AKP សៀមរាប ថ្ងៃទី១៤ ខែកក្កដា ឆ្នាំ២០២៥

ប្រទេសកម្ពុជា នឹងធ្វើជាម្ចាស់ផ្ទះរៀបចំសន្និសីទកំពូលប្រព័ន្ធផ្សព្វផ្សាយអាស៊ីលើកទី២០ (20th Asia Media Summit -AMS) នៅលើទឹកដីអង្គរ ខេត្តសៀមរាប នាចុងខែកក្កដា ឆ្នាំ២០២៥ ខាងមុខ ក្រោមប្រធានបទ "អបអរសាទរពីរទសវត្សរ៍នៃឧត្តមភាព និង លើសពីនេះ"  ដែលមានអ្នកសារព័ត៌មានចូលរួមមកពីប្រទេសជាសមាជិកចំនួន ៥០ ប្រទេសនៅទូទាំងពិភពលោក និងដៃគូកិច្ចសហប្រតិបត្តិការ ព្រមទាំងអង្គការអន្តរជាតិដែលចូលរួមជាមួយប្រព័ន្ធផ្សព្វផ្សាយផងដែរ។

តាមរយៈសន្និសីទកំពូលប្រព័ន្ធផ្សព្វផ្សាយអាស៊ីលើកទី២០នេះ កម្ពុជានឹងទទួលបានកំណើនភ្ញៀវទេសចរកាន់តែច្រើន ព្រោះថា នៅក្នុងព្រឹត្តិការណ៍នេះ មានអ្នកដែលចូលរួមគឺសុទ្ធតែជាថ្នាក់ដឹកនាំអន្តរជាតិ និងអ្នកសារព័ត៌មានបរទេសជាច្រើន មកពីប្រទេសជាសមាជិកជិត៥០ប្រទេស ដែលនឹងបានទស្សនាផ្ទាល់ និងមើលឃើញនូវទិដ្ឋភាពជាក់ស្ដែងដ៏អស្ចារ្យនៃប្រាង្គប្រាសាទបុរាណខ្មែរ នៅក្នុងខេត្តសៀមរាប។

មន្រ្ដីជំនាញផ្នែកទេសចរណ៍នៅក្នុងខេត្ដសៀមរាបបានឱ្យដឹងថា ការរៀបចំសន្និសីទកំពូលប្រព័ន្ធផ្សព្វផ្សាយអាស៊ីលើកទី២០ នៅក្នុងខេត្ដសៀមរាបនេះគឺជាឱកាសមួយដ៏ល្អ សម្រាប់ខេត្ដសៀមរាប ក៏ដូចជាប្រទេសកម្ពុជាក្នុងការបង្ហាញនូវសក្ដានុពលទេសចរណ៍ ផលិតផលទេសចរណ៍ និងសេវាកម្មទេសចរណ៍ជូនដល់ភ្ញៀវទេសចរ អន្ដរជាតិដែលបានអញ្ជើញមកចូលរួមក្នុងកិច្ចប្រជុំនេះ ដើម្បីផ្សព្វផ្សាយអំពីកម្ពុជាទៅកាន់ពិភពលោកបានកាន់តែទូលំទូលាយថែមទៀត។

លោក ធិម សេរីវុឌ្ឍ ប្រធានស្តីទីមន្ទីរទេសចរណ៍ខេត្តសៀមរាបបានបញ្ជាក់ថា ជាការពិតណាស់នៅពេលដែលមានការរៀបចំសន្និសីទកំពូលប្រព័ន្ធផ្សព្វផ្សាយអាស៊ីលើកលើកទី២០ នឹងធ្វើឡើងនៅខេត្តសៀមរាប ដែលជាគោលដៅទេសចរណ៍ ដ៏សំខាន់របស់កម្ពុជា។ លោកបានកត់សម្គាល់ឃើញថា សមាជិកនៃសន្និសីទកំពូលប្រព័ន្ធផ្សព្វផ្សាយនេះ ក្រៅពីការចូលរួមក្នុងសន្និសីទនេះ ក៏នឹងបានទៅដើរកម្សាន្តនៅតាមរមណីយដ្ឋានទេសចរណ៍នានា ក្នុងខេត្តសៀមរាប និងបានជួយផ្សព្វផ្សាយពីផលិតផលទេសចរណ៍ ក៏ដូចជាសម្បទាទេសចរណ៍ ព្រមទាំង អ្វីៗដែលយើងផ្គត់ផ្គង់ទៅដល់អ្នកទេសចរ មានរូបភាពពិតប្រាកដច្បាស់ ដោយអ្នកសារព័ត៌មានល្បីៗទាំងអស់ បានមកដល់ទីតាំងប្រាសាទដ៏ល្អអស្ចារ្យរបស់យើងដោយផ្ទាល់។ លោកប្រធានស្ដីទីបានបន្ដថា ក្រៅពីនេះពួកគេក៏បានថតរូបភាពដោយផ្ទាល់ ដើម្បីធ្វើការផ្សព្វផ្សាយទៅកាន់ពិភពលោក ឱ្យបានឃើញពីអំពីសក្ដានុពលទេសចរណ៍និងទេសចរណ៍ដ៏ទាក់ទាញរបស់កម្ពុជា។

លោក ធិម សេរីវុឌ្ឍ បានគូសបញ្ជាក់ថា៖ «សម្រាប់សេវាកម្មស្នាក់នៅ ម្ហូបអាហារ គឺយើងបានត្រៀមខ្លួនរួចជាស្រេចសម្រាប់ទទួលគណៈប្រតិភូដែលនឹងអញ្ជើញមកចូលរួមនៅក្នុងសន្និសីទកំពូលប្រព័ន្ធផ្សព្វផ្សាយអាស៊ីលើក​ទី២០នេះ។ ខេត្តសៀមរាប មានសេវាស្នាក់មានរហូតដល់ផ្កាយ៥អន្តរជាតិ ហើយកន្លងមកយើងបានទទួលព្រឹត្តិការណ៍ធំៗថ្នាក់ជាតិ ថ្នាក់អន្តរជាតិ ដែលមានប្រមុខរដ្ឋាភិបាលក្រៅប្រទេសជាច្រើន កំពូលៗបានមកដល់ទីនេះ»។ លោកលើកឡើងថា សេវាស្នាក់នៅ ក៏ដូចជាសេវាម្ហូបអាហារ សេវាផ្សេងៗទៀត គឺមិនជាបញ្ហាចោទទេ ដោយសារធ្លាប់ទទួលនៃពិធីធំៗរាប់មិនអស់មកហើយ ដែលក៏ក្រសួងទេសចរណ៍នៅតែពង្រឹងជានិច្ច និងការបណ្តុះបណ្តាលបន្ថែម ឬត្រៀមបន្ថែម អំពីអាជីវកម្មនីមួយៗ ហើយក៏ដាក់ចំណាត់ថ្នាក់ជាបន្តបន្ទាប់នៃអាជីវកម្មទាំងអស់ រហូតកំណត់ថា ផលិតផលមួយស្តង់ដារមួយ។​ លោកបានបន្ថែមថា៖ «យើងក៏មានអាហារ ហាឡាលឥស្លាម អាហារបែបជប៉ុន ចិន កូរ៉េ និយាយរួមគឺថា បន្ទាប់ពីរាជធានីភ្នំពេញមកគឺខេត្តសៀមរាប មានសម្បទាសម្រាប់ផ្គត់ផ្គង់ទៅដល់អ្នកទេសចរគ្រប់គ្រាន់ មិនខ្វះខាត ឬក៏លំបាកនោះទេ មានគ្រប់បែបយ៉ាង ហើយគុណភាពទទួលយកបានផងដែរ។ ដូច្នេះខេត្តសៀមរាប សូមស្វាគមន៍សមាជិកនៃសន្និសីទកំពូលប្រព័ន្ធផ្សព្វ​ផ្សាយអាស៊ីទាំងអស់ ដោយក្តីរីករាយ។»

ពាក់ព័ន្ធនឹងការរៀបចំសន្និសីទកំពូលប្រព័ន្ធផ្សព្វផ្សាយអាស៊ីលើកទី២០ នេះដែរ ឯកឧត្ដម ប៉ាង ណាត អនុរដ្ឋលេខាធិការក្រសួងព័ត៌មាន និងជាអនុប្រធានអចិន្ត្រៃយ៍លេខាធិការដ្ឋានរៀបចំសន្និសីទកំពូល AMS លើកទី២០ បានមានប្រសាសន៍បានឱ្យដឹថា សន្និសីទកំពូលសារព័ត៌មានអាស៊ីគឺជាការប្រជុំជារៀងរាល់ឆ្នាំរបស់ផលិតករព័ត៌មាន រួមមានវិទ្យុ ទូរទស្សន៍ កាសែត អ្នកផលិតសម្ភារប្រព័ន្ធព័ត៌មាននិងអ្នកពាក់ព័ន្ធមួយចំនួនទៀត។ ឯកឧត្ដមបញ្ជាក់ថា នេះគឺជាការជួបជុំប្រចាំឆ្នាំ ដើម្បីផ្លាស់ប្ដូរបទពិសោធន៍ ដើម្បីផ្ទេរចំណេះដឹង ទៅដល់អ្នកជំនាន់ក្រោយ និងដើម្បីគិតគូរពិចារណាថា តើការរីកចម្រើននៃប្រព័ន្ធបច្ចេកវិទ្យា ការដោះស្រាយវិបត្តិលើប្រព័ន្ធផ្សព្វ​ផ្សាយនៅឆ្នាំកន្លងមក តើយើងធ្វើយ៉ាងណាដែរ។ ឯកឧត្ដមអនុរដ្ឋលេខាធិការបានថ្លែងបញ្ជាក់ថា កិច្ចប្រជុំនេះ គឺជាការជួបជុំគ្នា ដើម្បីនិយាយអំពីកិច្ចការងារ ហើយដំណោះស្រាយ ប្រទេសនីមួយៗដើរតួនាទីដូចម្ដេច ដើម្បីអភិវឌ្ឍន៍វិស័យផ្សព្វផ្សាយរបស់ខ្លួន។

ឯកឧត្ដម ប៉ាង ណាត បានថ្លែងឱ្យដឹងទៀតថា ក្នុងកិច្ចប្រជុំនេះដែរ ក៏មានព្រឹត្តិ​ការ​ណ៍​អមមួយទៀត ក្នុងនោះ ក៏មានព្រឹត្តិការណ៍អមក្រោយសន្នីសីទគឺដំណើរទស្សនកិច្ចតំបន់ វប្បធម៌ និងទេសចរណ៍ដែលយើងបានត្រៀមលក្ខណៈដូចជាឱ្យអ្នកទេសចរបានទស្សនាប្រាសាទអង្គរវត្ត និងទស្សនកិច្ចកន្លែងផ្សេងៗទៀតដែលជាប្រពៃណី វប្បធម៌ និងទេសចរណ៍របស់កម្ពុជាយើង។ ឯកឧត្ដមក៏បានអះអាងថា៖ «នេះជាមោទនភាពមួយសម្រាប់ប្រទេសកម្ពុជាយើងដែលត្រូវបានវិទ្យាស្ថានអភិវឌ្ឍន៍ប្រព័ន្ធផ្សាយអាស៊ីប៉ាស៊ីហ្វិក(AIBD) បានអនុញ្ញាតឱ្យកម្ពុជាធ្វើជាម្ចាស់ផ្ទះលើកទីពីរ ព្រោះដោយសារប្រទេសកម្ពុជាមានសក្ដានុពលគ្រប់គ្រាន់នៅក្នុងកិច្ចប្រជុំនេះ»។

សូមជម្រាបជូនផងដែរថា សន្និសីទកំពូលសារព័ត៌មានអាស៊ីហៅកាត់ថា AMS គឺជាការជួបជុំគ្នារបស់ថ្នាក់ដឹកនាំ និងមន្ត្រីជំនាញៗនៃប្រព័ន្ធផ្សព្វផ្សាយ ដែលបានធ្វើឡើងជារៀងរាល់ឆ្នាំ ដោយកិច្ចប្រជុំលើកទី១នៅប្រទេសម៉ាឡេស៊ី។ សម្រាប់កិច្ចប្រជុំលើកទី២០នេះ ក្នុងនាមជាម្ចាស់ផ្ទះក្រសួងព័ត៌មាននឹងផ្ដោតសំខាន់ទៅលើ ការប្រយុទ្ធប្រឆាំងព័ត៌មានក្លែងក្លាយ។នេះជាលើកទី២ហើយដែលប្រទេសកម្ពុជាមាន កិត្តិយសដ៏ខ្ពង់ខ្ពស់បានទទួលធ្វើជាម្ចាស់ផ្ទះ សន្និសីទកំពូលស្តីពីប្រព័ន្ធផ្សព្វផ្សាយអាស៊ីលើកទី២០ (20th Asia Media Summit) ។

កិច្ចប្រជុំសន្និសីទកំពូលសារព័ត៌មានអាស៊ីលើកទី២០ នឹងចាប់ផ្ដើមពីថ្ងៃទី២១ ដល់ថ្ងៃទី២៤ ខែកក្ដដា ឆ្នាំ២០២៥ នៅសណ្ឋាគារសុខា ក្នុងខេត្តសៀមរាប។ នៅក្នុងសន្និសីទ AMS លើកទី២០នេះ បណ្តារដ្ឋមន្រ្តីព័ត៌មានទំាងអស់ នឹងលើកជាយន្តការនានាដើម្បីដោះស្រាយបញ្ហាព័ត៌មានក្លែងក្លាយ ឬព័ត៌មានមិនពិតដែលបង្កឡើងដោយពួកក្រុមទុច្ចរិត ព្រោះការប្រយុទ្ធប្រឆំាងព័ត៌មានមិនពិតនេះមានសារៈសំខាន់ណាស់ ដើម្បីទប់ស្កាត់បញ្ហាអសន្តិសុខ និងភាពវឹកវរក្នុងសង្គមបានទាន់ពេលវេលាខណៈដែលព័ត៌មានក្លែងក្លាយបាននិងវាយលុកច្រើនឡើងៗពី១ថ្ងៃទៅមួយថ្ងៃ។

ក្នុងឱកាសនោះ ឯកឧត្ដម ប៉ាង ណាត អនុរដ្ឋលេខាធិការក្រសួងព័ត៌មាន និងជាអនុប្រធានអចិន្ត្រៃយ៍លេខាធិ​ការ​ដ្ឋានរៀបចំសន្និសីទកំពូល AMS លើកទី២០បានបញ្ជាក់ឱ្យដឹងទៀតថា៖ «ក្នុងនាមជាម្ចាស់ផ្ទះនៃកិច្ចប្រជុំសន្និសីទកំពូលសារព័ត៌មានអាស៊ីលើកទី២០នៅខេត្តសៀមរាប កម្ពុជាមានគោលដៅសំខាន់ៗជាច្រើនដូចជា ១. លើកកម្ពស់មុខមាត់ជាតិ និងវិស័យទេសចរណ៍  និងវប្បធម៌ ។ ២. ពង្រឹងកិច្ចសហប្រតិបត្តិការប្រព័ន្ធផ្សព្វផ្សាយ និងប្រយុទ្ធប្រឆាំងព័ត៌មានក្លែងក្លាយ»៕

ដោយ៖ ឃុត សៅ និង រិទ្ធី