AKP ភ្នំពេញ ថ្ងៃទី២៧ ខែមិថុនា ឆ្នាំ២០២៥-- លោក ថេង ឆវីរិទ្ធ អគ្គនាយករងនៃអគ្គនាយកដ្ឋានសេវាសង្គមកិច្ចនៃក្រសួងសង្គមកិច្ច អតីតយុទ្ធជន និងយុវនីតិសម្បទា នៅថ្ងៃទី២៦ ខែមិថុនា ឆ្នាំ២០២៥ បានចូលរួមជាអធិបតីបើកវគ្គបណ្តុះបណ្តាលរំលឹកឡើងវិញ ស្តីពីការអនុវត្តប្រព័ន្ធគ្រប់គ្រងករណីកុមារតាមបច្ចេកវិទ្យា Primero។

វគ្គបណ្តុះបណ្តាលរំលឹកឡើងវិញនេះរៀបចំឡើងក្នុងគោលបំណង៥សំខាន់ៗគឺ៖ ទី១. ដើម្បីពង្រឹងសមត្ថភាពបន្ថែមក្នុងការអនុវត្តការងារកិច្ចការពារកុមារ និងការគ្រប់គ្រងករណីកុមាររងគ្រោះ និងងាយរងគ្រោះ។ ទី២. យល់ដឹងពីការកេងប្រវ័ញ្ច និងរំលោភបំពានផ្លូវភេទកុមារលើប្រព័ន្ធអនឡាញ។ ទី៣. ការយល់ដឹងពីនីតិវិធីប្រតិបត្តិកិច្ចការពារកុមារសម្រាប់រដ្ឋបាល ក្រុង ស្រុក ខណ្ឌ (លំហូរាយការណ៏អំពីករណីកិច្ចការពារកុមារ)។ ទី៤. ការរំលឹកឡើងវិញលើជំនាញនៃការគ្រប់គ្រងករណី (និយមន័យ គោលការណ៍ និងជំហាន នៃការគ្រប់គ្រងករណី)។ ទី៥. ការរំលឹកការអនុវត្តការប្រើប្រាស់ប្រព័ន្ធគ្រប់គ្រងករណីកុមារតាមបច្ចេកវិទ្យា Primero (ការធ្វើបច្ចុប្បន្នភាពរបស់ប្រព័ន្ធ Primero ជំហាន់នីមួយៗក្នុងប្រព័ន្ធ Primero)។

ក្នុងវគ្គបណ្តុះបណ្តាលនេះមានការគាំទ្រពីអង្គការ APLE មានការចូលរួមពីមន្រ្តីជំនាញនាយកដ្ឋានកិច្ចការពារកុមារ តំណាងមន្ទីរ ស.អ.យ. រាជធានីភ្នំពេញ មន្រ្តីបង្គោលកិច្ចការពារកុមារនៃរដ្ឋបាលខណ្ឌទាំង១៤ សរុបចំនួន៤១រូប៕

ដោយ ណយ នឿន (ប្រភព៖ ក្រសួងសង្គមកិច្ច)