AKP សៀមរាប ថ្ងៃទី០៧ ខែឧសភា ឆ្នាំ២០២៦-- សមាគមអ្នកផ្គត់ផ្គង់ទឹកស្អាតកម្ពុជា ដោយមានការសហការគាំទ្រពីក្រសួងឧស្សាហកម្ម និងរដ្ឋបាលខេត្តសៀមរាប នៅព្រឹកថ្ងៃទី០៧ ខែឧសភា ឆ្នាំ២០២៦នេះ បានរៀបចំកិច្ចប្រជុំពិភាក្សាថ្នាក់តំបន់លើកទី១ ដើម្បីធ្វើការរួមគ្នាជំរុញសេវាផ្គត់ផ្គង់ទឹកស្អាតឱ្យសម្រេចបាននូវគោលដៅអភិវឌ្ឍប្រកបដោយចីរភាព ២០៣០ តាមរយៈការចែករំលែកចំណេះដឹង បទពិសោធន៍ ពិភាក្សាគ្នារកដំណោះស្រាយលើបញ្ហាប្រឈមនានា ក្នុងការផ្គត់ផ្គង់ទឹកស្អាត និងរៀបចំផែនការសកម្មភាពមួយចំនួនយកទៅអនុវត្ត សម្រាប់ពន្លឿនការផ្គត់ផ្គង់ទឹក ស្អាតជូនប្រជាពលរដ្ឋ ដើម្បីឱ្យប្រជាពលរដ្ឋទទួលបានទឹកស្អាត ប្រកបដោយគុណភាព សុវត្ថិភាព និរន្តរភាព និងថ្លៃសមរម្យ។

លោក សៀ សេងហ៊ាប ហេរញ្ញិកក្រុមប្រឹក្សាភិបាលសមាគម បានលើកឡើងថា កិច្ចប្រជុំនេះធ្វើឡើងក្រោមគោលបំណងដើម្បីស្តាប់សំឡេងរបស់សមាជិក និងស្វែងរកដំណោះស្រាយជូនសមាជិក បង្កើនទំនាក់ទំនងជាមួយអាជ្ញាធរថ្នាក់ក្រោមជាតិ និងមន្ទីរពាក់ព័ន្ធ សមាជិកសមាគម និងដៃគូអភិវឌ្ឍន៍នានា។ កិច្ចប្រជុំនេះ ក៏ជាការធ្វើបច្ចុប្បន្នភាពអំពីសមាគម ច្បាប់គតិយុត្តនានាទាក់ទងទៅនឹងវិស័យទឹកស្អាត និងការចែករំលែកចំណេះដឹង បទពិសោធន៍ ព័ត៌មាន និងបច្ចេកវិទ្យាថ្មីៗ។

លោកស្រី ម៉ននី រង្សី អភិបាលរងខេត្តសៀមរាប មានប្រសាសន៍ថា បច្ចុប្បន្នខេត្តមានក្រុមហ៊ុន និងអាជីវកម្មទឹកស្អាតឯកជនចំនួន ១០មូលដ្ឋាន ដែលកំពុងមានប្រតិបត្តិការ និងមានសហគមន៍ទឹកស្អាតសរុប៤៩សហគមន៍ ក្នុងនោះមិនដំណើរការមាន២២ទីតាំង។ សម្រាប់កិច្ចប្រជុំនាពេលនេះពិតជាមានសារៈសំខាន់ណាស់ ដើម្បីបានជាប្រយោជន៍សម្រាប់ការផ្គត់ផ្គង់ទឹកស្អាតនៅក្នុងខេត្តសៀមរាប ស្របទៅតាមចក្ខុវិស័យរបស់រាជរដ្ឋាភិបាល និងគោលនយោបាយនានាដែលបានដាក់ចេញឱ្យមានប្រសិទ្ធភាព និងប្រសិទ្ធផល ដើម្បីកសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ ស្របតាមយុទ្ធសាស្ត្របញ្ចកោណ ដំណាក់កាលទី១នៃរាជរដ្ឋាភិបាលកម្ពុជា អាណត្តិទី៧ ដែលបានដាក់ចេញដើម្បីកំណើន ការងារ សមធម៌ ប្រសិទ្ធភាព និងចីរភាព និងបានកំណត់ យកអាទិភាពគន្លឹះ៥ គឺ “មនុស្ស ផ្លូវ ទឹក ភ្លើង និង បច្ចេកវិទ្យា”។

ថ្លែងបើកកិច្ចប្រជុំ ឯកឧត្តម អ៊ុ សុថា រដ្ឋលេខាធិការក្រសួងឧស្សាហកម្ម បានមានប្រសាសន៍ថា កិច្ចប្រជុំនេះនឹងក្លាយជាវេទិកាដ៏សំខាន់មួយ សម្រាប់ការចូលរួមពិគ្រោះយោបល់ទូលំទូលាយបែបពហុភាគី ដើម្បីស្វែងរកចំណុចគន្លឹះមួយចំនួនក្នុងការដោះស្រាយបញ្ហាប្រឈមលើការផ្គត់ផ្គង់ទឹកស្អាតជូនប្រជាពលរដ្ឋ ក៏ដូចជាតម្រូវការអភិវឌ្ឍន៍សេដ្ឋកិច្ច សង្គមនៅតាមមូលដ្ឋាន។ មិនតែប៉ុណ្ណោះ វាក៏ជាឱកាសនៃការចែករំលែក ផ្លាស់ប្ដូរ បទពិសោធន៍ គោលគំនិត លើវិធានការ ឬយន្តការ ដែលគប្បីត្រូវបានកែលម្អ បំពេញបន្ថែម ឬចាត់ចែងអនុវត្តបន្តទៀត សម្រាប់ជាគុណប្រយោជន៍ទាំងអស់គ្នា។ ទន្ទឹមនេះ វិស័យឯកជននៅតែជាដៃគូសំខាន់ជាយុទ្ធសាស្ត្រមិនអាចខ្វះបាន ក្នុងការចូលរួមដោះស្រាយបញ្ហាទឹកស្អាតជូនប្រជាពលរដ្ឋ។ 

ឯកឧត្តមបានបញ្ជាក់ថា រាជរដ្ឋាភិបាលកម្ពុជាបានយកចិត្តទុកដាក់ជំរុញឱ្យសម្រេចគោលដៅអភិវឌ្ឍន៍ប្រកបដោយចីរភាព និងកំណត់ថា «ត្រឹមឆ្នាំ២០៣០ សម្រេចនូវការទទួលបានសាកលកម្ម និងសមធម៌នូវទឹកបរិភោគ ដែលមានសុវត្ថិភាព និងថ្លៃសមរម្យ សម្រាប់ប្រជាជនទាំងអស់»។ ហើយការផ្តល់សេវាផ្គត់ផ្គង់ទឹកស្អាតត្រូវឈរលើលក្ខខណ្ឌគោល៤យ៉ាង គឺគុណភាព សុវត្ថិភាព និរន្តរភាព និងថ្លៃសមរម្យ។ ក្នុងអាណត្តិថ្មីនេះ ក្រសួងក៏បានដាក់ទិសដៅយកទឹកស្អាត ជាកម្លាំងចលករ ដើម្បីជំរុញបរិវត្តកម្មសេដ្ឋកិច្ច ស្របតាមទិសស្លោក «ទីណាមានទឹកស្អាត, ទីនោះនឹងមានការផ្លាស់ប្តូរជាសេដ្ឋកិច្ច» ហើយក៏ស្របទៅនឹងពាក្យស្លោក «ទឹកស្អាតសម្រាប់ទាំងអស់គ្នា» ដែលសម្ដេចតេជោ ហ៊ុន សែន ធ្លាប់បានប្រកាសឱ្យប្រើពាក្យស្លោកនេះ៕

ដោយ ឃុត សៅ