AKP ភ្នំពេញ ថ្ងៃទី ២៦ ខែមិថុនា ឆ្នាំ២០២៥ -- ឯកឧត្តមបណ្ឌិត ជា ច័ន្ទបរិបូរណ៍ ឯកអគ្គរាជទូតវិសាមញ្ញ និងពេញសមត្ថភាព នៃព្រះរាជជាណាចក្រកម្ពុជា ប្រចាំសាធារណរដ្ឋប៊ុលហ្ការី បានអញ្ជើញទៅទទួលស្វាគមន៍ លោក ទីវ តារារិទ្ធិ អ្នកជិះកង់ផ្សងព្រេងសប្បុរសធម៌ ដើម្បីកុមារកម្ពុជានៅព្រំដែនប្រទេសទួកគី និងប្រទេសប៊ុលហ្ការី ដើម្បីជួយសម្របសម្រួល និងលើកទឹកចិត្ដដល់អ្នកជិះកង់រូបនេះ ដែលបានធ្វើដំណើរឆ្លងកាត់ទៅទ្វីបអឺរ៉ុប ក្នុងគោលដៅរៃអង្គាសថវិកា ដើម្បីជួយដល់កុមារកម្ពុជា។ ការទទួល និងស្វាគមន៍របស់ឯកឧត្តមបណ្ឌិត ជា ច័ន្ទបរិបូរណ៍ ចំពោះលោក ទីវ តារារិទ្ធិ អ្នកជិះកង់ផ្សងព្រេងសប្បុរសធម៌ ដើម្បីកុមារកម្ពុជានេះ បានធ្វើឡើងនាថ្ងៃទី២៥ ខែមិថុនា ឆ្នាំ២០២៥ នៅទីក្រុងសូហ្វ៊ីយ៉ា ប្រទេសប៊ុលហ្ការី។ 

ក្នុងឱកាសនោះ ឯកឧត្តមបណ្ឌិត ជា ច័ន្ទបរិបូរណ៍ បានមានប្រសាសន៍ស្វាគមន៍ និងសូមកោតសរសើរដល់ក្មួយ ទីវ តារារិទ្ធិ ក្នុងបេសកកម្មជិះកង់ដើម្បីកុមារកម្ពុជា ដែលធ្វើដំណើរមកដល់ទ្វីបអឺរ៉ុប ហើយការទទួលស្វាគមន៍នេះក្នុងការជួយបង្កើនភាពកក់ក្តៅ  ការលើកទឹកចិត្ត  និងការសម្របសម្រួលក្នុងបេសកកម្មជិះកង់នៅទ្វីបអឺរ៉ុបដល់លោក ទីវ តារារិទ្ធិ ដែលបានលះបង់គ្រប់បែបយ៉ាង ដើម្បីកុមារកម្ពុជាឱ្យទទួលបានជោគជ័យ។

ជាមួយគ្នានេះ លោក ទីវ តារារិទ្ធិ បានសម្ដែងនូវការភ្ញាក់ផ្អើល និងកោតសរសើរចំពោះឯកឧត្ដមឯកអគ្គរាជទូតកម្ពុជាប្រចាំប្រទេសប៊ុលហ្ការី ដែលបានអញ្ជើញមកទទួលស្វាគមន៍លោកប្រកបដោយភាពស្និទ្ធស្នាល និងបង្ហាញពីប្រវត្ដិនៃទំនាក់ទំនងការទូតរវាងកម្ពុជា និងប៊ុលហ្ការី ដែលមានអាយុកាលជាង៦៥ឆ្នាំ មកហើយ។ លោកបានលើកឡើងថា មុននឹងធ្វើដំណើរទៅដល់ព្រំដែនប្រទេសប៊ុលហ្ការី លោកបានចំណាយពេលធ្វើដំណើរអស់រយៈពេល១៥ថ្ងៃ នៅក្នុងប្រទេសតួកគី និងបានផ្ដិតយករូបភាព និងទេសភាពដ៏ស្រស់ស្អាតជាច្រើននៅក្នុងប្រទេសទួកគី ហើយក៏បន្ដដំណើរឆ្លងមកដល់ព្រំដែនរវាងប្រទេសទួកគី និងប្រទេសប៊ុលហ្ការី។

លោកក៏បានថ្លែងអំណរគុណចំពោះឯកឧត្តមបណ្ឌិត ជា ច័ន្ទបរិបូរណ៍ ដែលបានយកចិត្ដទុកដាក់ និងជួយសម្របសម្រួលដល់ការធ្វើដំណើរឆ្លងកាត់ព្រំដែនចូលមកប្រទេសប៊ុលហ្ការីប្រកបដោយសុវត្ថិភាព និងបង្ហាញពីទឹកចិត្ដដ៏ល្អ យកចិត្ដទុកដាក់ស្វាគមន៍យ៉ាងកក់ក្ដៅដល់រូបលោក។

សូមបញ្ជាក់ជូនថា នេះជាការជិះកង់លើកដំបូងរបស់ លោក ទីវ តារារិទ្ធិ ទៅកាន់ទ្វីបអឺរ៉ុប ក្រោយការជិះកង់ជុំវិញតំបន់អាស៊ីអាគ្នេយ៍ ដែលត្រូវបានបញ្ចប់កាលពីឆ្នាំ២០២៣កន្លងទៅនេះ។ លោក ទីវ តារារិទ្ធិ បានចាប់ផ្តើម ដំណើរជិះកង់រៃអង្គាសថវិកា ជួយកុមារកម្ពុជា នៅថ្ងៃទី០៦ ខែមិថុនា ឆ្នាំ២០២៤ ដោយចាប់ផ្តើមពីមន្ទីរពេទ្យកុមារអង្គរ ខេត្តសៀមរាប នៅវេលាម៉ោង៦:០០នាទីព្រឹក  ក្នុងគោលដៅទៅទ្វីបអឺរ៉ុប បានឆ្លងកាត់ ១២ប្រទេសក្នុងទ្វីបអាស៊ី ដោយប្រើរយៈពេល១១ខែ លើតម្រាយផ្លូវជាង ២ម៉ឺនគីឡូម៉ែត្រ និងរៃអង្គាសបានថវិកាចំនួនជាង ១១ម៉ឺនដុល្លារ៕

ដោយ៖ រិទ្ធី, ប្រភព៖ ឯកអគ្គរាជទូតកម្ពុជាប្រចាំប្រទេសប៊ុលការី