AKP ភ្នំពេញ ថ្ងៃទី២៧ ខែមិថុនា ឆ្នាំ២០២៥-- វិស័យសហគ្រាសធុនមីក្រូ តូច និងមធ្យម (MSMEs) ត្រូវបានរាជរដ្ឋាភិបាលកំណត់យកជាឆ្អឹងខ្នងសេដ្ឋកិច្ចក្នុងការនាំកម្ពុជាចាកចេញពីប្រទេសដែលមានការអភិវឌ្ឍន៍តិចតួចនៅចុងឆ្នាំ២០២៩។  វិស័យមួយនេះក៏ជាស្នូល ដែលបាន និងកំពុងចូលរួមចំណែកយ៉ាងសំខាន់ក្នុងការបង្កើតការងារ និងមុខរបរ ការបង្កើនប្រាក់ចំណូល កាត់បន្ថយភាពក្រីក្រ និងជំរុញការអភិវឌ្ឍប្រកបដោយចីរភាព បរិយាបន្ន និងភាពធន់។

ថ្លែងក្នុងទិវាជាតិសហគ្រាសធុនមីក្រូ តូច និងមធ្យម លើកទី២ ក្រោមមូលបទ៖ "ការត្រៀមលក្ខណៈរបស់សហគ្រាសធុនមីក្រូ តូច និងមធ្យម សម្រាប់ការចាកចេញពីប្រទេសដែលមានការអភិវឌ្ឍតិចតួច" ដែលបានរៀបចំឡើងនាសណ្ឋាគារ សុខាភ្នំពេញ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានគូសបញ្ជាក់ថាសហគ្រាសធុនមីក្រូ តូច និងមធ្យមកំពុងបានយកចិត្តទុកដាក់ពីរាជរដ្ឋាភិបាលកម្ពុជា។ ជាមួយគ្នានេះ រាជរដ្ឋាភិបាលប្តេជ្ញាគាំទ្រចំពោះសហគ្រាសធុនមីក្រូ តូច និងមធ្យម  ដែលបន្តពុះពារ និងខិតខំកសាងអភិវឌ្ឍអាជីវកម្មរបស់ខ្លួន ទោះបីកំពុងស្ថិតក្នុងបរិការណ៍សេដ្ឋកិច្ចដែលមានការប្រឈមក៏ដោយ។

ឯកឧត្តមរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកឡើងដែរនាពេលនេះដោយសារស្មារតីស្នេហាជាតិ និងចលនារួបរួមជាតិ កាន់តែមានសន្ទុះខ្លាំងឡើង នោះបានជួយជំរុញដល់ការលើកស្ទួយ និងឱ្យតម្លៃលើផលិតផលក្នុងស្រុកខ្ពស់ជាងផលិតផលនាំចូលពីប្រទេសជិតខាង។ ទាំងនេះនេះជាការមើលឃើញជារួមរបស់រដ្ឋាភិបាល ដែលការណ៍នេះគឺជាកាលានុភាពមួយដ៏វិសាលចំពោះវិស័យសហគ្រាសធុនមីក្រូ តូច និងមធ្យម (MSMEs) ក្នុងការអភិវឌ្ឍសមត្ថភាពធ្វើពិពិធកម្មផលិតផលក្នុងស្រុកឱ្យកាន់តែសម្បូរបែប។

ទន្ទឹមនឹងនេះ ឯកឧត្តមរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកទឹកចិត្តដល់សហគ្រាសធុនមីក្រូ តូច និងមធ្យម ឱ្យទាញយកអត្ថប្រយោជន៍នេះឱ្យបានអតិបរមា ខណៈរដ្ឋាភិបាលគឺនៅតែបន្តគាំទ្រគ្រប់រូបភាពទាំងហិរញ្ញវត្ថុ និងបទដ្ឋានគតិយុត្តនានា ដើម្បីអភិវឌ្ឍន៍សមត្ថភាព និងផលិតភាព ក្នុងដំណើរការអភិវឌ្ឍសេដ្ឋកិច្ច និងសង្គមជាតិកម្ពុជា។

ជាមួយគ្នានេះដែរ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកិទ្យា និងនវានុវត្តន៍ បានថ្លែងប្រាប់បណ្តាញសារព័ត៌មានថា តាមធម្មតាការរស់នៅប្រទេសតំបន់ពិសេសអាស៊ានតែងតែមានការពឹងពាក់គ្នាទៅវិញទៅមក ដូចករណីកម្ពុជាកំពុងមានជម្លោះព្រំដែនជាមួយថៃនាពេលនេះ គឺកម្ពុជាបានត្រៀមខ្លួនបានច្រើន ឯកម្លាំងផលិតកម្មយើងក៏ធ្វើបានច្រើនដែរ។បើយើងនិយាយថាប៉ះពាល់វាក៏ប៉ះពាល់បន្តិចបន្តួចដែរ តែក្នុងរង្វង់យើងអាចគ្រប់គ្រងបានទាំងអស់។ ខ្សែសង្វាក់ផលិតកម្មពុំមានបញ្ហាដែលចោទជាធំដុំទេ។ “ក្នុងជម្លោះព្រំដែនដែលប្រទេសជិតខាងគេចង់ដាក់សម្ពាធ តែយើងត្រូវពង្រឹងខ្លួនឯង ដើម្បីបញ្ជាក់ថាផលិតផលខ្មែរយើងពិតជាមិនចាញ់បរទេសទេហើយយើងអាចនឹងឈានចូលទៅកាន់ទីផ្សារធំៗថែមទៀត”។

គួរបញ្ជាក់ថាបើយោងតាមជំរឿនឆ្នាំ២០២២របស់វិទ្យាស្ថានជាតិស្ថិតិនៃក្រសួងផែនការ កម្ពុជាមានសហគ្រាសធុនមីក្រូ តូច និងមធ្យមចំនួន ៧៥៣,៦៧០ មូលដ្ឋាន មានកម្លាំងពលកម្មសរុបជិត៣លាននាក់ ក្នុងនោះមានស្រ្តី ៦០ភាគរយ។  វិស័យនេះរួមចំណែក៦៣ភាគរយនៃផលិតផលក្នុងស្រុកសរុប និងនៅតែជាវិស័យស្នូលសម្រាប់មហិច្ឆតារបស់កម្ពុជា ក្នុងការកសាងសេដ្ឋកិច្ចដែលកាន់តែមានពិពិធកម្មខ្ពស់ និងផ្អែកលើនវានុវត្តន៍៕

ដោយ៖ មករា