AKP ភ្នំពេញ ថ្ងៃទី៥ ខែឧសភា ឆ្នាំ២០២៦--ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា រសៀលថ្ងៃទី០៤ ខែឧសភា ឆ្នាំ២០២៦ បានដឹកនាំកិច្ចប្រជុំជាមួយក្រុមនានានៃព្រឹទ្ធសភា ដើម្បីពិនិត្យសំណើររបស់ក្រុមសមាជិកព្រឹទ្ធសភាប្រចាំភូមិភាគទាំង៨។

យោងតាមស្មារតីអង្គប្រជុំកន្លងមក និងឆន្ទៈនយោបាយរបស់ថ្នាក់ដឹកនាំ ឯកឧត្តមបណ្ឌិត បានដាក់ចេញនូវចំណុចយុទ្ធសាស្រ្តចំនួន ៣ រួមមាន៖ ១. ពង្រឹងអភិបាលកិច្ច ត្រូវយកចិត្តទុកដាក់ខ្ពស់លើលក្ខណៈសម្បត្តិ និងសមត្ថភាពរបស់សមាជិកក្រុមប្រឹក្សា ជាពិសេស មេឃុំ ចៅសង្កាត់ ដែលជាអ្នកបម្រើប្រជាពលរដ្ឋផ្ទាល់។ ២. អំពាវនាវឱ្យគ្រប់គណបក្សនយោបាយបង្កើនសមាសភាពស្ត្រីក្នុងបញ្ជីបេក្ខជនឈរឈ្មោះបោះឆ្នោតក្រុមប្រឹក្សាឃុំ-សង្កាត់ ក្នុងលំដាប់លេខរៀងដែលអាចជាប់ឆ្នោត ខណៈបច្ចុប្បន្នមានចំនួន ១២៥ ឃុំ/សង្កាត់ ដែលមិនមានស្រ្តីជាសមាជិកក្រុមប្រឹក្សា និង ៣. ស្នើឱ្យសមាជិកព្រឹទ្ធសភាចូលរួមត្រួតពិនិត្យ និងដោះស្រាយបញ្ហាដីធ្លីដែលនៅមានភាពខ្វះចន្លោះនៅតាមភូមិភាគមួយចំនួនជូនប្រជាពលរដ្ឋ។

ក្នុងកិច្ចប្រជុំនេះឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា បានវាយតម្លៃខ្ពស់ចំពោះអង្គប្រជុំទាំងមូល ដែលបានខិតខំស្វែងយល់បញ្ហាប្រឈម និងរកដំណោះស្រាយជូនប្រជាពលរដ្ឋ ជាពិសេស សំណើទាំងឡាយណាដែលស្នើឡើងដោយក្រុមប្រឹក្សាឃុំ សង្កាត់៕

ដោយ ចាន់ សុភឿន (ប្រភព៖ ព្រឹទ្ធសភា)