយកម្លាំងឱ្យបានត្រឹមត្រូវនិងគ្រប់គ្រាន់។ ការយកចិត្តទុកដាក់ខ្ពស់របស់អាជ្ញាធរខេត្ត គឺដើម្បីបង្កើតបរិយាកាសស្ងប់ស្ងាត់ និងល្អប្រសើរសម្រាប់បេក្ខជនប្រឡងទាំងអស់អាចបញ្ចេញសមត្ថភាពរបស់ខ្លួនបានពេញលេញ។

លោក ឈូ ប៊ុនរឿង ប្រធានមន្ទីរអប់រំ យុវជន និងកីឡាខេត្តបន្ទាយមានជ័យ បានឱ្យដឹងថា សម្រាប់ឆ្នាំ២០២៥ នេះ ខេត្តបន្ទាយមានជ័យមានបេក្ខជនដាក់ពាក្យប្រឡងសរុប ៦,៥៥២ នាក់ ក្នុងនោះស្រី ៣,៧២៥ នាក់។ ការប្រឡងនឹងប្រព្រឹត្តទៅនៅតាមមណ្ឌលប្រឡងចំនួន៨កន្លែង រួមមាន៖ មណ្ឌលបឋម ហ៊ុន សែន សូភី៖ បេក្ខជន៦៥០នាក់ (ស្រី៣៨៣នាក់) វិទ្យាល័យ ហ៊ុន សែន ខ្លាកូន៖ បេក្ខជន៦២៥នាក់ (ស្រី៣៨៨នាក់) សាកលវិទ្យាល័យជាតិមានជ័យ៖ បេក្ខជន ៥៥០នាក់ (ស្រី៣៣៦នាក់) វិទ្យាល័យសិរីសោភ័ណ៖ បេក្ខជន១,១៥០នាក់ (ស្រី៦៩២នាក់) វិទ្យាល័យសម្តេចឪ៖ បេក្ខជន ៥០០ នាក់ (ស្រី៥២៨នាក់) សាកលវិទ្យាល័យ UME៖ បេក្ខជន ១,០២៥ នាក់ (ស្រី៥៨៥នាក់) វិទ្យាល័យ សកពន អូរអំបិល៖ បេក្ខជន ១,១៥០ នាក់ (ស្រី៦៤៨នាក់) មណ្ឌលអនុវិទ្យាល័យទឹកថ្លា៖ បេក្ខជន៥០២នាក់ (ស្រី១៦៩នាក់)។ ការរៀបចំដ៏ហ្មត់ចត់នេះឆ្លុះបញ្ចាំងពីការប្តេជ្ញាចិត្តរបស់អាជ្ញាធរខេត្តក្នុងការផ្តល់ឱកាសប្រកបដោយតម្លាភាព និងយុត្តិធម៌ដល់សិស្សានុសិស្សទាំងអស់ ដើម្បីសម្រេចក្ដីសុបិនរបស់ពួកគេតាមរយៈការសិក្សានោះ៕

ដោយ ឈុន សារ៉ាត