AKP ភ្នំពេញ ថ្ងៃទី០៦ ខែឧសភា ឆ្នាំ២០២៦--ឯកឧត្តមបណ្ឌិត ឈាង វណ្ណារិទ្ធ អគ្គលេខាធិការរង និងជាប្រធានក្រុមទីប្រឹក្សារដ្ឋសភា បានផ្ដល់នូវទស្សនវិភាគស៊ីជម្រៅស្តីពីរបៀបវារៈគោលន យោបាយសមុទ្ររបស់កម្ពុជា ដោយសង្កត់ធ្ងន់ថា កម្ពុជាត្រូវតែបិទខ្ទប់ «គម្លាតសមត្ថភាព អភិបាលកិច្ច និងចំណេះដឹង» តាមរយៈសសរស្តម្ភយុទ្ធសាស្ត្រចំនួន ៤។

នៅក្នុងបទវិភាគដែលផ្ដល់ជូនសារព័ត៌ មាន " ខ្មែរថាម " សរសេរជាភាសាអង់ គ្លេស ឯកឧត្តមបណ្ឌិតបានលើកឡើងនូវចំណុចគន្លឹះសំខាន់ៗដូចខាងក្រោម៖

១. ការធ្វើទំនើបកម្មកងទ័ពជើងទឹកទៅជា «កងទ័ពឆ្លាតវៃ»

កម្ពុជាមិនត្រូវការកងទ័ពជើងទឹកដែលមានទំហំធំសម្បើមនោះទេ ប៉ុន្តែត្រូវការកងទ័ពដែលមានវិជ្ជាជីវៈ និងសមត្ថភាពការពារជាតិពិតប្រាកដ។ 

ឯកឧត្តមបានបញ្ជាក់ថា កម្ពុជាចាំបាច់ត្រូវអភិវឌ្ឍ «ប្រព័ន្ធដ្រូន  និងប្រព័ន្ធមីស៊ីលប្រឆាំងនាវា» រួមជាមួយការបំពាក់រ៉ាដាឆ្នេរ និងប្រព័ន្ធសម្ងាត់សមុទ្រ ដើម្បីធានាឱ្យបាននូវសមត្ថភាពឆ្លើយតបទាន់ពេល និងការពារអធិបតេយ្យភាពដែនសមុទ្ររបស់ខ្លួន។

២. ការពង្រឹងហេដ្ឋារចនាសម្ព័ន្ធគាំទ្រ

នាវាមិនអាចប្រតិបត្តិការបានទេ បើគ្មានហេដ្ឋារចនាសម្ព័ន្ធរឹងមាំ។ ក្នុងន័យនេះ ការធ្វើទំនើបកម្ម «មូលដ្ឋានទ័ពជើងទឹករាម» និងការបង្កើតរោងជាងជួសជុល ឃ្លាំងផ្ទុកប្រេង និងមជ្ឈមណ្ឌលបញ្ជាអន្តរស្ថាប័ន គឺជាអាទិភាពខ្ពស់បំផុត។ បើគ្មានការថែទាំ និងហេដ្ឋារចនាសម្ព័ន្ធត្រឹមត្រូវទេ គ្រឿងបរិក្ខារទំនើបៗនឹងក្លាយជាគ្រឿងលម្អដែលគ្មានប្រសិទ្ធភាព។

៣. ការបង្កើតក្របខ័ណ្ឌសន្តិសុខរួម 

ឯកឧត្តមបណ្ឌិតបានជំរុញឱ្យមានយុទ្ធសាស្ត្រជាតិរួមគ្នាមួយ ដែលបញ្ជ្រាបការងាររវាងកងទ័ពជើងទឹក នគរបាលទឹក គយ ជលផល និងអាជ្ញាធរកំពង់ ផែ។ បន្ថែមពីនេះ វិស័យឯកជនក៏ត្រូវចូលរួមចំណែកក្នុងប្រព័ន្ធព្រមានទុកជាមុន និងការការពារសន្តិសុខតាមប្រព័ន្ធអ៊ីនធឺណិត  ដើម្បីពង្រឹងសន្តិសុខសមុទ្រឱ្យកាន់តែមានភាពធន់។

៤. ការបង្កើតមជ្ឈមណ្ឌលស្រាវជ្រាវសមុទ្រ (Brain Trust) ដើម្បីដោះស្រាយ «គម្លាតចំណេះដឹង» កម្ពុជាគួរមានមជ្ឈមណ្ឌលស្រាវជ្រាវជាតិមួយដែលផ្តោតលើច្បាប់សមុទ្រ (UNCLOS) ការសិក្សាព្រំដែន យុទ្ធសាស្ត្រសេដ្ឋកិច្ចពណ៌ខៀវ និងការការពារបរិស្ថានសមុទ្រ។ មជ្ឈមណ្ឌលនេះនឹងក្លាយជាកន្លែងបណ្តុះបណ្តាលអ្នកជំនាញវ័យក្មេង និងតភ្ជាប់កម្ពុជាទៅកាន់បណ្តាញអ្នកជំនាញអន្តរជាតិ។

ជារួម ឯកឧត្តមបណ្ឌិត ឈាង វណ្ណារិទ្ធ បានសង្កត់ធ្ងន់ថា បញ្ហាប្រឈមសមុទ្ររបស់កម្ពុជាមិនមែនត្រឹមតែជាកង្វះគ្រឿងបរិក្ខារប៉ុណ្ណោះទេ ប៉ុន្តែគឺជាការទាមទារឱ្យមានការកែទម្រង់ប្រព័ន្ធអភិបាលកិច្ច និងការបង្កើនចំណេះដឹងផ្នែកយុទ្ធសាស្ត្រ ដើម្បីធានាបាននូវសន្តិសុខ និងការអភិវឌ្ឍសេដ្ឋកិច្ចសមុទ្រប្រកបដោយចីរភាព៕

ដោយ៖ ប៊ុនរិទ្ធ , ប្រភព៖រដ្ឋសភា