AKP កំពង់ធំ ថ្ងៃទី២៧ ខែមិថុនា ឆ្នាំ២០២៥-- លោក ឈួន រ៉ា ប្រធានក្រុមប្រឹក្សាស្រុកប្រាសាទបល្ល័ង្ក និងលោក សេង សំអាង អភិបាលរងស្រុកប្រាសាទបល្ល័ង្ក កាលពីថ្ងៃទី២៦ ខែមិថុនា ឆ្នាំ២០២៥អញ្ជើញជាអធិបតីក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាស្រុក អាណត្តិទី៤ ឆ្នាំ២០២៥ ដើម្បីដោះស្រាយ សំណើសំណូមពរ និងបញ្ហាប្រឈមរបស់ប្រជាពលរដ្ឋនៅឃុំផាន់ញើម ស្រុកប្រាសាទបល្ល័ង្ក ខេត្តកំពង់ធំ។

លោក ឈួន រ៉ា បានបញ្ជាក់ថា វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាស្រុក មានគោលបំណងដើម្បីផ្សព្វផ្សាយអំពីតួនាទី ភារកិច្ចរបស់ក្រុមប្រឹក្សា និងគណៈអភិបាលស្រុក ព្រមទាំងលទ្ធផលសំខាន់ៗ ដែលរដ្ឋបាលស្រុកទទួលបានតាមរយៈការអនុវត្តនូវសកម្មភាពនានាបណ្តាឆ្នាំកន្លងមក និងធ្វើការពិភាក្សា ពិគ្រោះយោបល់ ជាមួយបងប្អូនប្រជាពលរដ្ឋ ដើម្បីរកនូវបញ្ហាអាទិភាពសំខាន់ៗសម្រាប់រដ្ឋបាលស្រុកយកទៅធ្វើការពិចារណាដោះស្រាយ និងបន្តអនុវត្ត ដើម្បីលើកកម្ពស់ជីវភាពប្រជាពលរដ្ឋនៅគ្រប់មូលដ្ឋានភូមិឃុំឱ្យកាន់តែល្អប្រសើរឡើង និងដើម្បីចូលរួមចែករំលែកគំនិតយោបល់ និងការយល់ឃើញរបស់ប្រជាពលរដ្ឋ ក្នុងនោះប្រជាពលរដ្ឋមានចម្ងល់ឬយោបល់ ត្រូវលើកដៃ ឬសរសេរលើក្រដាស ហើយប្រជាពលរដ្ឋគ្រប់រូបមានសិទ្ធិស្មើៗគ្នាក្នុងការបញ្ចេញមតិយោបល់។ បងប្អូនប្រជាពលរដ្ឋទាំងអស់រួមទាំងមន្ត្រីរាជការ សូមមេត្តាលើកឡើងនៅបញ្ហាដែលបានជួបប្រទះកន្លងមកក៏ដូចជាសំណូមពរផ្សេងៗ ពាក់ព័ន្ធនឹងការផ្តល់សេវាសាធារណៈសេវាតម្រូវការ និងសេវាសំណូមពរ។ ជាមួយនឹងការលើកឡើងរបស់ប្រជាពលរដ្ឋក្នុងវេទិកាសាធារណៈរបស់ក្រុមប្រឹក្សាស្រុកមានសំណើសំណូមពរ និងបញ្ហាប្រឈមចំនួន១៤សំណួរ រួមមាន បញ្ហាបរិស្ថាន បញ្ហាបម្រើសេវាសាធារណៈ ទឹកស្អាត អំពូលភ្លើងសូឡា ផ្លូវបេតុង ប្រព័ន្ធលូរំដោះទឹក ទំនាស់់ដីធ្លី ។ល។

លោក សេង សំអាង បានសង្កត់ធ្ងន់ថា សូមថ្នាក់ដឹកនាំការិយាល័យជំនាញពាក់ពន្ធ័ជុំវិញស្រុក និងលោកមេឃុំ  ត្រូវខិតខំយកចិត្តទុកដាក់នូវតួនាទីភារកិច្ចរបស់ខ្លួន ក្នុងការបម្រើសេវាសាធារណៈ ទាំងសេវាតម្រូវការ និងសេវាសំណូមពរជូនបងប្អូនប្រជាពលរដ្ឋ នៅក្នុងមូលដ្ឋានរបស់ខ្លួន ប្រកបដោយប្រសិទ្ធភាព និងការទទួលខុសត្រូវខ្ពស់។ ត្រូវចូលរួមទប់ស្កាត់រាល់បទល្មើសគ្រឿងញៀន ល្បែងស៊ីសងគ្រប់ប្រភេទ ជាពិសេសអនុវត្តនូវគោលនយោបាយភូមិ/ឃុំ មានសុវត្ថិភាពរបស់រាជរដ្ឋាភិបាលកម្ពុជា ប្រកបដោយប្រសិទ្ធភាព។ 

ឆ្លើយតបនឹងបញ្ហា សំណូមពរខាងលើ លោកអភិបាលរងស្រុកបានសន្យាថានឹងធ្វើការដោះស្រាយជូនប្រជាពលរដ្ឋ ជាពិសេសក្នុងនាមរដ្ឋបាលស្រុក លោកនឹងបន្តធ្វើឱ្យដូចជាភ្លៀងរលឹមមិនអាចដកដៃបានទេ ទោះជាយ៉ាងណាលោកក៏បានសំណូមពរឱ្យមានការចូលរួមពីប្រជាពលរដ្ឋផងដែរដើម្បីសុខភាពកូនចៅផង សុខសុវត្ថិភាពក្នុងមូលដ្ឋានផង និងដើម្បីចូលរួមចំណែកដល់បរិស្ថានសង្គមក្នុងមូលដ្ឋានផងដែរ៕

ដោយ ស៊ុម វណ្ណា