AKP កំពង់ធំ ថ្ងៃទី១៤ ខែកក្កដា ឆ្នាំ២០២៥--

លោក សាយ គឹមឡម អភិបាលស្រុកស្ទោង បានលើកឡើងថា ការទៅសួរសុខទុក្ខលើកទឹកចិត្តកងទ័ពជួរមុខព្រំដែនគឺជាការលើកកម្ពស់ស្មារតីជាតិនិយមក្នុងនាមសមរភូមិក្រោយ ក្នុងឱកាសដែលលោក និងសហការី ព្រមទាំងព្រះមន្ត្រីសង្ឃ និងសប្បុរសជនក្នុងស្រុកស្ទោង បានអញ្ជើញចុះសួរសុខទុក្ខលើកទឹកចិត្តដល់វីរកងទ័ពខ្មែរនៅជួរមុខភ្នំដងរែកតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់ថ្មដូន កាលពីថ្ងៃទី១៣ ខែកក្កដា ឆ្នាំ២០២៥។

ទាំងនេះសបញ្ជាក់ឱ្យឃើញពីការយកចិត្តទុកដាក់របស់លោកអភិបាលស្រុកស្ទោង ក្នុងការសម្រាលបន្ទុក ឬការលំបាកផ្សេងៗ និងលើកទឹកចិត្តវីរកងទ័ពដែលបានពលីនូវសាច់ស្រស់ឈាមស្រស់ និងកម្លាំងកាយចិត្តប្រកៀកស្មាគ្នា ការពារជាតិមាតុភូមិ ក្នុងនាមជាអ្នកសមរភូមិមុខ និងសមរភូមិក្រោយ ក្នុងការការពារបូរណភាពទឹកដីដ៏ស្រស់បំព្រងទឹកដីសុវណ្ណភូមិ នៃយើងមិនឱ្យមានការរំលោភបំពានឬការឈ្លានពាន និងបង្កអរិភាពឥតឈប់ឈរពីបរទេសណាមួយនោះឡើយ។

លោក សាយ គឹមឡម អភិបាលស្រុកស្ទោង បានគាំទ្រយ៉ាងពេញទំហឹងនូវជំហរឥតងាករេ និងភាពឈ្លាសវៃរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការនាំយកបញ្ហាប្រាសាទតាមាន់តូច ប្រាសាទតាមាន់ធំ ប្រាសាទតាក្របី និងតំបន់មុំបី ទៅកាន់តុលាការយុត្តិធម៌អន្តរជាតិ ( ICJ) ហើយព្រមទទួលយកនូវសាលក្រមឬយុត្តាធិការរបស់តុលាការយុត្តិធម៌អន្តរជាតិមួយនេះផងដែរ។ 

លោកសាយ គឹមឡម បានថ្លែងអំណរព្រះគុណ និងអរគុណជាអនេកដល់ព្រះមន្ត្រីសង្ឃស្រុក ស្ទោងព្រមទាំងសប្បុរជនជិតឆ្ងាយដែលបានឧបត្ថម្ភគាំទាំងសម្ភារ ថវិកាគ្រឿងឧបភោគបរិភោគនិងបាននិមន្តនិងអញ្ជើញចូលរួមចែកជូនផ្ទាល់ដល់កងវីរកងទ័ពក្នុងឱកាសនោះ ដែលជាការចូលរួមចំណែកយ៉ាងធំធេងក្នុងការ ការពារជាតិមាតុភូមិ និងលើកកម្ពស់ស្មារតីជាតិនិយម។

សូមបញ្ជាក់ថានៅក្នុងឱកាសនេះលោកអភិបាលស្រុកបានឧបត្ថម្ភនូវគ្រឿងឧបភោគបរិភោគមួយចំនួនធំដល់វីរកងទ័ពចំនួន៥វរសេនាតូច រួមមាន៖ អង្ករចំនួន២២០០គីឡូក្រាម  មី៦០កេស ឆៃប៉ូវ៧០គីឡូក្រាម អន្សម១២០០ អន្សមចាំង១០០ចង្កោម  សាច់ក្រក៥០គីឡូក្រាម ត្រីងៀត ត្រីឆ្អើរចំនួន៧៥គីឡូក្រាម និងថវិកាមួយចំនួនផងដែរ៕

ដោយ ស៊ុម វណ្ណា