AKP ភ្នំពេញ ថ្ងៃទី២៧ ខែមិថុនា ឆ្នាំ២០២៥-- លោកជំទាវ កុយ សុដានី រដ្ឋលេខាធិការប្រចាំការ និងជាប្រធានក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈរបស់ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពី "ការពង្រឹងសមត្ថភាពលើការរៀបចំផែនការថវិកា ការអនុវត្តថវិកាកម្មវិធី និងការអនុវត្តកិច្ចលទ្ធកម្ម ជូនមន្ត្រីបង្គោលនៅតាមអង្គភាពថវិកា ក្រោមឱវាទក្រសួងសាធារណការ និងដឹកជញ្ជូន" កាលពីថ្ងៃព្រហស្បតិ៍ ទី២៦ ខែមិថុនា ឆ្នាំ២០២៥ ដោយមានការអញ្ជើញចូលរួមពីថ្នាក់ដឹកនាំក្រសួង មន្ត្រីជំនាញគ្រប់គ្រងហិរញ្ញវត្ថុ នៃអគ្គនាយកដ្ឋានរដ្ឋបាល និងហិរញ្ញវត្ថុ និងអង្គភាពលទ្ធកម្ម ព្រមទាំងសិក្ខាកាមមកពីអង្គភាពថវិកាក្រោមឱវាទក្រសួង សរុបប្រមាណ១៤០នាក់។

វគ្គបណ្តុះបណ្តាលនេះរៀបចំឡើងដើម្បីផ្តល់ជាមូលដ្ឋានសំខាន់ៗដោយផ្តោតទៅលើការគ្រប់គ្រងចំណូល ការគ្រប់គ្រងទ្រព្យសម្បត្តិរដ្ឋ ការចំណាយតាមរជ្ជទេយ្យបុរេប្រទាន និងនីតិវិធីកិច្ចលទ្ធកម្ម ដល់សិក្ខាកាមឱ្យបានយល់ដឹងកាន់តែស៊ីជម្រៅ និងជាពិសេសសិក្ខាកាមមកពីអង្គភាពថវិកាថ្នាក់កណ្តាល ហើយវគ្គបណ្តុះបណ្តាលនេះនឹងផ្តល់ជាពុទ្ធិក្នុងការជួយជ្រោមជ្រែងដល់មន្រ្តីបច្ចេកទេស ដែលទទួលបន្ទុកហិរញ្ញវត្ថុនៅអង្គភាពថវិកាសរុប៣៨អង្គភាព ក្នុងនោះនៅថ្នាក់កណ្តាលចំនួន១៣អង្គភាព និងនៅថ្នាក់មូលដ្ឋានចំនួន២៥អង្គភាព  គឺមន្ទីរសាធារណការ និងដឹកជញ្ជូនទាំង២៥រាជធានី-ខេត្ត។

ការរៀបចំវគ្គបណ្តុះបណ្តាលនេះក៏ជាផ្នែកមួយនៃការអនុវត្តសកម្មភាពនៅក្នុងការងារកែទម្រង់ការគ្រប់គ្រងហិរញ្ញវត្ថុសាធារណៈរបស់ក្រសួង ហើយកន្លងមក វគ្គបណ្តុះបណ្តាលបែបនេះត្រូវបានរៀបចំជាបន្តបន្ទាប់ ក្នុងទិសដៅ ពង្រឹងប្រសិទ្ធភាព អនុវត្តការងារ អង្គភាពថវិការបស់រដ្ឋបាលកណ្តាលរបស់ ក្រសួង ដែលនឹងក្លាយទៅជាអង្គភាពថវិកាអាណាប័កផ្ទេរសិទ្ធិពេញលេញ ដែលនឹងមានសមត្ថភាពអនុវត្តតួនាទី ភារកិច្ចសិទ្ធិអំណាច និងការទទួលខុសត្រូវរបស់ខ្លួនឱ្យបានច្បាស់លាស់តាមបទប្បញ្ញតិជាធរមាន៕

ដោយ៖ ពេជ្រ សំអឿន (ប្រភព៖ ក្រសួងសាធារណការ និងដឹកជញ្ជូន)