AKP ភ្នំពេញ ថ្ងៃទី២៧ ខែមិថុនា ឆ្នាំ២០២៥ -- សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នាល្ងាចថ្ងៃទី២៧ ខែមិថុនា ឆ្នាំ២០២៥នេះ អញ្ជើញជាអធិបតី ក្នុងពិធីសំណេះសំណាល និងពិសាអាហារសាមគ្គីមហាគ្រួសារ សហគ្រាសធុនតូច មធ្យម និងសិប្បកម្មកម្ពុជា ក្នុងឱកាសអបអរ “ទិវាជាតិសហគ្រាសធុនមីក្រូ តូច និងមធ្យម របស់សមាគមមូលនិធិសម្តេចតេជោ នៅមជ្ឈមណ្ឌល សាលសន្និបាត និងពិព័រណ៍កោះពេជ្រ។

ព្រឹត្តិការណ៍នេះជាការលើកទឹកចិត្តដ៏សំខាន់ និងជាការផ្តល់តម្លៃដល់សហគ្រាសធុនមីក្រូ តូច និង មធ្យមនៅកម្ពុជា ចំពោះការរួមចំណែកបង្កើតការងារ ជំរុញការកែច្នៃ ពង្រីកទីផ្សារក្នុងស្រុក និងទីផ្សារអន្តរជាតិ ដែលមានក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ជាស្ថាប័នបង្គោល ដឹកនាំសម្របសម្រួល។ 

ជាមួយនឹងវត្តមានដ៏ឧត្តុងឧត្តម របស់ សម្តេចធិបតី នាយករដ្ឋមន្ត្រី និង លោកជំទាវបណ្ឌិត កម្មវិធីសំណេះសំណាល និងពិសាភោជនាហារសាមគ្គីឆ្នាំ នេះ មានអ្នកចូលរួមមកពីបណ្តាសហគ្រាសធុនតូច និងមធ្យម និងសិប្បកម្មនៅកម្ពុជាទូទាំង ២៥ រាជធានី-ខេត្ត រួមទាំងភ្ញៀវជាតិ អន្តរជាតិ សរុបប្រមាណ ៥ពាន់នាក់។ 

សូមរម្លឹកថា សមាគមមូលនិធិសម្តេចតេជោ ដែលបានបង្កើតឡើងនៅ ឆ្នាំ២០២០ ក្នុងគោលបំណងដើម្បីរួមចំណែកក្នុងការគាំទ្រ និងជំរុញ ដល់ការអភិវឌ្ឍន៍សហគ្រាសធុនតូច និងមធ្យមកម្ពុជា តាមរយៈការបណ្តុះបណ្តាល បច្ចេកទេស ជំនាញ ទីផ្សារ និងការដោះស្រាយ បញ្ហាប្រឈមនានា ស្របតាមគោលនយោបាយ និងចក្ខុវិស័យរបស់រាជរដ្ឋាភិបាល៕ 

ដោយ៖ គង់ សិរីរ័ត្ន