AKP ភ្នំពេញ ថ្ងៃទី២៦ ខែមិថុនា ឆ្នាំ២០២៥-- ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានអញ្ជើញជាអធិបតីភាពក្នុងពិធីប្រកាសផ្សព្វផ្សាយរបាយការណ៍អង្កេតសេដ្ឋកិច្ច សង្គមកិច្ចកម្ពុជា ឆ្នាំ២០២៣ នៅទីស្តីការក្រសួងផែនការ នាព្រឹកថ្ងៃទី២៦ ខែមិថុនា ឆ្នាំ២០២៥។

ថ្លែងក្នុងពិធី ឯកឧត្តមរដ្ឋមន្ត្រី បានមានប្រសាសន៍ថា វិទ្យាស្ថានជាតិស្ថិតិនៃក្រសួងផែនការ គឺជាគ្រឹះស្ថានសាធារណៈរដ្ឋបាលថ្នាក់ជាតិរបស់រាជរដ្ឋាភិបាលទទួលបន្ទុកលើវិស័យស្ថិតិ ក្នុងការដឹកនាំរៀបចំធ្វើជំរឿន អង្កេត អង្កេតចន្លោះជំរឿន តាមរយៈការចុះសម្ភាសន៍ ប្រមូលទិន្នន័យ វិភាគ ចងក្រង និងផ្សព្វផ្សាយទិន្នន័យស្ថិតិ ព្រមទាំងមានតួនាទីដឹកនាំរៀបចំគោលនយោបាយអភិវឌ្ឍន៍ស្ថិតិផ្លូវការ រួមទាំងការងារសម្របសម្រួលនៅក្នុងប្រព័ន្ធស្ថិតិជាតិ និងផ្តល់កិច្ចសហប្រតិបត្តិការជាមួយដៃគូអភិវឌ្ឍ និងអង្គការអន្តរជាតិយ៉ាងទូលំទូលាយនៅក្នុងវិស័យស្ថិតិ ទាំងក្នុងក្របខ័ណ្ឌជាតិ តំបន់ និងសកល។ អង្កេតសេដ្ឋកិច្ច សង្គមកិច្ចកម្ពុជាឆ្នាំ២០២៣ ត្រូវបានធ្វើឡើងដោយអនុលោមតាមច្បាប់ស្តីពីស្ថិតិ និងអនុក្រឹត្យលេខ១៨២ អនក្រ.បក ចុះថ្ងៃទី៩ ខែកញ្ញា ឆ្នាំ២០២១ ស្តីពីស្ថិតិផ្លូវការដែលបានចាត់តាំង។ អង្កេតសេដ្ឋកិច្ច សង្គមកិច្ចកម្ពុជា ធ្វើទ្បើងចំនួន១៩លើក ចាប់ពីឆ្នាំ១៩៩៣ ដល់ឆ្នាំ២០២៣ និងបានកំពុងបន្តអនុវត្តចុះសម្ភាសន៍ប្រមូលទិន្នន័យគ្រួសារសំណាកគំរូក្នុងឆ្នាំ២០២៥ នៅរាជធានី ខេត្ត ទាំង២៥ ដែលអនុវត្តដោយមន្រ្តីវិទ្យាស្ថានជាតិស្ថិតិនៃក្រសួងផែនការ និងមន្រ្តីមន្ទីរផែនការរាជធានី ខេត្ត ដោយមានការគាំទ្របច្ចេកទេសពីធនាគារពិភពលោក (The World Bank) និងដៃគូអភិវឌ្ឍន៍ផ្សេងទៀត។

ចាប់តាំងពីឆ្នាំ១៩៩៣ រហូតដល់ឆ្នាំ២០១៧ អង្កេតសេដ្ឋកិច្ច សង្គមកិច្ចកម្ពុជា ត្រូវបានធ្វើឡើងក្រោមការគាំទ្រផ្នែកបច្ចេកទេស និងហិរញ្ញវត្ថុ ដោយទីភ្នាក់ងារសហប្រតិបត្ដិការអភិវឌ្ឍន៍អន្ដរជាតិស៊ុយអែត (SIDA) ស្ថិតិស៊ុយអែត (SCB) និងកម្មវិធីអភិវឌ្ឍន៍របស់អង្គការសហប្រជាជាតិ (UNDP)។ ក្រោយមក ដោយមើលឃើញពីសារៈសំខាន់នៃទិន្នន័យនេះ ការងារអង្កេតសេដ្ឋកិច្ច សង្គមកិច្ចកម្ពុជា ត្រូវបានរៀបចំធ្វើឡើងរៀងរាល់២ឆ្នាំម្តង ក្រោមការគាំទ្រថវិកាទាំងស្រុងដោយរាជរដ្ឋាភិបាលកម្ពុជា ចាប់ពីឆ្នាំ២០១៩ រហូតដល់បច្ចុប្បន្ន។ អង្កេតសេដ្ឋកិច្ច សង្គមកិច្ចកម្ពុជា មានគោលបំណងផ្តល់នូវសំណុំសូចនាករដែលមានលក្ខណៈគ្រប់ជ្រុងជ្រោយ ស្តីពីស្ថានភាពរស់នៅរបស់ប្រជាជនកម្ពុជា ដោយគ្របដណ្ដប់លើទិដ្ឋភាពសេដ្ឋកិច្ច សង្គមជាច្រើន ដូចជាស្ថានភាពគ្រួសារក្នុងវិស័យសេដ្ឋកិច្ច ផលិតកម្មកសិកម្ម ឧស្សាហកម្ម និងសេវាកម្ម ស្ថានភាពសមាជិកគ្រួសារ ស្ថានភាពសុខភាព ស្ថានភាពអប់រំ ស្ថានភាពលំនៅឋាន ការទទួលការរងគ្រោះ សន្តិសុខស្បៀង និងទិន្នន័យផ្សេងៗទៀត។

ឯកឧត្តមរដ្ឋមន្ត្រីបានរំលេចបន្ថែមថា ទិន្នន័យអង្កេតសេដ្ឋកិច្ច សង្គមកិច្ចកម្ពុជា ត្រូវបានប្រើប្រាស់ ក្នុងការតាមដានត្រួតពិនិត្យ និងវាយតម្លៃលើការអនុវត្តផែនការយុទ្ធសាស្ដ្រអភិវឌ្ឍន៍ជាតិ គោលដៅអភិវឌ្ឍប្រកបដោយចីរភាពកម្ពុជា រៀបចំគោលនយោបាយប្រកបដោយប្រសិទ្ធភាព សម្រាប់ការកាត់បន្ថយ និងការលុបបំបាត់ភាពក្រីក្រនៅកម្ពុជា គណនាផលិតផលក្នុងស្រុកសរុប (គណនេយ្យជាតិ) និងធ្វើការវិភាគអំពីស្ថានភាពសន្តិសុខស្បៀង គណនេយ្យជាតិនៃការបង្វែរផ្ទេរក្នុងសេដ្ឋកិច្ចតាមជំនាន់ ភាគលាភសេដ្ឋកិច្ចប្រជាសាស្រ្ត និងឱនភាពសេដ្ឋកិច្ចតាមវដ្តជីវិត។ លើសពីនេះទៅទៀត ទិន្នន័យអង្កេត សេដ្ឋកិច្ច សង្គមកិច្ចកម្ពុជា ក៏ត្រូវបានវិស័យឯកជន អង្គការមិនមែនរដ្ឋាភិបាល អ្នកស្រាវជ្រាវ សេដ្ឋវិទូ អ្នកវិភាគ សិស្សនិសិ្សត ប្រើប្រាស់ក្នុងដែនវិជ្ជាជីវៈរបស់ខ្លួន ដើម្បីស្វែងយល់ និងវិភាគអំពីស្ថានភាពសេដ្ឋកិច្ច សង្គម និងបរិស្ថាននៅកម្ពុជា។ ក្នុងរយៈពេល១២ខែ ចាប់ពីខែមករា ដល់ខែធ្នូ ឆ្នាំ២០២៣ អង្កេតសេដ្ឋកិច្ច សង្គមកិច្ចកម្ពុជាឆ្នាំ២០២៣ បានកត់ត្រាទិន្នន័យគ្រួសារកម្ពុជា មានទំហំសំណាកគំរូធំ រហូតដល់ ១២ ០៩៦គ្រួសារ ដែលត្រូវបានជ្រើសរើសតាមវិធីសាស្រ្តស្ថិតិដោយចៃដន្យនៅទូទាំង២៥រាជធានី ខេត្ត។ ការសម្ភាសគ្រួសារ សំណាកគំរូ គឺធ្វើឡើងតាមរយៈបញ្ជីសំណួរ-ចម្លើយ ស្របតាមការណែនាំរបស់អង្គការសហប្រជាជាតិ (United Nations) និងជំនួយបច្ចេកទេសរបស់ធនាគារពិភពលោក (The World Bank) តាមវិធីសាស្រ្ត Living Standards Measurement Study (LSMS) ដែលត្រូវបានអនុវត្តយ៉ាងទូលំទូលាយនៅបណ្តាប្រទេសលើសកលលោក សម្រាប់ការគណនាភាពក្រីក្រ។ សូចនាករសំខាន់ៗមួយចំនួន ដែលទាញចេញពីរបាយការណ៍អង្កេតសេដ្ឋកិច្ច សង្គមកិច្ចកម្ពុជាឆ្នាំ២០២៣ រួមមាន៖ប្រជាសាស្រ្ត, លំនៅឋាន, ការសិក្សាអប់រំ, កម្លាំងពលកម្ម, សុខភាពនិងជនមានពិការភាព, ចំណូលនិងឥណទាន (បំណុល) គ្រួសារ, ចំណាយប្រើប្រាស់របស់គ្រួសារ និងការប្រើប្រាស់ស្បៀងអាហាររបស់គ្រួសារ ដែលមានទិន្នន័យ និងព័ត៌មានលម្អិតដូចនៅក្នុងរបាយការណ៍សេដ្ឋកិច្ច សង្គមកិច្ចឆ្នាំ២០២៣ បោះពុម្ពចែកជូនអង្គពិធី និងធ្វើពិធីប្រកាសផ្សព្វផ្សាយនាពេលនេះ។

ក្នុងឱកាសនោះ ឯកឧត្តមរដ្ឋមន្ត្រីបានសម្តែងនូវការដឹងគុណយ៉ាងជ្រាលជ្រៅបំផុតចំពោះប្រមុខរាជរដ្ឋាភិបាលកម្ពុជា ដែលបានគាំទ្រយ៉ាងពេញទំហឹងដល់ការងារស្ថិតិ និងសូមថ្លែងអំណរគុណផងដែរចំពោះ ឯកឧត្តម លោកជំទាវ លោក លោកស្រី ថ្នាក់ដឹកនាំ ធនាគារពិភពលោក និងដៃគូអភិវឌ្ឍ មន្ត្រីអង្កេត ក្រុមការងារបច្ចេកទេសទាំងអស់ របស់វិទ្យាស្ថានជាតិស្ថិតិ នៃក្រសួងផែនការ មន្ទីរផែនការរាជធានី ខេត្ត និងក្រសួង ស្ថាប័នពាក់ព័ន្ធ ជាពិសេសគ្រួសារដែលបានសហការផ្តល់ចម្លើយលើកម្រងសំណួរ និងចូលរួមក្នុងដំណើរការអង្កេតសេដ្ឋកិច្ច សង្គមកិច្ចកម្ពុជាឆ្នាំ២០២៣ ឱ្យសម្រេចបានជោគជ័យនាពេលនេះ៕

ដោយ៖ ពេជ្រ សំអឿន (ប្រភព៖ ក្រសួងផែនការ)