AKP ព្រះវិហារ ថ្ងៃទី ២៧ ខែមិថុនា ឆ្នាំ២០២៥ -- ដើម្បីផ្ដល់ភាពងាយស្រួលមិនចាំទិញបន្លែ ផ្លែឈើមកពីខាងក្រៅនោះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាកម្ពុជាបានជំរុញឱ្យប្រជាពលរដ្ឋរស់នៅក្នុងខេត្តព្រះវិហារ ខិតខំធ្វើកសិកម្ម ដូចជាការដាំបន្លែ និងចិញ្ចឹមសត្វសម្រាប់ផ្គត់ផ្គង់កងកម្លាំងចៀសវាងការទិញយកមកពីខាងក្រៅ។

ថ្លែងក្នុងឱកាសជួបសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ/សង្កាត់ ក្នុងខេត្តព្រះវិហារ នាព្រឹកថ្ងៃទី២៧ ខែមិថុនា ឆ្នាំ២០២៥ សម្តេចតេជោ ហ៊ុន សែន បានមានប្រសាសន៍ស្នើសុំឱ្យអាជ្ញាធរខេត្តព្រះវិហារ ធ្វើកិច្ចការដែលទាក់ទងនឹងការផលិត ផ្គត់ផ្គង់កងទ័ពដែលមកឈរជើងក្នុងខេត្តព្រះវិហារ។ សម្តេចតេជោបានថ្លែងបញ្ជាក់ថា បើចង់បានទេសចរណ៍មកដើម្បីចាយលុយក្នុងទឹកដីខេត្តព្រះវិហារ ខេត្តត្រូវរៀបចំការផលិត ជាពិសេសសមាជិកក្រុមប្រឹក្សាឃុំ សង្កាត់ ចូលរួមអប់រំឱ្យពលរដ្ឋរបស់ខ្លួន ឱ្យរៀបចំផែនការដាំដុះ ឱ្យគាត់ដាំអ្វីដែលជាសេចក្តីត្រូវការរបស់កងទ័ព សម្រាប់ទទួលទានប្រចាំថ្ងៃ ហើយមេភស្តុភារបស់យោធានៅគ្រប់អង្គភាពកុំទៅទិញបន្លែពីភ្នំពេញ ឬទិញពីថៃ កុំទិញបន្លែពីណាផ្សេង គឺទិញពីប្រជាជនក្នុងខេត្តព្រះវិហារ។

ជាមួយគ្នានោះដែរសម្តេចតេជោ ប្រធានព្រឹទ្ធសភាក៏បានគូសបញ្ជាក់ថា ទេសចរគេមិនមកតែថ្ងៃអាទិត្យទេ គឺមកដេករាប់ខែ រាប់ឆ្នាំ ដូច្នេះ សម្តេចក៏បានសុំឱ្យប្រជាពលរដ្ឋក្នុងខេត្តព្រះវិហារជំរុញការដាំដុះបន្លែ ចិញ្ចឹមសត្វ ចិញ្ចឹមត្រី ដើម្បីផ្គត់ផ្គង់ដល់កងទ័ព ដែលឈរជើងក្នុងខេត្តព្រះវិហារ ។សម្តេចតេជោក៏សុំឱ្យបងប្អូនអ្នកនៅសមរភូមិក្រោយដែលចង់មានការឧបត្ថម្ភមកសមរភូមិមុខ មុននឹងមកត្រូវពិចារណាថាគួរផ្តល់អ្វីឱ្យបងប្អូននៅទីនេះ ហើយបើគួរផ្តល់អ្វីឱ្យបងប្អូននេះគួរទិញដែលជាផលិតផលក្នុងខេត្តព្រះវិហារផងដែរ ដើម្បីឱ្យអ្នកខេត្តព្រះវិហារទ ទួលបានផលប្រយោជន៍ពីការឈរជើងរបស់កងទ័ព៕

ដោយ៖ ប៊ុនរិទ្ធ