AKP ព្រះវិហារ ថ្ងៃទី០៥ ខែឧសភា ឆ្នាំ២០២៦--នៅសាលប្រជុំសាលាខេត្តព្រះវិហារ មានកិច្ចប្រជុំពិភាក្សារួមគ្នា រវាងខេត្តចំនួន៤ គឺខេត្តព្រះវិហារ ខេត្តកំពង់ធំ ខេត្តស្ទឹងត្រែង និងខេត្តក្រចេះ ដើម្បីទំនាក់ទំនងគ្នាពង្រឹងយន្ដការក្នុងកិច្ចការពារតំបន់ការពារធម្មជាតិ «ព្រៃឡង់» ឱ្យកាន់តែរឹងមាំ និងមានប្រសិទ្ធភាព ។ កិច្ចប្រជុំពិភាក្សានេះ ធ្វើឡើងកាលពីថ្ងៃចន្ទទី០៤ ខែឧសភា ឆ្នាំ២០២៦ ដែលមានការអញ្ជើញចូលរួមពី ឯកឧត្តមអភិបាលខេត្តទាំង៤ តំណាងបណ្ដាសហគមន៍តំបន់ការពារធម្មជាតិ«ព្រៃឡង់»ចំនួន២១សហគមន៍ក្នុងភូមិសាស្ត្រខេត្តទាំងបួន ព្រមទាំងមន្ត្រីពាក់ព័ន្ធជាច្រើនរូបទៀត ។

ឯកឧត្តម គីម រិទ្ធី អភិបាលខេត្តព្រះវិហារ និងឯកឧត្តមអភិបាលខេត្តទាំង៣ទៀតបានមានប្រសាសន៍ សំណេះសំណាលជាមួយបងប្អូនតំណាងបណ្ដាសហគមន៍តំបន់ការពារធម្មជាតិ «ព្រៃឡង់» ចំនួន២១សហគមន៍ ក្នុងភូមិសាស្ត្រខេត្តទាំងបួន ព្រមទាំងបានស្ដាប់នូវរបាយការណ៍ស្ដីពីវឌ្ឍនភាពនៃការគ្រប់គ្រង ព្រមទាំងបញ្ហាប្រឈមនានាដើម្បីស្វែងយល់ស៊ីជម្រៅអំពីឧបសគ្គដែលសហគមន៍បានជួបប្រទះនាពេលកន្លងមក ក្នុងបេសកកម្មការពារ និងអភិរក្សធនធានធម្មជាតិ។

ឯកឧត្តមបានបន្តថា កិច្ចប្រជុំពិភាក្សារួមគ្នានេះមានសារៈសំខាន់ណាស់ ដើម្បីផ្សារភ្ជាប់មនោសញ្ចេតនារវាងថ្នាក់ដឹកនាំខេត្ត ជាមួយបងប្អូនសហគមន៍ ក្នុងការបង្កើនកិច្ចសហការអន្ដរខេត្ត ព្រមទាំងស្វែងរកដំណោះស្រាយរួមគ្នាក្នុងកិច្ចការការពារគ្រប់គ្រងអភិរក្ស និងអភិវឌ្ឍន៍សហគមន៍ឱ្យមានចីរភាព ក៏ដូចផ្ដល់ការគាំទ្រ និងលើកទឹកចិត្តដល់បងប្អូនសហគមន៍ដែលជាកម្លាំងចលករយ៉ាងសំខាន់ក្នុងការការពារ និងអភិរក្សសម្បត្តិធម្មជាតិដ៏មានតម្លៃរបស់ជាតិឱ្យបានគង់វង្ស ៕ 

ដោយ ទិត ស្រ៊