AKP ភ្នំពេញ ថ្ងៃទី២៧ ខែកក្កដា ឆ្នាំ២០២៥ -- ដើម្បីធ្វើការលើកទឹកចិត្តដល់កងកម្លាំងឈរជើងការពារព្រំដែន រារាំងពីការឈ្លានពានរបស់ខ្មាំងសត្រូវថៃ នៅព្រឹកថ្ងៃសៅរ៍១កើតខែស្រាពណ៍ឆ្នាំម្សាញ់សប្ដស័កព.ស២៥៦៩ ត្រូវនឹងថ្ងៃទី២៦ខែកក្កដាឆ្នាំ២០២៥ នៅសាលាខេត្តតាកែវចាប់ផ្ដើមពីព្រឹករហូតដល់ល្ងាច ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ បានអញ្ជើញទទួលអំណោយជាគ្រឿងឧបភោគ បរិភោគ និងថវិកា ពីមន្ត្រីរាជការ ព្រះសង្ឃ អាជីវករ វិស័យឯកជន និងបងប្អូនប្រជាពលរដ្ឋ ដើម្បីនាំយកទៅផ្ដល់ជូននិងលើកទឹកចិត្ត ដល់ កងកម្លាំងជួរមុខ និងបងប្អូនប្រជាពលរដ្ឋកំពុងភៀសខ្លួន ដោយសារការឈ្លានពានរបស់កងទ័ពថៃ បានវាយសម្រុកលើទឹកដីខ្មែរ ។

នៅក្នុងឱកាសនោះ ឯកឧត្តម វ៉ី សំណាងអភិបាលនៃគណៈអភិបាលខេត្តតាកែវ ក៏បានសម្ដែងនូវការអរគុណចំពោះទឹកចិត្តដ៏សប្បុរស របស់មន្ត្រីរាជ ព្រះសង្ឃ អាជីវករ វិស័យឯកជន និងបងប្អូនប្រជាពលរដ្ឋទាំងអស់ក្នុងខេត្តតាកែវ ដែលមានទឹកចិត្តស្នេហាជាតិ ដោយបានចំណាយនូវធនធានផ្ទាល់ខ្លួន ទាំងថវិកា និងសម្ភារ:ជាស្បៀងអាហារ ឧបត្តម្ភដលវីរកងទ័ពនៅសមរភូមិមុខ។សកម្មភាពនេះបានបញ្ជាក់ថា ខ្មែរកំពុងរួបរួមគ្នាជាខ្មែតែមួយ តាមអនុសាសន៍ដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ដើម្បីដេញចោរសៀមឈ្លានពានទឹកដីកម្ពុជា។

ឯកឧត្តម វ៉ី សំណាង បានថ្លែងបន្តថា ទឹកចិត្តស្នេហាជាតិរបស់បងប្អូនប្រជាពលរដ្ឋគឺជាកម្លាំងចិត្តដ៏មោះមុតចំពោះរាជរដ្ឋាភិបាល ជាពិសេសបងប្អូនកងកម្លាំងប្រដាប់អាវុធដែលកំពុងតស៊ូប្រយុទ្ធនៅសមរភូមិ។ហើយយើងទាំងអស់គ្នាសូមបួងសួងដល់ទេវតា ជួយបីបាច់ថែរក្សាដល់បងប្អូនកងទ័ពនៅសមរភូមិមុខ ឱ្យទទួលជ័យជំនះលើសត្រូវឈ្លានពាន ដើម្បីការពារបូរណភាពទឹកដីរបស់កម្ពុជា ឱ្យបានគង់វង្សរុងរឿងតទៅមុខទៀតផងដែរ។

ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ បានមានប្រសាសន៍បន្ថែមថា ការចូលរួមជាគ្រឿងឧបភោគបរិភោគនិងថវិកានាពេលនេះ គឺជាការបង្ហាញឱ្យឃើញពីទឹកចិត្ត ខ្មែរស្រលាញ់ខ្មែរ ពីបងប្អូនប្រជាពលរដ្ឋនៅទូទាំងខេត្តតាកែវ ក៏ដូចជាទូទាំងប្រទេសនិងក្រៅប្រទេស។ដែលនេះជាផ្នែកមួយដ៏មានសារសំខាន់ សម្រាប់ជួយគាំទ្រនិងលើកទឹកចិត្តដល់បងៗកងទ័ព ដ៏អង់អាចក្លាហានលះបង់សាច់ស្រស់ឈាមស្រស់ ដើម្បីបុព្វហេតុជាតិមាតុភូមិ។ក្នុងការការពារទឹកដីពីការឈ្លានពានរបស់ កងទ័ពសៀម បានបង្កឱ្យមានការផ្ទុះអាវុធតតាំងដាក់គ្នាជាច្រើនថ្ងៃកន្លងមកហើយ៕

 ដោយ៖ អ៊ុច សៀង