AKP ភ្នំពេញ ថ្ងៃទី២៧ ខែមិថុនា ឆ្នាំ២០២៥-- សាខាកាកបាទក្រហមកម្ពុជាខេត្តពោធិ៍សាត់បានរៀបកិច្ចប្រជុំរៀបចំសន្និបាត អាណត្តិទី៦ ក្រោមអធិបតីភាពលោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា និងឯកឧត្តម ហៀម ឃួន អនុប្រធានអចិន្ត្រៃយ៍គណ:កម្មាធិការសាខាខេត្តពោធិ៍សាត់ នាព្រឹកថ្ងៃទី២៧ ខែមិថុនា ឆ្នាំ២០២៥ ដោយមានការរួមពីសមាជិកសមាជិកាគណៈកម្មាធិការសាខា និងក្រុមប្រតិបត្តិទីស្នាក់ការកណ្តាល ក្រុមប្រតិបត្តិសាខាសរុបចំនួន២២ នៅសាលប្រជុំសាខាកាកបាទក្រហមកម្ពុជាខេត្តពោធិ៍សាត់។

លោកជំទាវ ពុំ ចន្ទីនី បានថ្លែងអំណរគុណចំពោះសមាជិកសមាជិកាគណៈកម្មាធិការសាខា និងក្រុមប្រតិបត្តិសាខា ដែលបានលះបង់កម្លាំងកាយចិត្ត ក្នុងការចូលរួមជួយសម្រាលការលំបាករបស់បងប្អូនប្រជាពលរដ្ឋរងគ្រោះ និងងាយរងគ្រោះបំផុត បានឆាប់រហ័ស និងទាន់ពេលវេលាកាលពីពេលកន្លងទៅ។ 

ក្នុងឱកាសនោះ លោកជំទាវបានផ្ដល់នូវមតិមួយចំនួនថា “ដើម្បីរៀបចំសន្និបាតឱ្យបានល្អ ត្រូវរៀបចំរបាយការណ៍សកម្មភាពនិងរបាយការណ៍ហិរញ្ញវត្ថុ លម្អិត និងសង្ខេប ហើយត្រូវមានការវាយតម្លៃឱ្យបានច្បាស់លាស់ និងត្រូវជ្រើសរើសសមាសភាពដែលមានសក្តានុពល ដើម្បីដឹកនាំជួយដល់សាខាកាកបាទក្រហមកម្ពុជា ខេត្តពោធិ៍សាត់ បានកាន់តែប្រសើរជាងមុន”។ 

ទន្ទឹមនឹងនេះ លោកជំទាវបានបន្តទៀតថា “សូមសាខាត្រូវពិនិត្យមើលសមាជិកពេញសិទ្ធិ សង្កេតការណ៍មកពីគ្រប់មជ្ឈដ្ឋាន ហើយមានមន្ត្រីទីស្នាក់ការកណ្តាល ដើម្បីជួយសម្របសម្រួលការងារនិងផ្នែកបច្ចេកទេស” ផងដែរ ទើបអាចធ្វើឱ្យអង្គសន្និបាទអាចប្រព្រឹត្តទៅបានល្អ៕

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)