AKP កំពង់ធំ ថ្ងៃទី១៤ ខែកក្កដា ឆ្នាំ២០២៥--

សាខាកាកបាទក្រហមកម្ពុជាខេត្តកំពង់ធំ នាព្រឹកថ្ងៃទី១៤ ខែកក្កដា ឆ្នាំ២០២៥ បន្តចុះផ្សព្វផ្សាយស្ដីអំពីរួមគ្នាជាមួយកាកបាទក្រហមកម្ពុជាដើម្បីសហគមន៍មានសុខភាពល្អ និងមានភាពធន់នឹងអាកាសធាតុ ក្រោមការសម្របសម្រួលរបស់លោកស្រី ឡេង សុឃីម នាយិការងសាខាកាកបាទក្រហមកម្ពុជាខេត្តកំពង់ធំ មន្ត្រីក្រុមប្រតិបត្តិ លោក ម៉ៃ វុន មន្ត្រីអនុសាខា មណ្ឌលសុខភាពនៅបរិវេណសាលាបឋមសិក្សាសំបូរ ស្រុកប្រាសាទសំបូរ ខេត្តកំពង់ធំ ដោយមានការចូលរួមពីប្រជាពលរដ្ឋចំនួន៥៥នាក់។

ក្នុងឱកាសនោះ លោកស្រី ឡេង សុឃីម បានពាំនាំនូវប្រសាសន៍ផ្ដាំផ្ញើសាកសួរសុខទុកពីចម្ងាយអំពីសំណាក់ ឯកឧត្តម នួន ផារ័ត្ន ប្រធានគណៈកម្មាធិការកាកបាទក្រហមកម្ពុជាខេត្តកំពង់ធំ ជូនដល់ប្អូនៗដែលមានវត្តមានទីនេះទាំងអស់។ គោលបំណងក្នុងការផ្សព្វផ្សាយនេះគឺដើម្បីឱ្យប្អូនៗដែលជាយុវជនកាកបាទក្រហមនិងសិស្សានុសិស្សទាំងអស់យល់ដឹងអំពីជំងឺឆ្លង និងជំងឺមិនឆ្លងដែលប្រទេសកម្ពុជាយើងបច្ចុប្បន្នកំពុងមានការព្រួយបារម្ភជាខ្លាំង និងតម្រូវឱ្យប្អូនៗទាំងអស់ចូលរួមទប់ស្កាត់និងការពារផ្ដោតទៅលើជំងឺឆ្លងដូចជាជំងឺ covid-១៩ ជំងឺអេដស៍ ជំងឺរបេង ដែលកំពុងបន្តកើតជារៀងរាល់ថ្ងៃ។ ជាពិសេសដើម្បីអបអរសាទរខួបទី១៦២ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ២០២៥ ក្រោមមូលបទ "រួមគ្នាស្ម័គ្រចិត្តដើម្បីសហគមន៍មានសុខភាពល្អ និងមានភាពធន់នឹងអាកាសធាតុ" និងគម្រប់ខួប៧០ឆ្នាំរបស់កាកបាទក្រហមកម្ពុជា។ 

ដើម្បីឱ្យសហគមន៍មានសុខភាពល្អយើងត្រូវដឹងអំពីជំងឺដែលមិនឆ្លង៤ប្រភេទធំៗ ដែលកំពុងតែកើតមានឡើងជារៀងរាល់ថ្ងៃមានដូចជា ជំងឺមហារីក ជំងឺទឹកនោមផ្អែម ជំងឺលើសឈាមជំងឺផ្លូវដង្ហើមរ៉ាំរ៉ៃ ដែលវាកើតឡើងតាមរបបអាហារប្រចាំថ្ងៃ ផ្អែម  ប្រៃ និងខ្លាញ់ជាដើម ស្របតាមទិសស្លោក "ស្រឡាញ់ខ្លួនស្ងួនចំណី"។ លោកស្រីបានផ្តាំផ្ញើដល់អ្នកចូលរួមទាំងអស់ ដើម្បីឱ្យសហគមន៍មានភាពធន់នឹងអាកាសធាតុសូមចូលរួមរៀនបន្សាំខ្លួន និងចូលរួមកាត់បន្ថយដូចជា៖ ១. ចូលរួមកាត់បន្ថយការប្រើប្រាស់ថង់ប្លាស្ទិក ២. ចូលរួមដាំកូនឈើនៅតាមទីសាធារណៈ ៣.មិនដុត ឬកប់សំបកដបជ័រក្នុងដី។

ក្នុងឱកាសនោះ លោកស្រី ឡេង សុខឃីមបានផ្សព្វផ្សាយបន្ថែមអំពីវិធានការការពារជំងឺគ្រុនឈាម ការជួយសង្គ្រោះបឋមជនរងគ្រោះស្លាក់ និងវិធីអបឆ្អឹងកំភួនដៃ និងវិធីការពាររន្ទះ សុវត្ថិភាពចរាចរណ៍ផ្លូវគោក។ ទន្ទឹមនឹងនេះក្រុមការងារទាំងអស់បានចុះដាក់ថ្នាំអាបេតតាមពាងទឹក អាងទឹក ជូនប្រជាពលរដ្ឋបានចំនួន១៦ខ្នងផ្ទះ ស្ថិតនៅភូមិឃុំសំបូរ ឃុំសម្បូរណ៍ ស្រុកប្រាសាទសំបូរផងដែរ៕

ដោយ ស៊ុម វណ្ណា