AKP ភ្នំពេញ ថ្ងៃទី២៨ ខែកក្កដា ឆ្នាំ២០២៥--អ្នកនាំពាក្យក្រសួងការពារជាតិកម្ពុជាកម្ពុជាបានប្រកាសបន្តច្រានចោលចំពោះការចោទប្រកាន់របស់ភាគីថៃដែលថា កម្ពុជាប្រើមីស៊ីល PHL-03 ដើម្បីថៃយកលេស ប្រើអាវុធឃោរឃៅវាយប្រហារមកលើកម្ពុជា ហើយបន្ទាប់ពីភាគីថៃប្រើសព្វាវុធធុនធ្ងន់ជាច្រើនប្រភេទបាញ់ស្រោចមកលើកម្ពុជាជាច្រើនថ្ងៃមក កងទ័ពថៃ ក៏បានប្រើប្រាស់យន្តហោះបាញ់គ្រាប់បែកផ្សែងពុលចូលដែនធិបតេយ្យកម្ពុជា។

ថ្លែងក្នុងសន្និសីទសារព័ត៌មានស្តីពីបច្ចុប្បន្នភាពនៃការឈ្លានពានរបស់កងទ័ពថៃមកលើទឹកដីកម្ពុជា នាព្រឹកថ្ងៃទី២៨ ខែកក្កដា ឆ្នាំ២០២៥ លោកជំទាវឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិបានថ្លែងបញ្ជាក់យ៉ាងដូច្នេះថា កម្ពុជាសូមច្រានចោលចំពោះការផ្សាយថាកម្ពុជាបានប្រើប្រាស់អាវុធបាញ់ចម្ងាយ PHL-03  ចូលទឹកដីថៃ ដែលការចោទប្រកាន់នេះគឺគ្មានមូលដ្ឋាន និងឆ្លុះបញ្ចាំងដល់ភាគីថៃជាលេស ដើម្បីខ្លួនប្រើប្រាស់អាវុធកាន់តែសាហាវព្រៃផ្សៃជាងមុន និងអមនុស្សធម៌ជាងមុន កាន់តែច្រើនក្នុងការវាយប្រហារ រំលោភបំពានលើដែនធិបតេយ្យកម្ពុជាកម្ពុជា។ លោកជំទាវឧត្ដមសេនីយ៍ឯក អ្នកនាំពាក្យក្រសួងការពារជាតិបានលើកឡើងថា ចាប់ពីម៉ោង១២រំលងអាទ្រាធ ថ្ងៃទី២៧ ខែកក្កដា ឆ្នាំ២០២៥ ភាគីថៃបានចាប់ផ្តើមវាយប្រហារនៅតំបន់ ៥មករា ចម្ការចេក និងប្រាសាទព្រះវិហារ និងបានប្រើយន្តហោះបាញ់គ្រាប់បែកផ្សែងចូលតំបន់អានសេះ ។ លោកជំទាវឧត្ដមសេនីយ៍ឯកបានបន្ដថា នៅវេលាម៉ោង៦ និង១២នាទី ថៃបានបាញ់ផ្លោងចូលតំបន់ជប់គរគី  ថ្មដូន ចំណែកប្រាសាទតាន់ធំ និងប្រាសាទតាក្របី ដែលបាញ់ផ្លោងចូលដូចភ្លៀងរលឹម ។ នៅតំបន់ភ្នំខ្មោច និងអានសេះ ថៃបានធ្វើការវាយប្រហារកាន់តែខ្លាំងឡើង  ក្នុងនោះ ថៃក៏បានប្រើយន្តហោះចម្បាំងបាញ់ប្រហារមកលើកម្ពុជាច្រើនគ្រាប់។ លោកជំទាវឧត្ដមសេនីយ៍ឯក អ្នកនាំពាក្យក្រសួងការពារជាតិបានអះអាងផងដែរ៖ «ថៃបានប្រើប្រាស់យន្តហោះអត្តឃាតបាញ់គ្រាប់បែកចង្កោម និងផ្សែងពុលនៅតំបន់ភ្នំខ្មោច រហូតដល់ថ្ងៃទី២៨ ខែកក្កដា ឆ្នាំ២០២៥ បើទោះបី ជាមានការកំណត់កិច្ចប្រជុំកម្រិតនាយករដ្ឋមន្ត្រីនៅប្រទេសម៉ាឡេស៊ីយ៉ាងណាក្តី គឺនៅម៉ោង៣ រំលងអាទ្រាធ ភាគីថៃនៅតែបន្តបើកការវាយប្រហារមុន មកលើកម្ពុជានៅតំបន់ប្រាសាទតាមមាន់ធំ  ប្រាសាទតាក្របី ដោយបាញ់ស្រោចរហូតដល់ម៉ោង៥ និង៧នាទី»។

ជាមួយគ្នានោះដែរលោកជំទាវឧត្ដមសេនីយ៍ឯក អ្នកនាំពាក្យក្រសួងការពារជាតិក៏បានថ្លែងឱ្យដឹងទៀតថា កងទ័ពថៃនៅបន្តបាញ់មកលើកម្ពុជានៅតំបន់តាមាន់ធំ ជប់គរគី  ថ្មដូន  ៥មករា តាថាវ  ភ្នំខ្មោច  អានសេះ ហើយថៃបានសម្រុកបាញ់យ៉ាងខ្លាំងនៅតំបន់៥មករា ដើម្បីដណ្តើមយកវត្តកែវសិក្ខាគិរីស្វារៈ ជប់គរគី ថ្មដូន និងវាលឥន្ទ្រីយ៍ ដោយឆេះយ៉ាងសន្ធោសនៅ្ធ ប៉ុន្តែកងកម្លាំងកម្ពុជានៅតែឈរយ៉ាងរឹងមាំតស៊ូយ៉ាងស្វិតស្វាញ់តស៊ូជាមួយសត្រូវឃ្លានពាន៕

ដោយ៖ ប៊ុនរិទ្ធ