AKP ព្រះវិហា ថ្ងៃទី២៦ ខែមិថុនា ឆ្នាំ២០២៥--
សម្ដេចអគ្គមហាសេនាបតីតេជោ ហ៊ុន សែន នាយឧត្ដមសេនីយ៍ផុតលេខផ្កាយមាស៥ និងជាប្រធានព្រឹទ្ធសភា នៃព្រះរាជាណាចក្រកម្ពុជាបានថ្លែងបញ្ជាក់ថា កម្ពុជាសង្ឃឹមរង់ចាំថា នៅប្រទេសថៃ នឹងមាននាយករដ្ឋមន្រ្ដីថ្មី ហើយចេញមកដើម្បីដោះស្រាយជាមួយកម្ពុជា ព្រោះនៅពេលនេះ យើងមិនដឹងថា ត្រូវចរចាជាមួយអ្នកណា ហើយក៏មិនដឹងថា អ្នកណាដែលជាអ្នកមានអំណាចពិតប្រាកដនោះដែរ។ ការថ្លែងបញ្ជាក់របស់សម្ដេចតេជោបែបនេះ ក្នុងពិធីជួបសំណេះសំណាលសួរសុខទុក្ខជនភៀសសឹក នៅទីទួលសុវត្ថិភាព វត្តពោធិ៥០០០ ដើម ស្ថិតក្នុងស្រុកគូលែន ខេត្ដព្រះវិហារ នារសៀលថ្ងៃទី២៦ ខែមិថុនា ឆ្នាំ២០២៥។

សម្ដេចតេជោ ហ៊ុន សែន បានគូសបញ្ជាក់ថា កម្ពុជាក៏អាចដល់ដឹងបានថា លុះត្រាតែមាននាយករដ្ឋមន្រ្ដីថ្មីចូលកាន់តំណែង អាចនឹងមានសុច្ឆន្ទៈដោះស្រាយបញ្ហាជម្លោះព្រំដែនជាមួយកម្ពុជា។ សម្ដេចតេជោបានបញ្ជាក់យ៉ាងដូច្នេះថា៖ «យើងសង្ឃឹមរង់ចាំថា នៅប្រទេសថៃ នឹងមាននាយករដ្ឋមន្រ្ដីថ្មី ហើយចេញមកដើម្បីនឹងដោះស្រាយជាមួយកម្ពុជា ព្រោះនៅពេលនេះ យើងមិនដឹងថា ត្រូវចរចាជាមួយអ្នកណា អំណាចពិតប្រាកដគឺជាអ្នកណា តើជាទ័ព ឬជាបក្សនយោបាយ ឬក៏អ្នកនៅក្រៅបក្សនយោបាយ ឬក៏ជានាយករដ្ឋមន្រ្ដី វាអត់ដឹងជាអ្នកណាដែលជាអ្នកមានអំណាចពិតប្រាកដ»។ 

ជាមួយគ្នានេះ សម្ដេចតេជោប្រធានព្រឹទ្ធសភាបានបន្ថែមថា កម្ពុជាមិនមើលទៅថៃ ជាសត្រូវនោះទេ គ្រាន់តែចាត់ទុកថា ពួកជ្រុលនិយមមួយក្រុម ដោយមានកងទ័ពខ្លះ និងអ្នកនយោបាយខ្លះតែប៉ុណ្ណោះ ហើយមិនថា ក្រុមអាវក្រហម អាវលឿង ឬអាវចម្រុះពណ៌នោះទេ កម្ពុជាអាចធ្វើការបានជាមួយគ្រប់តួអង្គទាំងអស់។ សម្ដេចតេជោបានសង្កត់ធ្ងន់ថា៖ «យើងគ្រាន់តែចាត់ទុកថា ពួកជ្រុលនិយមមួយក្រុម ដោយរាប់ទៅដោយកងទ័ពខ្លះ និងអ្នកនយោបាយខ្លះតែប៉ុណ្ណោះ។ យើងមិនថា អាវក្រហម អាវលឿង មិនថាអាវចម្រុះពណ៌នោះទេ យើងធ្វើការគ្រប់ជាមួយតួអង្គទាំងអស់ដែលចូលមកគ្រប់គ្រងប្រទេសថៃ»៕

ដោយ៖ រិទ្ធី