AKP កំពង់ធំ ថ្ងៃទី៥ ខែឧសភា ឆ្នាំ២០២៦--លោក ហាក់ ម៉ុងហួត អភិបាលស្រុកនិងជាប្រធានគណៈបញ្ជាការឯកភាពរដ្ឋបាលស្រុកតាំងគោកកាលពីថ្ងៃទី០៤ ខែឧសភា ឆ្នាំ២០២៦ បានដឹកនាំកិច្ចប្រជុំប្រចាំខែមេសា និងដាក់ចេញផែនការថ្មីៗរបស់គណៈបញ្ជាការឯកភាពរដ្ឋបាលស្រុកសំដៅធ្វើយ៉ាងណាធានាឱ្យបាននូវសុវត្ថិភាព សន្តិសុខ សណ្តាប់ធ្នាប់នៅក្នុងមូលដ្ឋានជាពិសេសទប់ស្កាត់ឱ្យខានតែបានមិនឱ្យមានដាច់ខាតឧក្រិដ្ឋជន Online Scams។

លោក ហាក់ ម៉ុងហួត បានបញ្ជាក់ឱ្យដឹងថា បទល្មើសឆបោកតាមប្រព័ន្ធបច្ចេកវិទ្យា (Online Scams) មិនត្រឹមតែជាអន្ទាក់ឆក់ប្លន់យកទ្រព្យសម្បត្តិដែលជាញើសឈាមរបស់ប្រជាពលរដ្ឋប៉ុណ្ណោះទេ តែវាកំពុងបំផ្លាញកិត្តិយសសេចក្តីថ្លៃថ្នូរ និងមុខមាត់របស់ប្រទេសជាតិ។ Online Scamsគឺជាការក្លែងបន្លំតាមសេវា Internet ដែលប្រើប្រាស់ល្បិចបោកបញ្ឆោតបន្លំលួចយកប្រាក់លួចយកព័ត៌មានផ្ទាល់ខ្លួនឬធនធានសំខាន់ផ្សេងៗ របស់យើងទាំងឡាយ។

ទោះបីជាស្រុកតាំងគោកមិនធ្លាប់មាននូវបទល្មើសឆបោកតាមប្រព័ន្ធបច្ចេកវិទ្យាក៏ដោយ លោក ហាក់ ម៉ុងហួតបានដាក់ចេញវិធានការសំខាន់ៗ និងបានណែនាំអាជ្ញាធរ ព្រមទាំងកងកម្លាំងមានសមត្ថកិច្ចពាក់ព័ន្ធ គ្រប់ប្រភេទ បងប្អូនប្រជាពលរដ្ឋ និងសាធារណជនទាំងអស់ក្នុងភូមិសាស្ត្រស្រុកតាំងគោក មេត្តាចូលរួមសហការយ៉ាងមុតមាំជាមួយអាជ្ញាធរមានសមត្ថកិច្ចដើម្បីរួមគ្នាទប់ស្កាត់ និងបោសសម្អាតឧក្រិដ្ឋកម្មonline scams កុំឱ្យមាននៅក្នុងស្រុកតាំងគោកនោះឡើយ។

ការឆបោកតាមប្រព័ន្ធបច្ចេកវិទ្យា(Online Scams)បាននិងកំពុងរីករាលដាលយ៉ាងខ្លាំងនិងបានគំរាមកំហែងដល់បណ្តាប្រទេសនានាលើសកលលោកមិនមែនមានតែនៅក្នុងប្រទេសកម្ពុជាមួយប៉ុណ្ណោះទេ។Online Scams អាចបង្កផលវិបាកយ៉ាងធ្ងន់ធ្ងរ ដល់ប្រទេសមួយ ទាំងលើវិស័យសេដ្ឋកិច្ចសង្គមនិងកេរ្តិ៍ឈ្មោះ។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជាបានបញ្ជាក់ថា ការឆបោកតាមប្រព័ន្ធបច្ចេកវិទ្យាគឺជាបញ្ហាតំបន់និងសកលដែលមានលក្ខណៈស្មុគស្មាញ និងប្រទាក់ក្រឡាគ្នាហើយកម្ពុជាជាអ្នករងគ្រោះនិងត្រូវខូចឈ្មោះលើឆាកអន្តរជាតិ។ដូច្នេះយុទ្ធនាការបង្រ្កាបការឆបោកតាមប្រព័ន្ធបច្ចេកវិទ្យា (Online Scams)មិនមែនជាសកម្មភាពដែលធ្វើឱ្យល្អមើលឬធ្វើត្រឹមពិធីបុណ្យចូលឆ្នាំខ្មែរដូចមតិមួយចំនួនបានលើកឡើងនោះឡើយ ប៉ុន្តែនេះគឺជាឆន្ទៈពិតប្រាកដរបស់រាជរដ្ឋាភិបាលក្នុងការបោសសម្អាតផ្ទះរបស់ខ្លួនឱ្យបានស្អាត ពីព្រោះបញ្ហានេះបានប៉ះពាល់ដល់មុខមាត់ប្រទេសជាតិ និងសេដ្ឋកិច្ចសង្គមកម្ពុជា។រាជរដ្ឋាភិបាល មានឆន្ទៈប្រយុទ្ធប្រឆាំង ការឆបោកតាមប្រព័ន្ធបច្ចេកវិទ្យានេះយ៉ាងម៉ឺងម៉ាត់ ដោយមិនលើកលែងនិងមិនថយក្រោយជាដាច់ខាត៕

ដោយ ស៊ុម វណ្ណា