AKP ឧត្តរមានជ័យ ថ្ងៃទី០៧ ខែឧសភា ឆ្នាំ២០២៦-- នៅសាលប្រជុំសាលាក្រុងសំរោង លោក ប៊ុត វ៉ាន់ដេត អភិបាលរងក្រុងសំរោង ដឹកនាំកិច្ចប្រជុំពិនិត្យបច្ចុប្បន្នភាពទិន្នន័យជនភៀសសឹក ក្នុងសង្កាត់អូរស្មាច់ និងសង្កាត់កូនគ្រៀល ដើម្បីពង្រឹងការគ្រប់គ្រង និងត្រៀមលក្ខណៈផ្ដល់ការគាំទ្រ កាលពីថ្ងៃពុធទី០៦ ខែឧសភា ឆ្នាំ២០២៦ ដោយមានការចូលរួមពីលោក ហុង សុផាន ប្រធានការិយាល័យនីតិកម្ម និងសម្រុះសម្រួលវិវាទមូលដ្ឋាន ចៅសង្កាត់ ចៅសង្កាត់រង និងសមាជិកក្រុមប្រឹក្សាសង្កាត់អូរស្មាច់ ព្រមទាំងចៅសង្កាត់រងទី១ និងសមាជិកក្រុមប្រឹក្សាសង្កាត់កូនគ្រៀល ព្រមទាំងមន្ត្រីពាក់ព័ន្ធជាច្រើនរូបទៀត។

លោក ប៊ុត វ៉ាន់ដេត បានលើកឡើងថា ការធ្វើបច្ចុប្បន្នភាពទិន្នន័យឱ្យបានច្បាស់លាស់ គឺជាគ្រឹះដ៏សំខាន់ក្នុងការដាក់ចេញនូវគោលនយោបាយគាំទ្រ និងដោះស្រាយបញ្ហាប្រឈមជូនប្រជាពលរដ្ឋ ។ លោកបានបន្តថា ដើម្បីពិភាក្សាលើចំណុចសំខាន់ៗមានដូចជា ការផ្ទៀងផ្ទាត់ទិន្នន័យ ពិនិត្យឡើងវិញនូវចំនួនជនភៀសសឹកជាក់ស្ដែងដែលកំពុងស្នាក់នៅតាមតំបន់គោលដៅ ដើម្បីធានាបាននូវភាពត្រឹមត្រូវ និងគ្រប់ជ្រុងជ្រោយនៃស្ថិតិ។ សិក្សាពីតម្រូវការចាំបាច់ និងបញ្ហាប្រឈមនានារបស់បងប្អូនប្រជាពលរដ្ឋ ដើម្បីរដ្ឋបាលក្រុងមានមូលដ្ឋានក្នុងការសម្របសម្រួលជាមួយមន្ទីរ អង្គភាពពាក់ព័ន្ធ និងសប្បុរសជន។ បន្តពង្រឹងការងារគ្រប់គ្រងសន្តិសុខ សណ្ដាប់ធ្នាប់ ក្នុងតំបន់ដែលបងប្អូនស្នាក់នៅឱ្យមានភាពកក់ក្ដៅ និងសុវត្ថិភាព។

លោកអភិបាលរងក្រុងបានផ្ដាំផ្ញើដល់អាជ្ញាធរសង្កាត់ទាំងពីរ ត្រូវបន្តសហការជិតស្និទ្ធជាមួយមន្ត្រីជំនាញ ដើម្បីធ្វើបច្ចុប្បន្នភាពព័ត៌មានឱ្យបានទៀងទាត់ និងត្រៀមលក្ខណៈជានិច្ចក្នុងការឆ្លើយតបចំពោះរាល់សំណូមពររបស់បងប្អូនជនភៀសសឹក ស្របតាមអនុសាសន៍ដឹកនាំដ៏ខ្ពង់ខ្ពស់របស់ឯឧត្តមអភិបាលខេត្ត និងអភិបាលក្រុង៕

ដោយ ទិត ស្រ៊